Нюлэс ныл

Удмурт Дунне
By Удмурт Дунне Июль 23, 2016 16:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Василий Ушаков, Елена Панфилова

Егитъёслы но мӧйыослы туала крезьгуро выжыкылысь люкет

ШУДӤСЬ МУРТЪЁС:

 

Матӥ — нюлэс ныл, пелляськись,

Мардан — карысь егит пи, со ик Натан,

Быдӟым туно — шоро-куспо аресъем воргорон,

Нюлэс лулъёс — егит нылъёс.

 

Нюлэс куш. Шулдыр кырӟало тылобурдоос. Соослэсь кырӟамзэс куспетӥ каре гумылэн шудэм куараез. Улонниысьтыз потэ Матӥ, кылзэ гумылэсь шудэмзэ но ӝогак ватске писпу сьӧры. Гумыен шудыса, потэ Натан. Вылаз тӧдьыалэс дэра дэрем, штаниез но сыӵе ик, пыдаз кулэсь вурем вакчи сапег. Ымнырыз сайкыт, чебер.

Натан шудэмысь дугдэ, турын вылэ выдэ, тылобурдоослэсь чирдэмзэс кылзэ. Нюлэс лулъёс — нылъёс — пото. Одӥгез, пи доры лушкем мыныса, солэсь нырзэ будосэн бичатэ. Натан султэ, серекъясь нылъёсты адӟыса, сьӧразы уйиське, кутыны турттэ. Нылъёс, пиез гочатыса, нюлэскы пегӟо, Натан — бӧрсязы. Писпу сьӧрысь потэ Матӥ.

МАТӤ.

Мар луиз монэн таӵе?

Уг валаськы ни асме…

Адӟисько ке Натанэз,

Мугоры либра быдэс,

Пӧсь тулкымъёсын ӟырда,

Сюлэмы гыа, гыа…

Яратӥ, оло…

Яратӥ…

 

МАТӤЛЭН КЫРӞАНЭЗ.

Кызьпу шудэ куарен,

Берга-берга парен,

Нош мон понна сике

Выльысь кадь вордћське.

 

Куакъёс пӧлысь уӵы

Гурзэ мытэ, уд ӵыд,

Но сюлэмы мӧзме:

Потэ яратэме!

 

Жильыр вазись шуре

Азьвыл сямен бызе,

Нош мон понна дунне

Выльысь кадь усьтӥське!

 

Матӥ улоннияз пыре. Куше бызьыса Нюлэс Лулъёс вуо, соос сьӧры уйиське Натан. Нылъёсты кутыны выре, но уг быгаты. Матӥ коркасьтыз потэ, кияз е борды юнматэм пӧйшуран пурт.

 

НЫЛЪЁС.

Катьяськид, Натан, юнмад,

Казакпи луид чылкак!

Дась-а тон сузэрмес кылзыны,

Куронзэ солэсь быдэстыны?

 

НАТАН.

Пушкам виры шумприч шудэ,

Дарт кужымен тулкымъяське!

Мылкыд уртче, сюлэм тэтча —

Аслыз ялан маке утча!

Вань куронзэ мон быдэсто —

Ворсам ыбесъёсты усьто!

 

МАТӤ.

Адӟисько: зэмос воргорон,

Лулыд чылкыт, синмаськымон.

Дыр вуиз астэ возьматыны:

Келяськом тонэ пӧйшураны!

 

Нылъёс келян гур мыто. Пӧйшуран пуртэн еэз пилэн кусказ бырттыса уг вуо, олокытӥ-мар, оло нош музъем улысь, потэ Быдӟым Туно. Кияз боды. Вылаз сьӧд костюм, плащез — сьӧд чилясь. Гадяз сьӧд пусэз ошемын.

 

ТУНО.

О, ӟечбур, мусо Матӥ!

Тонэ уд но тодма ни…

Музъемозь йыбырттӥсько,

Мур гажамме верасько…

 

Йыбырттэ.

 

МАТӤ.

