Лия Малых. Бур, Паллян но Вужкук

Удмурт Дунне
By Удмурт Дунне Июль 4, 2016 16:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
малых

Лия Малых.

Бадӟымъёслы выжыкыл

Воргорон зынынызы шокчыса, пыдкук возён ӝажые донгиськизы сьӧд туфлиос. Зуркак луэмысь, артэ сылӥсь ӝужыт беро тӧдьы туфли уката кӧдэктӥз, нош вӧзысьтыз бур парезлэн выллань учкись йылсо нырыз уллане лэзиськиз. Тӧдьы апайёс, номыр вазьыны дӥсьтытэк, шыпак сыло. Бур агай  соос шоры  уӵертӥз но юлтошезлы шыпыртӥз:

— Тон котьмар кар, Паллян, нош мон ӵуказе сьӧрад уг мыны, ныры вайяськоз ни  кырыж сюресъёстӥ нуллонъяд.

— Кытчы пырод тон мынэсьтым? Кудпала кожо, отчы ик вамыштод, — мынектӥз Паллян.

Бур  пумитаз номыр ӧз вазьы, нош ас понназ малпаз: «Таяз учыре тонъя уз луы, Паллян».

Коркан чал-чал, омыр гинэ но умме усем, кожалод. Сьӧд вужер интыысьтыз каллен гинэ гылӟиз но мукет ӝажые кечырскиз. Кӧня ке улыса, вужер уллане лэзиськиз.

* * *

Калтыртэмысь уйшор бере вуэмысьтызы, Паллян ӵукнаяз мырдэм сайказ. Вӧзаз сылӥсь юлтошезлэн кӧтурдэсаз мырӟытыса, вушйиз:

— Вырӟим.

Соиз пумитаз пезь-пезь вазиз:

— Ойдо, мон дась!

Ужан доры вуытозязы, Паллян кык пол ӵемтӥз — ярам, юлтошез йыгмыт возиське пыд йылаз, пезьдыны ӧз сёты. Ужын но Паллян  быдэс нунал кисьмам кадь улӥз, ӝыт вуыса гинэ, сэзёмиз. Бамъёссэ небыт сьӧд губкаен зыран сяменыз синъёсыз Бур шоры мырӟиськизы. Огдырлы Паллянлэн кылыз ньылӥськиз кадь, собере паймыса юаз:

— Тон мар кариськод монэн артэ? Кин косыса сьӧрам калъяськид, Вужкук?

— Паньтэме висьыны усемен, ас интыяз монэ ыстӥз, — нокыӵе ӧз кариськы Вужкук. — Туннэ мон тынад палыд. Яратыны уг куриськы, но чидано луод. Нырме, бамъёсме зырӟем карид ке, уката шумпото — бездыт ымныры тонэ но, монэ но дано уз каре.

Паллян, мылыз потытэк, Вужкуклы сьӧд кремен губкаез мычиз но меӵкытӥз:

— Ачид чеберъяськы, ымнырдэ шедьтӥд на ке!

Вужкук чиляны  ӧдъяз гинэ — юлтошез ӟукрак кариз но, интыяз сылыны чидасьтэм ужпи выллем, паллян пала ворттӥз.

— Сыл ай, Паллян, эн дырты. Мон кык ар ӵоже, нокытчы потатэк, пуки пеймыт сэргын, тон сьӧры уйиськыны шоканэ уг тырмы, — тэльмыре Вужкук. — Ойдо паркетӥ кӧня ке ортчом. Ыркыт омырен гадь тыр шокчеме потэ, азьвыл ветлэм интыосылэсь но туж мӧзми.

— Асьмеды… хм, монэ возьмало, отӥяз доре бертыны беромомы. Я, мар кугӟад, вамышты, шуисько!

— Ӧйтӧд, кин кытчы кугӟаз! Олокытӥ ветлӥськод уйшор берозь: Пичикай, бертэмдэ возьмаса ик, умме усиз. Нош Тӧдьыкай сярысь веранэз ик ӧвӧл, со тонэн артэ вамышъямзэ но вунэтӥз ни. Шорад кырыжак учкыны гинэ кыле на мискиньлы. Кытчы сокем дыртӥськод, учкы ай, куазь кыӵе чебер: вож куаръёс ог-огенызы шыпырто, тылобурдоос чирдо. Шундылэн гинэ но пуксемез уг поты, пилемъёс сьӧрысь мынекъя.

