Пенсие потыса, Зоя Ушаковалэн кыкетӥ улонэз кутскиз

Удмурт Дунне
By Удмурт Дунне 28 июля, 2016 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Дэри ёросысь Пероггуртысь «Кильтырнаос» ансамбльлэн кивалтӥсез З. Ушакова.

Дэри ёросысь Пероггуртысь «Кильтырнаос» ансамбльлэн кивалтӥсез З. Ушакова.

Кильтро кенакъёсты лӧпкытъясь

Дэри ёросысь Пероггуртысь Зоя Ушакова — визьмо, шаплы, котьмар карыны мыло-кыдо удмурт нылкышно. Зоя Михайловна бухгалтер луыса ужамын, энергетика удысын ужасьёслэн таукаронэнызы пусъемын. Ваньмон дыръяз кырӟаны-вераны яратэ. Сыӵе мылкыдыз ик сое вуттӥз «Кильтырнаос» ансамбле — 3-тӥ арзэ ини со та коллективен кивалтэ.

Лымшорысь — уйпала

Зоя Михайловна вордскемын но быдэ вуэмын Пичи Пурга ёросысь Итэш гуртын. Гуртысьтызы покчи классъем школаын дышетскыса, Вуж Мӧнья школае мынӥз. Эшъёсыныз ӵош нуналлы быдэ 4-5 иськемез пыдын ортчоно луылӥз. Соин сэрен ик, дыр, Зоя пичиысен спортэн эшъяськиз. Озьы ик со кырӟаны-вераны но мыло-кыдо вал, эшъёсыныз ӵош клубын но школаын концертъёс пуктылӥз. 8-тӥ классэз йылпумъяса, 10 иськеме интыяськем Уча черкогуртысь школае вамыштӥз. Эшъёсыз пиос гинэ луизы, малы ке шуоно нылъёс 9-тӥ классэ мылкыд ӧз каре мыныны. Зоялэсь сюлэмзэ бичатыса сямен возизы математика, физика но химия. Удмурт кылэз но мылысь-кыдысь  дышетӥз. Лыдъяны-чотаны яратӥз. Огпол дядяез «Советской Удмуртия» газетысь адӟем бухгалтеръёсты дасясь курсъёс сярысь ялонэз.  Но мынонэз кыдёкын — Глазов карын, пе, дышетсконо. Ӧз кышка нылаш кузь сюреслэсь — пыриз дышетскыны. Соку егитъёс гуртэ мед берытскозы шуыса, колхоз дышетскыны направление сётъям. Зоялы но «Искра» хозяйствоен кивалтӥсьёс сыӵе бумага сётӥллям. Сое гуртаз ӟеч мылкыдын пумитазы, ужаны соку ик бухгалтере пуктӥзы.

Одӥг ар ужаса вуттӥз но, вуоно сӥзьыл ик дораз армиысь куно вуиз — Глазовын ӵош дышетскем Валя эшезлэн Володя агаез. Егит пияш нылашез адӟиз но интыяз ик пумиз — та мынам луоз! Инвожо толэзе анай-атаеныз Итэше ныл кураны вуиз. Уйпал пилэн но лымшор ныллэн анай-атайёссылэн кылзы тупаз — туклячи-кудо кариськизы. Озьы Зоя Глазов ёросысь Котныре вуиз. Володя «Родина» колхозын шофёр луыса ужаз. Зоя артысь Коӵышысь сельсоветэ бухгалтере интыяськиз, нуналлы быдэ 3 иськеме ветлӥз. Володялэн 4 сузэръёсыз доразы улӥзы. Семьязы пумен эшшо бадӟымаз — кузпалъёслэн Таня нылзы вордӥськиз. Одӥг коркан 9 кузя улыны кутскизы.

Гуртысь — городэ

Коӵышысь «Путь Ильича»  колхозысь кивалтӥсьёс Володяез но асьсэ доры кыскыны быгатӥзы —  улон инты сётӥзы. Одӥг толалтэ, 3 ар Коӵышын улэмзы бере, кузпалъёс Зоялэн ӵыжы-выжыосыз доры Ижлы матысь Самолёт гуртэ кунояны ветлӥллям. Кунокуа кузё та палъёсты ушъяса верам, Ижлы, пе, матын, улонмы майбыр. Володялэн но, Зоялэн но мылкыдзы та пала лыктыны ӝутӥськем. 1976-тӥ арын соос Пероггуртэ выжо но «Ижевский» совхозэ ужаны интыясько. Владимир Васильевич механизаторлэсь ужзэ быдэсъя, нош Зоя Михайловна — рядовой бухгалтер.