Ӟечбур, Быдӟым Туно,

Аслыд но йыбырттӥсько.

 

Йыбырттэ. Собере палэнскем нылъёслы, Натанлы вазиське.

 

Кельтэ милемыз огнамес,

Ӧтё на бӧрысь ваньдэс…

 

Нылъёс еэн пуртэз ошо юбое но Натанэн ӵош нюлэскы ышо. Матӥ улоннияз пыре.

 

ТУНО.

Кыкетӥ синмы пӧямтэ:

Матӥ, пе, утиз вордостэ.

Зол ик сое со воштэм,

Тодманы луонтэм карем…

Кхе…

Аборигенлы пӧрмытэм…

 

Матӥ чаша поттэ, Тунолы юон сётэ. Соиз чаша вадьсаз маке сипыртэм, пеллям каре но юэ.

 

ТУНО.

Туж ческыт…

Берлозэ бен ку ай нош

Адӟиським вал асьмеос?

А-а, анайдэ ватыку,

Пыраклы люкиськыку.

Эке-ке…

Со дырысен будэмед,

Зэмос пеллясь луэмед,

Кулон калэ вуэмзэ но

Пыд йылаз султытэмед.

 

Нош малы-о весь татын,

Улӥськод гондыр кушын?

Кулэ ке, ачим тонэ

Интыяло мон каре…

 

МАТӤ.

Тау, мыным умой татын,

Уг пот улэм из карын.

Нош ачид кыӵе муген

Кушамы вуид ай бен?

 

ТУНО.

Тау карем тыныд потэ:

Улӟытӥд, эмъяд пиме…

 

МАТӤ.

Кызьы: со тынад пиед?!

 

ТУНО.

Бен, мынам со вордосэ,

Ӧд тодылы шат тае?

 

МАТӤ.

Тодӥсько вал: вань пиед…

Паймымон кылдэ суред:

Мур нюкысь шедьтэм маке

Тунолэн пиез луэ…

 

ТУНО.

Бен, мынам со осконэ!

Тау, утид ай Марданме.

Со понна тани уксё —

Басьты аслыд котьма но!

МАТӤ.

Кулэ ӧвӧл мыным коньдон —

Зарни сярысь ӧй малпа мон!

 

ТУНО.

О-о! Анаед кадь вылэмед —

Вылтӥяськись будэмед!

Но…

 

Укыр сьӧраз ӧд ортчы-а?

Малы пилэсь улонзэ

ӵушылӥд тон вичаксэ?

Ортчемзэ вунэтытӥд —

Малы озьы дауртӥд?

 

Вашкалаос веразы визькылэз:

Ортчемезтэк уз лу азьланез!

 

МАТӤ.

Лулпушсэ чылкыт карытэк,

Ӧй улӟысал вордос пияшед!

Соин азьлозэ ӵушылӥ —

Вань уродзэ сэрпалтӥ!

 

ТУНО.

Нырысь пыриськыса, собере чурыт.

 

Я, я, оскисько, дыдые…

Тон лэсьтӥд ни, Матӥ, ас уждэ!

Мон кутско со борды табере,

Выльысь берыкто ӵушемзэ!

Азьло улоназ нуо — каре!

 

МАТӤ.

Вазь на солы тодыны ортчемзэ,

Эн дырты, эн ну палэнэ!

Бергатоз, лекатоз кар улон,

Нош ик шедьтоз пияшез бырон!

 

ТУНО.

Уг сёт эзельлы мон сое —

Сьӧраз ветло вошъятэк синме.

Мардан нюке шедён азьын

Изён эмъюм удӥллям мыным,

Соин ӧй шӧды пилэсь ышемзэ,

Кион кадь сак луо табере!

 

МАТӥ.

Нуны сюан пыр потӥз ни со,

Нимыз но выль — Натан шуо.

Инмар пусйиз бере пизэ,

Уз сёт ни пожаны лулзэ!

Ортчем улонзэ усьтӥд ке но,

Оскисько, шуоз: «Татчы кылё!»

