Н. Михайлов. Люгымурт

Удмурт Дунне
By Удмурт Дунне Июль 5, 2016 16:01

Н. Михайлов. Люгымурт

Верос

Вӧлдэтысь кыӵе ке сьӧд сульдэр шоры синме вошъятэк учкыса, валесам кыллисько. Мае ке тодам вайытэ кадь со пичи суред. Йырвизьмам бугыръяськыны кутски но, син азям пуксиз, кызьы эше куке но тазьы ик валес вылысь шуак пыд вылаз тэтчиз но суредаз сое. Эше вераз: вӧлдэт укыр тӧдьы но огшоры, синлы нокытчы кугӟаны. Собере сьӧд карандаш кутӥз но кырыж-мерыж суред лэсьтӥз. Мар суредад юамелы, та, пе, мынам портретэ. Но мон ӧй адӟы отысь туссэ. Мон понна со сьӧдмам суред бадӟым городысь из коркаослэн липетъёссы кадь йӧтӥз. Тылобурдо вылӥысен адӟе ке пурысь кармес, город солы тӧдьы вӧлдэтысь сьӧд гожмам вишты кадь гинэ потэ, дыр. Мон уг яратӥськы карез. Отчы эше чортэмея гинэ потӥсько. Но али со вӧзам ӧвӧл, таблетка юэмелэсь азьло со, мугзэ вератэк, кытчы ке но кошкиз. Малы мон юисько таблеткаос? Уг тодӥськы ачим но. Анай-атае котькуд нунал юыны косо, озьы, пе, мон визьмогес луо. Но мон сотэк но туж шузи ӧвӧл кадь, малы ке уг оскиськы анай-атаелы.  Соос мынам умоесь, но ӵем ог-огзы шоры кесясько, азьло мыным со туж сюлмам пыре вал, нош али дыши ни.  Анае ялан бӧрдэ, уг ни чидаськы шуыса, тани али но со вера: «Кӧня мыным чидано на? Келяно сое больницае!» Нош атае лӥятэ сое, но куддыр ачиз но уг чида, лек черекъя.

qKPBgRGrrEo

Огпол мон доры вуылӥз врач, эше сярысь юалляськиз. Малы ке но анай-атае но, врач но уг оско, мынам эше вань шуыса, ялан валэктыны туртто, сое, пе, йырвизьмы кылдытӥз. Но мон сое адӟисько но, кылӥсько но… Азьло эше ӵемгес вуылэ вал, но татӥяз ӧз ни. Валасько, мон сяна но ужъёсыз вань, дыр. Но малы ке мӧзмыт.

— Ӟечбур! Мар-о ӝожомид?

Вуиз! Йырме берыктӥ укно пала но, зэм ик, со укно дурын пуке. Чиед мугоро, ымдуръёсыз котьку сямен серемес мыняло.

— Привет. Суреддэ учкисько вал.

— Огшоры гинэ суред, мон тыныд шуо… — ымнырзэ кисыртӥз эше.

— Мыным кельше, — мынектӥ.

— Кошким поръяны, ма валесад зынмиськод?

— Уг, туннэ ӟигары ӧвӧл.

Шорам вылӥысен кадь учке:

— Мыном, шуи.

— Нырысь вера ни мыным, кин тон. Малы тонэ, мон сяна, нокин но уг адӟы. Олокытысь кылдӥськод но соку ик чиптэм-чаптэм ышиськод. Тыныд луыса монэ визьтэм шуо, кӧш таблеткаосты юыны косо. Со эмъюмлэсь мынам йыры жон-н каре ни. Врач толон, тон улэп ӧвӧл, шуиз, нош али мон шорад учкисько, бордад но йӧтскыны быгатӥсько.

— Хмм… — эше малпаськонэ усиз.

— Малы тон ноку но та юанэлы уд вераськы?

— Я, буйгатскы. Мон зэм ик кулэмын. Но кызьы тыныд умойгес валэктыны… Мон кулэмын, но та дуннелэсь быдэсак люкиськеме уг луы. Со эмъюмъёс тынэсьтыд йырвизьдэ зэм ик сузяллям кадь.

— Тон, тон.. Кызьы «та дуннелэсь быдэсак люкиськемед уг луы»?

— Асьмеос эшъёс вал ук, тон вунэтӥд-а? Мон туж зол тонэн герӟаськемын, соин  ик отчы, вылӥе, — чиньыеныз инме возьматӥз, — тубеме уг луы.

— Соин тонэ кулэмын шуо-а?

— Бен, шудтэм учыр бере ваньмыз понна мон кулӥ, нош тон монэ уд лэзиськы.

— Эн ни вера номыр но, — ньылонам мар ке кугӟаз кадь, — уг пот кылзэм!

Кыре потӥм, огшап шып улэммы бере эше кутскиз мадьыны.

