Курыт пинал дыр

Удмурт Дунне
By Удмурт Дунне Июль 15, 2016 08:34
нэнэй

Нэнэе: мон, пе, тӥляд анайды но, дядяйды но,

Туж дышетскеме потэ вал. Но 7 классэз сяна пырпотыны ӧз кылды, малы ке шуоно пичи вакыты тупаз война но со бере аръёслы.

Мон — анайды но,  дядяйды но

Нырысетӥ классэ ветлыкум, дышетӥсьмы Анна Васильевна шуиз: ӵуказе тетрадьёслы коньдон ваелэ. Бертӥ школаысь, нэнэ дорын ӧвӧл. Коньдон утчай, утчай но ӧй шедьты. Тодам лыктӥз, нэнэелэн уксётӥрлыказ (монисто) соос трос. Уксётӥрлыкез сандыкысь поттӥ но вискысьтыз-вискысьтыз кӧнязэ ке вандӥ. Малпай, нэнэ валаса уз быдты. Нош сямыз солэн туж зол вал: мон, пе, тӥляд анайды но, дядяйды но, озьы шуыса, мыжга вал борддор борды. Анайды, пе, нюлэс кора Ува ёросын. Тӥледыз, шуэ, кин учкоз, мон ужын пеймытысен пеймытозь. Ӵукна уж сётыса кельтоз вал мыным.  Выжез, пе, миськод, азбарез ӵужод, нюлэскы силёлы ветлод. Мон ваньзэ быдэстӥсько вал. Агаез туж ик ӧз ужаты, мыным тросгес сюрылӥз.

Вандылэм коньдонме нуи школае, сётӥ Анна Васильевналы. Со шуиз: уз, пе, мынэ, та вуж копейкаос, вылаз ик, пасямын. Нэнэ кайта нуналаз бертӥз но тетрадьлы коньдон сётӥз. Нош уксётӥрлыкысь вандылэм копейкаосты ӟустарие бинялтӥ но бускельёслэн кыед улазы понӥ. Вуиз Октябрьской праздник. Нэнэелы кытчы ке куное мыноно луиз. Нош со туж кильтырес адями вал. Корт суйпосъёс, уксётӥрлык, йыркерттэт — ваньмыз чиль-дол чиляло. Дӥсяськонъяз йыртэмамме адӟиз но юа: «Кинлэн ужез та, кин тазьы изъянтӥз?» Мон шоры, агай шоры учке. Ми шып гинэ улӥськом. Агай тодэ, но уг куареты. Мон ӧй чида, сёровно сюроз шуыса. Тетрадьлы коньдон кулэ вал, шуи.

— Нош али кытын со коньдон? — юа нэнэ.

Кыед улысь поттӥ но сётӥ. Коньдонъёсты вурыса, нэнэ монэ кӧня ке тышкаськиз но  куное кошкиз. Агае шуэ:

— Кызьы-озьы тыныд ӧз йӧты?

— Нэнэ монэ тынэсьтыд тросгес яратэ, — шуисько, нош ачим малпасько: кызьы бен небытэн ортчиз ай та йыртэмаме?

Кайта ӵукна вазь ик нэнэ изён интыям лыктӥз но, штаниме куашкатыса, эгыр октон кисэн, вир потымон ик,  лошкатъяз. Мын сэндра пыдсы, сюдытэк возё, шуиз. Мон сэндраын сутка пала улӥ. Агае жаляз, лэся, монэ, нэнэлы шуэ: со адямидэ сюдоно, пе, ато кулоз ситэк. Васькы но сиськы, шуиз нэнэ. Мырдэм васьки, виресь штание бордам ик лякиськем. Нэнэ ачиз ик эмъяз монэ. Со ик эмез луиз йыртэман ужъёслы.

Со учырез, армие кошкыкум, Анна Васильевна но тодам вайытӥз. Юра, тон, пе, армие тросгес тетрадь ну, отын нэнэедлэн уксётӥрлыкез уз луы. Нош нэнэме мон котьку ӟечен гинэ тодам вайисько будэтэмез но утялтэмез понна.

Кӧт тырытӥсь машина

Пу нуллӥм лушкаса пичи салазкиен гинэ. Уйин гурмес эстылӥм куроен, но ма гинэ  солэн толыкез вал. Одӥг пол корка пыртам трос-трос куро. Гуре тыронъямы пол вылысез но кенжиз, но дыраз кысӥмы.

