Можга ёросысь Выль Юбера: Клубзы — ошмес

Удмурт Дунне
By Удмурт Дунне Июль 28, 2016 09:14

Гуртэз возё мыло-кыдо адямиос

Можгаысь Алнаше вуыку, сюреслэн бур палаз сюре Выль Юбера гурт. Со тракт дурын ик интыяськемын ке но, школаез но, лавкаез но, культура юртэз но ӧвӧл.

юбера

Лукоянов кузпалъёс Выль Юберае 8 ар талэсь азьло вуизы.

 

 Кыкетӥ Китай

Ужаны но, дышетскыны но, нянь басьтыны но Коммунае ветлӥськом, шуо гуртоос. Озьы соос нимало сюрес сопалан интыяськем Трактор гуртэз. Александрово муниципал кылдытэт туж ик бадӟым ӧвӧл. Отчы, Выль Юбера сяна, пыро Вуж Юбера, Трактор, Александрово, Юдрук гуртъёс. Трактор но Александрово гуртъёсты висъя нюк гинэ, соин ик адямиос соосты шуо Коммуна.

Выль Юбера гуртэз кыл-дытӥллям Вуж Юбераысь потэмъёс. Нокин уг тоды ни, ку но кызьы соос татчы вуиллям. Угось Граждан ож бере Можгаысь архив ӝуам, озьы гурт сярысь вань документъёсты тылпу ньылэм.

Гуртын прописать каремын 32 адями, но зэмзэ улӥсьёсыз 25 но уз люкаське ни. Нош куке но  колхозлэн шорсюлмыз Выль Юбераын вылэм: контора, почта, покчи классъёсын школа. Ваньзэ тарказы, клубез син азямы кесязы, верало гуртоос. Мар шуод на, 1960-тӥ аръёсы колхозъёсты огазеяны, гуртъёсты бадӟымгес карыны турттӥзы. Озьы пичи колхозъёсты ньылӥзы быдӟымъёсыз, нош ужтэк кылем гуртоос, котомкаоссэс бичаса, бадӟым гуртъёсы кошкылӥзы. Таӵе югдуре шедиз Можга ёросысь Выль Юбера гурт но. Гуртын улӥсьёс, тымет сопалась паськыт луд вылэ киынызы шонтыса, отын кузь ульча вал, шуо.

Никитинъёсын утялтэм Яшка ошмес.

Никитинъёсын утялтэм Яшка ошмес.

— Гурт азьвыл туж бадӟым вал. Калык сое 2-тӥ Китай шуылӥз. Угось Выль Юбераын трос нылпиё семьяос улӥзы, милям классамы гинэ но 12 нылпи ветлэ вал. Нош Вуж Юберае нуись сюресэз Пекинка шуылӥзы, — вера Коммунаысь библиотекаын ужась Людмила Васильева.

Людмила Яковлевна ачиз будэмын Выль Юбера гуртын. Тодаз вае, кызьы совето вакытэ гуртэ коркаос но пуктылыны лэзиллямтэ ни. Нош одӥг семья кылзӥськытэк шур сьӧрысь корказэ выльдэм, али со семьяысь Екатерина Васильевалы 80-лэсь ятыр ни. Выль Юбераын со тужгес пересез, али улэ пиеныз.

Та гуртэ эшеным вуимы. Солэн анаез татын вор-дӥськемын.

— Гуртын сыӵе ӧжыт адямиез, соослы бакчаоссэс но кенераны номырлы, — бакча бертӥ ортчыкумы, вера эше. — Та тымет дурын — мунчо. Ми пичи дыръямы мунчоысь бызьыса потӥськом но прудэ тэтчиськом вал. Нош та льӧмпулэн вайёсыз вылэ ми шудон корка шуккылӥм.

юбера

Яшка ошмес дурын Никитинъёслэн корказы.

Берен берытскон

Чус, ульчаын нокин уг адӟиськы. Но тани милемыз пуны шӧдӥз, солэн утэмезлы пумит капка азе потӥзы Зинаида но Михаил Лукояновъёс. Зинаида Лукоянова Выль Юбераын ик вордӥськемын 1947-тӥ арын.

Картэз Можга ёросысь Поршур черкогуртысь. 8 ар талэсь азьло соос Выль Юбера гуртэ выжыны малпаллям, корка басьтӥллям. Малы бадӟым гуртэз пичиеныз воштӥды шуыса, юаськод ке, Мишагайлэн синъёсыз ик ӝуатско:

— Тани мон укноям учкисько но паймисько, кыӵе дунне татын! Ой-ой-ой: син улам ик 2 тымет, бакча берам бамал, котыр бусы но нюлэс. Татын вордӥськи кадь потко ни.

юбера

Гуртысь тужгес пересез воргорон.

Зэм но, инкуазез синмаськымон. Гурт сюрес дурын ке но интыяськемын, машина куараос бамал но отын будӥсь пужымъёс пыр гуртозь уг вуо. Со бамаллэсь огпалзэ шуо Иншыр гурезь, нош мукет палзэ — Парк гурезь. Нылпиос, пе, татчы  пужымъёс пӧлы шудыны парке кадь ветло вал. Бамал выжыысь потэ Яшка ошмес, нош кыдёкысьгес, Му ньылэм нюлэскысь, ваське мукетыз ошмес. Таос, огазе луыса, Валоез сутыны туртто, пе, со бордысь ик шурлэн нимыз но — Суто. Нош борыез кудмында — бакча бере пот но  коть ведраен омыръя.

Шаерлэн пӧртэм сэрегъёсаз пазьгиськем гуртоос кемалась ик ӧвӧл ошмес дуре люкаськылӥзы. Сыӵе малпан лыктэм Мария Никитиналы.

— Кошкем муртлэн но бертэмез потэ ук, — вера со. — Ма, мон ачим берен бертӥ. Институт бере Можга ёросысь Комаке ужаны мынӥ. Отчы ик бызи. Но кӧня ке улыса, картме вордӥськем гуртам вайи. Ошмес дуре ик корка пуктӥм.

Йӧспӧртэм кенер.

Йӧспӧртэм кенер.

Вераны кулэ, гурт Мария Семёновна вылын возиське. Со калыклы котькуд ар Трочин дыръя шулдыръяськон, ӝук сиён радъя. Никитин семьяен октэм-калтэм Яшка ошмес  луиз Выль Юбера гуртлэн аспӧртэмлыко «клубез», люкаськон интыез.

Мария Семёновна ошмес дурын мукет но ужрадъёс ортчытъяз ни. Кылсярысь, Вормонлы 70 ар тырмонлы сӥзьыса. Выль Юбера гуртысь 53 адями войнае кошкемын, 37-ез бертымтэ. Соосты тодэ вайыса, Мария Семёновна Можгаысь черкын служба ортчытыны курем, собере ошмес дурын ӝук сиён радъям. Мукет дыръя ошмес дуре кышномурт ӵошен дышетскем эшъёссэ чортэм.

Сыӵе кибашлы но визьмо адямиос уло Выль Юбера гуртын. Бен, бадӟым, дано адямиоссы ӧвӧл. Но ӵапак огшоры ужась калык вылын возиське туннэ гурт.

Мария Векшина

Туспуктӥз Чудья Жени

Удмурт Дунне
By Удмурт Дунне Июль 28, 2016 09:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<