— Мед мынекъялоз, мыным мар ке шат. Нош тон, Вужкук, шундыен чималиен шудыны пересьмид ни: пыдпыдэсыд киргалоз я урдэскыд ӵогъялтоз.

— Сьӧрад ке кожи, уз ӵогъялты, малпаськод? Уг, нокытчы тонэн уг мыны, яке огнад калтыртоно луод! — ваменскиз Вужкук.

Мылыз потытэк, Паллян сьӧраз  вамыштоно луиз. Мынон сяменыз ӟукыр-ӟукыр вуӵкетэ:

— Ыжлюгы! Лякиськись турын! Шедиз кытысь ке пыд сьӧлтэт! Мар шуом табере Льӧльыриослы? Бероми ке, пырыны но уз лэзе ни. Огнам ке мынӥ, кыды бертэм, шуозы.

— Мар ке ӧд-тэ вера, Паллян? Оло, доре бертэмед потэ? Мон дась! — кылымтэ  улсы кариськиз Вужкук.

— Марым, мон озьы гинэ, ас поннам бӧтьырасько, — мар вазьыны ыштӥськиз Паллян.

* * *

Паркетӥ ортчон сяменызы Вужкук мылкыдзэ кисьтӥз:

— Татын ми Тӧдьыкаен эктыны яратылӥм. Эх, кыӵе чебер бергаз со вальсын, йыр ик поромылӥз соин артэ!  Театре, киное ветлӥмы  — кыӵе шудо нуналъёс вал со.

— Тӧдьыкай эктӥз? Эшшо ке театре, киное ветлӥз? Тон кинэн ке сураськод, Вужкук. Ку гинэ гуртэ уг бертӥськы ужысь яке командировкаысь, солэн мылкыдыз котьку кунэрес.  Театре, киное мыныны дырыз ноку ӧвӧл, жадемын.

— Тынад Пичикаен шудыны потамед вань-а? Нош кӧлон азяз выжыкыл лыдӟемед?

— Мон ужысь жадьыса бертӥсько.

— Тӧдьыкай но ужаны ветлэ. Пичикаез садике нуэ, басьтэ, магазинъёстӥ ортче, утялске, тыныд сиён дася. Нош тон телевизоре мертчиськиськод яке калтыртэмлэсь уд ваньмылӥськы. Кыӵе шумпотон луоз на отын? Куке но сяська басьтэмед вань-а Тӧдьыкайлы?

— Вордскем нуналэзлы лилиос кузьмай вал — ӧжыт гинэ ас шорам ӧз вуэ. Со дырысен ӧй басьтылы ни.

— Шузи, со сяська зынлэсь Тӧдьыкайлэн шоканэз пытсаське.

— Мон со сярысь вунэтӥ.

— Астэ гинэ тодӥд ке, ӝоген Тӧдьыкайлы но, Пичикайлы но кулэ уд луы. Э-э, вунэтӥськем, тынад льӧльыриосыд вань, горданьёсыд, сьӧдайёсыд…

— Сыл ай, Вужкук, тон паллянэ кожид кадь.

— Тон кожаськод, Паллян, нош мон ветлон сюресъёстэ гинэ тодад вайытӥсько.

— Тӧдьыкаез мон пумит берыктэмед потэ? Уз пӧрмы,  мон сое яратӥсько! — Паллян йылсо нырыныз Вужкук шоры шонтӥськиз но, шӧдтэк шорысь пыд улаз резина туп питыраз, нош со сьӧры бызьыса вуиз Пичи Боти.

— Тынад но тупен шудэмед потӥз-а, дядяй? — шенгыляса вазиз со.

Паллянлэн кылыз ик быгыльмиз, мар вазьыны паймеменыз.

— Нош тон, туп ӵыжаса, пасяськид-а? — Вужкукез адӟыса, юаз Пичи Боти. — Мон но туж-туж яратӥсько тупен шудыны, нош анайлэн монэн бызьылэмез уг поты, атай мукет апай доры кошкиз.

Со куспын Пичи Ботилэн анаез вуиз но этезэ сьӧраз валтӥз.

— Мар ымдэ усьтӥд, Вужкук? Ойдо гуртэ бертом, Тӧдьыкай но Пичикай возьмаса жадизы ни, дыр.

Паллян сьӧры усьтэм ымын вамышъяса, Вужкук ас понназ пальыштӥз: «Табере жуг-жаг куян но монэ уз кышкаты».

Удмурт Дунне
By Удмурт Дунне Июль 4, 2016 16:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<