Я бен, ӝамдэлы коть ӧтё…

 

Матӥ кошке. Туно, отчы-татчы ветлыса, лек серекъя.

 

ТУНО.

Уз мыны, пе, да эшшо бызёз!

Та нюлэстэ тёпак вунэтоз!

Лулыз понна сюлмаськем каре,

Уд пӧя: яратӥськод вордосме!

Соин ик керӟег выриськод сыӵе.

Э-э, тон понна шат сое будэтӥ,

Вань улонме жалятэк сётӥ?!

Ӧвӧл, Матӥ,

Марданлэн мукет адӟонэз!

Эн ик малпа, уз бырйы пие та тэлез!

 

Натан вуэ. Ог-огзы шоры учкыса, кӧня ке сыло.

 

ТУНО.

Озьыен, Натан шуиськод астэ?

Уд тодӥськы воксё азьло нимдэ?

 

НАТАН.

Уг валаськы: мар верамды потэ?

 

ТУНО.

Ӝоген валалод ни ваньзэ,

Тау карыса, йыбырттод азе.

Мон эшед тынад, юрттӥсед.

Матэгес кариськы ай, пие…

 

Натан дораз лыктэ.

 

Я, эн шугъяськы тон сокем,

Кар вылтырдэ кынартэм…

 

Натанлэн кымесаз киыныз шлач! шукке. Синмаз учкыса ик, шораз кеське.

 

Таре весяк учкы шорам;

Кынь синдэ но вера шара:

Мае адӟиськод?!

 

Туно Натанлэн йыр котыртӥз киосыныз шона.

 

Вера: мае адӟиськод?!

 

НАТАН.

Выжыкылысь дворец кадь чебер корка,

Сьӧд йырсиё нылаш креслоын лэйка…

 

ТУНО.

Кызьы вазиськод солы? А?

 

НАТАН.

Алина…

 

ТУНО.

Нош со тыныд?!

 

НАТАН.

Мардан…

 

Туно пилэн син азьтӥз киыныз огпол шонтэ, соиз синзэ усьтэ.

 

ТУНО.

Озьы уго, Алина — тынад дусымед,

Сюсьтыл кадь веськрес туганэд.

Зэмос нимыд нош — Мардан!

Тодад вайиськод-а, мар вал?!

 

НАТАН.

Мардан… Бен, куке но мон вал…

 

ТУНО.

Чильк-вальк дворец со — тынад!

Коньдонэд банкъёсын — тачак!

Карысь туж узыр адями —

Тон со, Мардан! Валад-а ни?!

 

НАТАН.

Зэм-а, даур-а, тӧдь бус кадь толӟе,

Мон валаны кутскисько… Ма таӵе?!

 

Пеллясь нош ик пилэн йыр котыр-тӥз шона.

 

ТУНО.

Эшшо адӟиськод на мае?

Вера, Мардан, ваньзэ!

 

НАТАН.

Алиналы дуно чигвесь кузьмасько…

Вордскем нуналаз озьы ӟечкыласько.

Тау карыса, мытэ со шулдыр кырӟан.

Сыӵе куараез чебер — зэмос марӟан!

 

Бус вӧлске. Возьматске Алина. Со сьӧры йӧспӧртэм туала дӥсен нылъёс пото. Алина кырӟа, нылъёс гольтрес экто.

 

АЛИНАЛЭН КЫРӞАНЭЗ.

Куке мон нырысьсэ тонэ адӟи,

Тук-тук кариз сюлэм: ой, синмаськи!

Ымдуръёсыд сыӵе кыско дорад,

Я ӟыгырты ӝоггес — луо тынад!

Тук-тук-тук сюлэм каре,

Мугоры тонэ куре!

Ӵошен позыръяськом ми уй клубын,

Турлы-турлы пиштӥсь тылъёс улын.

Монэ бордад ӝиптод тон вань кужмысь,

Чупаськыса эктом мылысь-кыдысь!