— Уже но, семьяе но сюлмыя, но улонам маиз ке уг тырмы кадь потэ вал, — нош веранзэ азинтэ Зоя Михайловна. — Тодон-валанме будэтыны заочно амалэн дышетскыны пыри Сигаевоысь совхоз-техникуме. Инмарлы тау, кузпалын мыным  удалтӥз.  Сессиосы но экзаменъёсы кошкылыкум, пичи Таняме Володяен кельтылӥ. Техникумез йылпумъяме бере 32 арескын монэ валтӥсь бухгалтере пуктӥзы. Практикае ми доры ӵем вуылыны кутскизы Ижысь гурт удысъя институтысь студентъёс. Мыным соос азьын возьыт потыны кутскиз — аслам сомында дышетскеме ӧвӧл, нош валэктонъёс сётъясько. Кутӥ но документъёсме Ижысь гурт удысъя институтэ сётӥ. Отын мон мыло-кыдо дышетски. Эсьмаса, диплом ужме но, госэкзаменъёсме но «5»-ёслы гинэ сётӥ. Юрттэмезлы бадӟым тау шуэме потэ Раиса Моториналы. Соку со Дэриысь гурт удысъя управлениын валтӥсь бухгалтер луыса ужаз. Со вакытэ милям эшшо кыкез нылъёсмы, Оля но Мария, вордскемын ни вал. Соосты Володя пыд йылазы ӝутӥз, шуыны луоз ини. Ма, ми соин котьку ик ог-огмес валаса, одӥг-огмылы оскыса но юрттыса улӥмы.

1990-тӥ аръёсы улон тӧл шуак-дуак мукет пала пельтӥз — совхозъёс но колхозъёс куашканы ӧдъязы. Ужасьёслы уксё ӧз тыре ни. 1994-тӥ арын, 22 ар ужамез бере, Зоя Михайловна но яратоно интыысьтыз кошкиз — городэ «Удмуртэнергое» интыяськиз. Татын но со 20 ар ӵоже бухгалтер луыса ужаз.

Лыдпусъёс бордысь — кырӟан котыре

Городын ужакуз, Зоя Михайловна Пероггуртысь кырӟаны-вераны яратӥсь нылкышно эшъёсыныз «Кырӟась сюлэмъёс» ансамбль кылдытъяз вал. Но солы пушйыны  ӧз кылды. Мылкыдыз, трос аръёс ортчыса но, ӧз сӥя. Пероггуртысь «Кильтырнаос» ансамблен кивалтӥсь Евгения Мохова эшъёсыныз ӵош Зоя Михайловналы вазиськем: «Мон тынэсьтыд шутэтскыны потэмдэ гинэ возьмаса улӥсько ини. Арлыды бадӟым, тырмоз ужаны, коллективеным кивалтыны басьтӥськы вал». Евгения Григорьевна  26 ар кивалтӥз «Кильтырнаосын». Зоя Михайловна кепыраса но мар кутскем та уж борды. Нош туэ оштолэзе коллективын кырӟась нылкышноослы Мордовиын ортчись фестивале вуылыны шуд усиз. Отысь 2-тӥ степенё дипломен бертӥзы.

— Фестивальын паймизы милям вашкала кырӟанъёсмылы, — шуэ Зоя Михайловна. — Пероггуртын сяна, соосты нокытын уг кырӟало. Пӧлаз трос ӟуч кылъёс пыртылэмын. Ми та пумысен тодосчиосын но кенешим. Но соос шуизы: кырӟанды вашкала дырысен возиськем ни бере, со бордын ик тунсыкез. Гуртты городлы матын ук, ӟучъёс вӧзын улӥськоды, кырӟалэ озьы ик, кызьы вань.

«Кильтырнаос», сьӧр-лотӥ асьсэды возьматыса  гинэ, уг ветло, доразы но куно ӧтчало. Алигес Пичи Пурга ёросысь Выль Мӧнья гуртысь «Выль ӟардон» коллектив ветлӥз. Соосын ӵош шур дурын ӝук пӧзьтыса сиизы, шутэтскон дырзэс пайдаё но туж тунсыко ортчытӥзы. Таӵе пумиськонъёс нылкышноослы улоназы оскон но кужым сёто. Огинын котькыӵе куректон-шумпотонэз капчи вормыны, шуо.

— Жаляса верано, милям со быдӟа гуртамы культура юртмы ӧвӧл, — сюлэмшугзэ кисьтэ Зоя Ушакова. — Пырак кытын люкаськыны ик ёрмиськом. Пыртосъёс кадь улӥськом. Тодмо адямиосын пумиськонъёс радъялляськом, соосын но кытын сюрем отын пукиськом.

Ӵем дыръя Зоя Михайловна эшъёссэ дораз пумита. Ушаковъёслэн улон корказы вӧл-вӧл, ваньмызлы инты тырме. Владимир Васильевич Зоя Михайловнаезлэн эшъёсыз доразы лыктэмлы ноку уг уродъяськы, сямыз лякыт. Со котьма ласянь Зояезлы юрттыны дась. Руль сьӧраз пуксе но нылкышноосты кытчы кулэ, отчы вуттэ. Владимир Васильевич арганчи но.

— Газет пыр шумпотонме вераме потэ, — шуэ Зоя Михайловна. — Туэ Гужем юонэ Итэш гуртам ӧтчазы —  отын бадӟым праздник ортчытӥзы. Шумпотӥсько, сьӧрло кошкемъёсты но вунэтӥллямтэ. Туж шулдыр пуким. Кӧня калыкен пумиським! Бадӟым тау шуэме потэ ужрадэз радъясьлы — Майя Титовалы. Со озьы вань калыкез ӝутканы быгатӥз. Но одӥгезлы кӧты ӝож луыса кошки: соослэн но, милям сямен ик, люкаськон интызы ӧвӧл — клубзы ворсаськемын.

Любовь Тихонова

Удмурт Дунне
By Удмурт Дунне 28 июля, 2016 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<