Одӥг пол спичкамы бырем яке нэнэ  сое шыръяны малпаз. Бускельёслэн, пе, гурзы ӝуа, мын, пие, эгырлы ветлы (ӵем озьы ветлӥськом вал). Пичи ведра басьтӥ но кошки, бускельёс мыным эгыр сётӥзы. Дыртыса бертонъям корказь азе уси но, эгыре кисьтӥськиз. Медаз кысы шуыса, мон сое гольык киыным ик усьтыр-табыр бичай но, нэнэен гурмес аратӥм. Нимысьтыз кӧс эгыр возиськом вал со понна. Кӧня ке улыса, азбаре потоно кариськи, нош корказьын тросаз ӵын. Ӝуась эгыре выж вискытӥ усем но, жуг-жаг кенжем. Дыраз кысыны вуттӥм.

Сиён умой-умой ӧй вал, ветлӥмы кутэн, дӥськут кышъямын-куръямын. 6-тӥ классозь, пот сиыса, будӥ, собере со но ӧз кыльы ни, ваньзэ араса быдтӥмы. Дядяелэн лэсьтӥськон тӥрлыкез трос вал. Агаенымы шудон машина лэсьтӥмы но, шудэм сямен чабей кизем интыостӥ ветлӥм. Огмы чабей бичаськом, огмы чакласькиськом, нокин медаз адӟы шуыса. Тысез, машина кузове тырыса, сюен шобыртӥськом. Шудэм сямен ик бертӥськом. Со тысез гылтӥськом, куасьтӥськом, собере кикӧэн (киын бергатыса изон) 2-3 пол поттӥськом. Нэнэ потлэсь нянез со пызь выллемын погылля вал — йыды нянь кадь адӟиськылӥз. Школае ветлӥ 12 иськеме Сен-Салья гуртэ, улӥ квартираын. Со няньмес люкисько вал ӵукналы, нуназелы но ӝытлы.  Со нянь шуонэн кӧт тып-тып тырылӥз.

Сандыкысь тӧдьы нянь

Директорен вераськыса, нэнэ монэ Юрмалай школае выжтӥз. Таиз 5 иськемын вал, соку мон доре бертылӥ ини. Кутски сандыкъёс лэсьтыны. Мон доры котыр гуртъёсысь сандыклы черод люкаськылӥз. Озьы улонмы воштӥськиз, тӧдьы нянь сиыны кутским. Дӥськутме, кутме воштӥ, велосипед, патефон басьтӥ. Патефонме трос аръёс ӵоже  синпельлы вози, 6-тӥ классын ужаменым басьтӥ шуыса. Но коркае ӝуамен, со но пеньӟиз.

Наркош Илляослэн но Яшка Ваняослэн улэмзы милесьтым но секыт вал. Коньдон поттыны кутскеме бере мон соосты сюдыны пырталляй. Нэнэлэсь кышкасько вал бере, нырысь юано кариськи. Со шуиз: сюд, пе, соослэн но дядяйёссы войнаын быремын. Пиос мыным юртто вал: пу но вандӥськом, лапас но ӝутӥськом, шудыны но дыр шедьтылӥмы. Гуртамы ми, 1939-тӥ арын вордӥськем пиос, 12 кузя вал, али 3-ез кылемын.

Школаез туж секытэн быдтӥ, ноку вал дышетскыны, кӧт сюмамен. Суреданъя дышетӥсьмы Михаил Петрович монэ художнике дышетскыны косэ вал, документ но  дасяз. Ӧтён вуиз но, нэнэ ӧз лэзьы: кин, пе, выжез миськоз, кин пудо учкоз. Ачиз ужын, агае армиын. Озьы кыли тӥрен ужаны. 7 класс бере кык гужемзэ колхозын ужай, толзэ фермаын тырши, валэн пудолы сиён нуллӥ, кыед поттай. Агае армиысь бертӥз но, Тӥгырменэ химлесхозэ кошки. Собере отын уж быриз, Комсомолкае леспромхозэ выжи. 1957-тӥ-1964-тӥ аръёсы улӥ Тӥгырменын, 1964-тӥ арысен — Сарапулын.

Юрий Шаньгин,

Сарапул

Туспуктӥз Мария Векшина

Удмурт Дунне
By Удмурт Дунне Июль 15, 2016 08:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<