Тук-тук-тук сюлэм каре,

Мугоры тонэ куре!

 

Алина но эктӥсьёс ышо. Бус пуксе. Натан йыр бордаз кырмиське, ӝуштэ.

 

ТУНО.

Мар тонэн, Мардан?

 

НАТАН.

Ойы-ы, йыры…

Пилиське ни со мынам!..

 

Туно пияшлэсь йырзэ посэ.

 

ТУНО.

Ортчиз-а?

 

НАТАН.

Бен…

 

Туно нош ик пияшлэн йыр котыртӥз киосыныз шона.

 

ТУНО.

Таре адӟиськод мае?

 

НАТАН.

Номыре…

 

ТУНО.

Эн танӥськы, вера зэмзэ!

 

НАТАН.

Алинаен чебер вальс эктӥськом,

Огмес огмы туж мусо чупаськом…

Сьӧсь ымныръёс шуак-дуак пыро,

Монэ погырто, киме думыло,

Позыръяса кытчы ке но нуо,

Машинаын на кема зуркато…

Вутто нюлэскы…Мур нюкын ыбо!..

 

Туно Натанлэн син азьтӥз киыныз ортче. Натан синъёссэ усьтэ.

 

ТУНО.

Туннэлы таин тырмоз,

Ато йырыд сураськоз.

Тыныд вожъяськись Горд Чарлан

Сыӵе лушкем йыруж пӧрам.

 

Натан воштӥське, Мардан луэ.

 

МАРДАН.

Чарлан?! Мынам ӟеч юрттӥсе?

Озьы дауртӥз шат эше?

 

 ТУНО.

Тонэ быдтыны Чарланлы

Керемет косӥз — пыраклы!

 

МАРДАН.

Ачиз эксэй Керемет?..

 

ТУНО.

Укыр кужмо, узыр луэмед,

Люкетыны солы кутскемед.

 

МАРДАН.

Нош Чарланлэн кызьы-о монэ

Быдтыны киыз ӝутӥське?!

 

ТУНО.

Адями дунне валантэм —

Ляб интыез вань котькинлэн…

 

МАРДАН.

Нош мар Алинаен?

 

ТУНО.

Алина вордскем гуртаз

Ватскиз атыкай юртаз…

Тыныд али ик бертоно каре,

Кереметэз серметано таре!

 

МАРДАН.

Мон дась! Мон бугырто ваньзэ!

Кереметэз ассэ вутто нюке!

 

Бызьыса кошке вал ни но дугдэ. Натан луыса берытске.

 

НАТАН.

Сыл ай, нош Матӥ?!

 

ТУНО.

Мар Матӥ?..

 

НАТАН.

Со монэ эмъяз, утиз…

 

ТУНО.

Ма, Матӥ — со пелляськись,

Аслэсьтыз ужзэ лэсьтӥз!

 

НАТАН.

Ӵок, озьы ке но татын

Сыӵе умой вал мыным!

Сяська но турын-куар пӧлын

Гадь тыр шокай, улӥ эркын!

Тылобурдо, пӧйшур кылэз —

Мон валаны кутски тэлез!

Чылкыт гажан ӝужаз сюлмам,

Доре татын ини мынам!

 

ТУНО.

Иське, Керемет сьӧсьяськоз,

Вирзэ калыклэсь сюпсёз,

Нош тон татын куаныса

Улод инкуазьын пегӟыса?!

Соку… Лу тон нюлэс нумыр!

 

Пияш вожоме, Мардан луэ.

 

МАРДАН.

Сыл, Туно, эн дырты укыр!

Вазь на нумырлы пӧрмыны!

Мон — Мардан! Дась сьӧрад мыныны!

Виры пӧзе, тылын гома —

Кереметэз бырон возьма!

 

ТУНО.

О! Улӟиз азьлоез Мардан!

Сюлэмыз, мылкыдыз — андан!

 

Палэнын кылӥське Нюлэс Лулъёслэн ӵашетэмзы.