— Мон вуылӥ отчы, вылэ. Уг яра отын мыным. Тыныд вераны уг яра ке но, верало, вылӥын кыӵе ке лек уж лэсьтыны медо. Кылчинъёсты косэмын музъем вылысь калыкез воштыны, ваньзэс кароно огкадь, мед луоз быдэс музъемын одӥг кыл, одӥг калык. Озьы, пе, калыкъёс куспын ожъёслэсь но тэронтэмъёслэсь утиськыны быгатом. Кылдытозы, пе, вань кылъёсты огазеяса, огъя кыл, уз луэ ни пичи калыкъёслэн нимысьтыз вераськетъёссы но. Адями, пе, кылыныз кужмо луоз. Но мон пумит та йќспӧртэм малпанлы.

Мон эше шоры кема паймыса учки. Уг оскиськы шуыса, валатӥськиз но косӥз монэ синъёсме кыньыны, асме пичи но капчи арбериен шӧдыны.  Ворсай синъёсме, мон пичи кузьыли, котькин монэ лёгыны быгатэ, пыдъёсме ишкалтыны, мон капчи, тӧллэн веттамезъя лэйкасько… Шуак зэм ик тӧлъя лобӟи кадь. Синме усьтӥ но мугорылэсь люкиськемме адӟи. Секыт мугоры турын-куар пӧлы усиз. Кыдёкысен, кин ке умме усем, малпалод. Нош ачим тубисько, тубисько, тубисько. Вӧзам эше серекъя, пыдыныз выретэ.

Сюлмы буйгатскытозь, кыӵе ке капкаос доры вуим.

— Та рай-а?

— Ӧвӧл, та рай но, ад но ӧвӧл, — серекъяз эше, — соос ӧвӧл.

— Но милемлы верало ук, анай-атае но пичи дырысен мадьылӥзы соос сярысь.

— Ваньмыз со адямиез аслэсьтыз ик утён понна малпамын. Тодысал ке со, кулэмез бере нокыӵе адэ уз сюры шуыса, эшшо но тросгес йыружъёс лэсьтысал, дыр. Адями черке ветлэ но вӧсяське ке, кылчинъёс соосты сокем уг чаклало ни.

— Нош мар каро со кылчинъёс?

— Адямилэсь улонзэ гожъяло, куддыр, кыӵе ке киноез кадь, вылӥысен учкыса уло. Тӥни ачид учкы, но шыпыт, асьмемыз медаз адӟе.

Ми кыӵе ке висъетэ пырим. Паськыт экранъёс сьӧрын кылчинъёс пуко.  Соос сак эскеро музъем вылысь кузьыли карын кадь бугыръяськись, бызьылӥсь адямиосты. Кыӵе ке но гань-гань, ас дуннеяз усем кадь пуке котькудӥз кылчин. Соослэн мугорзы татын, нош малпанъёссы олокытын кадь. Мукет висъетэ пырим.

— Тани со, учкы шыпытак.

— Нош адӟизы ке, мар луоз?

— Хе, монэ жаг турынэ, нош тонэ берен музъеме ял карыны келялозы, — ӝӧк доры мынонъяз серемпыр вераз эше.

Татын бадӟым котрес ӝӧк, вылаз трос гожмам кагазъёс, калыкъёслэн нимъёссы, кылъёссы но лыдпусъёссы. Куд-ог кылъёс вылтӥ горд гож лэземын. Мон лыдӟыны кутски: ӟуч, англи, эстон, хинди, латынь (гордэн пусъемын), пор, хидиш, удмурт… Удмурт. Нош малы ӝыныё горд гож лэземын. Кин ке гожтыны кутскем но, пусъён куспаз карандаш йылыз чигиськем кадь. «Мурт» люкетыз гордэн гожмалтытэк кылем.

Шуак дыбыртэм кылӥсь-киз.

— Мар тӥ татын кариськоды? Малы со «пегӟем» татын? Малы со, музъем ужзэ быдэстымтэ мурт, татын?

— Кыӵе «музъем уж»?

— Улыны!

— Татчы лушкемен пыремды понна тӥледыз вылӥ судын кыл кутытозы…

Вӧлдэтысь кыӵе ке сьӧд сульдэр шоры учкисько, борддор сьӧрын анае бӧрдэ. Мар ке но татын уг тырмы кадь шуыса, учкисько тӧдь-тӧдь вӧлдэтэ. Тодам уг лыкты. Анае больницае жингыртӥз но, монэ лулпуш висисьёслэн больницаязы келязы. Мудрон кылӥське ук…

Поръяны поттэмзы бере, сюрес дуртӥ ортчыкум, люгыез адӟи. Чебер но, номырин синмаськымон но ӧвӧл кадь. Выжытӥз порыса, пичи тусе сое мерттӥ.

Тани кык ар ни больницаын улӥсько, нокин но дорам уг ветлы. Люгылы ним понӥ — Мурт, уг тодӥськы, мар со сыӵе, но мыным йӧтэ — со кыӵе ке кужмо но бадӟым.

Николай Михайлов

Туспуктӥз Е. Ардашев

Удмурт Дунне
By Удмурт Дунне Июль 5, 2016 16:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<