 

Матӥ лыктэ…

Ӝогак мын тон сюрес воже,

Отын сьӧд машина сылэ,

Дырты, ширты, Мардан, каре!

 

Туно Марданэз келя, ачиз юбо сьӧры ватске. Матӥ но нылъёс пото, пиез утчало.

 

МАТӤ.

Кошкиз ук, лэся, Натанэ,

Ой, сузэръёсы, юрттэлэ!

Ӧвӧл лэзёно сое каре —

Син азяз вотэс золъялэ,

Берен куше берыктэлэ!

 

Нылъёс гурласа нюлэскы ышо. Юбо сьӧрысь Туно потэ.

 

ТУНО.

Озьы ик малпай: уд кылзы монэ,

Уд лэзь Марданэз дораз — из каре.

 

МАТӤ.

Бен, Быдӟым Туно, уг пот лэземе,

Шимес шӧдон пачкатэ сюлэмме.

Адӟисько: Натан вал вылын пуке,

Паськыт выж кузя азьлань со ворттэ.

Но инме кыстӥськись выж — ӝыныё!

Кин ке куашкатэм сое юромо!

Кесяськисько: «Сыл!». Уг кылы Натан,

Эшшо но ӝоггес ворттэ со азьлань!

Валлэн пыдъёсыз ошисько омыре —

Усе егит пи мур коже но быре!

 

ТУНО.

Нош мынам чылкак мукет адӟонэ:

Мардан — ожгарчи, Кереметэз ожалтэ,

Ӵапак со понна будэтӥ вордосме!

Эксэй двореце ни пие каръяське,

Отын чеберай нылашен вешаське!..

 

МАТӤ.

Кереметэз вормоз, шуиськод-а?

Оло, зэм но, озьы малпаськод-а?

Убир пумит уз тырмы кужымез,

Сюлэм юнме уг шӧд ук адӟонэз!

 

ТУНО.

Тырмоз, Матӥ, юнме супыльтыны!

Ӟечкын мон курисько: эн люкеты!

Али ик берыкты сузэръёстэ,

Медаз алекмытэ вордос пиме!

 

МАТӤ.

Уг берыкты, Быдӟым Туно!

Адӟонъёсы котьку зэмалляло!

 

ТУНО.

Иське, санэ уд басьты куронме?!

 

МАТӤ.

Я, жаля ук тон вордостэ,

Кужмысь эн кыскы со выже,

Быроз токма. Соку дыре

Кинлы вазёд на ай: «Пие…?»

Ачид адӟид: татын солы

Кельше инкуазь пӧлын улны.

Сюлворисько, Быдӟым Туно,

Эн басьты пияшез сьӧрло!

 

ТУНО.   

Сыӵе шугъяськиськод, Матӥ?

Оло, сое тон яратӥд?

 

МАТӤ.   

Уг танӥськы: бен, синмаськи,

Ас нылпиме кадь яратӥ.

Солы ук мон синзэ усьтӥ —

Та дуннее выльысь вордӥ!

Уг сёт бордысь ишкалтыны,

Уг сёты, уг, лек адӟонлы!

 

ТУНО.  

Тӥни кызьы?! Быдӟым Тунолы

Тон дӥсьтӥськод мытылыны?!

Тань возьмато мон кужымме,

Сотэк уд басылмы, шӧдске…

 

Туно сьӧд пуссэ Матӥ шоры берыктэ. Пус тылын пиштыны кутске. Матӥ чигна, собере сюлэм бордаз кутске, музъем вылэ лэзьке. Кызьы но озьы ӝутэ тӧдьы пуссэ, Туно пала берыктэ. Пусэз тылын ворекъя. Витьымтэ шорысь Туно ас пуссэ лэзе, интыяз берганы ӧдъя, собере, туж шӧтэм черектыса, нюлэскы палдэ.

 

МАТӤ.   

Остэ шу… Зэмзэ шат ворми?

Быдӟым Туноез палдытӥ?!

 

Кинлэсь ке лыктэмзэ адӟыса, ва-тӥське. Мардан потэ.

 

МАРДАН.

Мар адӟон та?  Матӥлэн кушез?

А-а-а, озьы со пӧртмаське,

Кошкыны уг лэзь монэ!

Эй, Матӥ, лык ай азе,

Бќтьыртэм тонэн потэ!..

 

Матћ потэ.

 

МАТӤ.

Мар ке луиз-а, Натан?

 

МАРДАН. 

Мон Натан ӧвӧл — Мардан!

Туно валэктӥз, ярам.

 

Матӥлэсь кизэ кутыса, кӧкы пуконэ пуктэ.

 

Тыныд нош тау утемедлы,

Коньдон но дась мон сётыны,

Но курисько али огзэ:

Син азьысь калты вотэстэ!

Ӟечкын ик лэзь, берто доре!

 

МАТӤ.     

Мон чик уг возиськы тонэ,

Мын, кошкы, сокем ке потэ…

 

МАРДАН.

Кошки вал, ӧз лу потэме,

Олошай-а кугӟай та тэле?!

Матӥ Мардан киысь мозмытске.

 

МАТӤ.    

Сюлмыдлэсь юано, дыр, созэ,

Со шӧдоз но усьтоз малызэ…

 

МАРДАН.       

Мар тыныд мынам сюлэмы?

Пӧрмемын кемалась со йӧлы!

 

Матӥ сьӧры уйиське но кутэ сое.

 

Оло, сокем тыныд кельши,

Бордысьтыд уд лэзиськы ни?

 

Бордаз ӝиптэ.

 

Оло, лушкем малпанъёсад,

Мон бергасько уйвӧтъёсад?

Оло, вӧзад шальы кулэ?

Озьы ик шу, со дась — сылэ!

 

Матћ мозмытске.

 

МАТӥ.  

Кызьы дӥсьтӥськод тон озьы малпаны,

Юрӟым кылъёсын омырез саптаны?!

 

МАРДАН.

Дӥсьтӥсько уго! Мон — Мардан!

Котькытын мыным сӥ но дан!

 

Мардан нылашез кутэ, музъем вылэ погыртэ. Матћ мозмытскыны турттэ.

 

МАТӤ.  

Мар дауртӥськод?! Визьмаськы!

 

Витьымтэ шорысь Матӥ пумитъяськемысь дугдэ.

 

МАТӤ.   

Я, сыл ай, эн дырты юнме,

Ачим сётско, басьтод монэ!..

 

Нылъёс кошко, Матӥ лусьтро нюлэс дӥськутсэ куштэ. Воксё гольык кыле. Мардан Натанлы берытске, йыр бордаз кырмиське, музъем вылэ погра, погылляське, кесяське.

 

НАТАН. 

Вӧсь! Кыӵе вӧсь!..

Мар таӵе монэн, Матӥ?!

Чидаме уг луы ни:

Лек тыл сутэ сюлэмме!

Нумыръёс сюпсё пушме!

Зэм ик-а Мардан со — мон?!

 

МАТӤ.   

Тон — Мардан но тон — Натан,

Соос котьку артэ уло…

 

НАТАН. 

Малы соку ваче вуо?!

Вань лулпушме кесяло!

 

МАТӤ.   

Быдэс улон сыӵе уга —

Сьӧд но тӧдьы вискын берга…

 

НАТАН. 

Аслым ачим мон синазькыль —

Пушкам бугыръяське черкыль!

 

Юбо борды ошем пуртэз кутэ.

 

НАТАН. 

Быдто мон Марданэз, виё!..

 

МАТћ.   

Соин ӵош быдтод Натанэз…

 

НАТАН.

Кыӵе аслым мон акылес,

Сыӵе улон укыр шимес!

 

Пуртсэ љутэ...

 

 

Пьесалэсь быдэс текстсэ шедьтыны луоз «Удмурт дунне» газетлэн редакциысьтыз.

Удмурт Дунне
By Удмурт Дунне Июль 23, 2016 16:12 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<