Калыклэн лулыз — дэремын

Удмурт Дунне
By Удмурт Дунне Июль 15, 2016 12:21

Женеваысь куноос, шаерысьтымы ёросъёсысь калык дӥсь вурисьёс, удмурт дӥcез гажасьёс «Учке мынэсьтым дэремме!» нырысетӥ элькун фестивале вуылӥзы.

дэрем

Пичи Пурга ёросысь Вуж Мӧнья гуртысь Э. Александрова маде дукесъёс сярысь.

Пичи Пургалась культура юртын крезь шудэ. К. Гердлэн «Айшон» кылбурез чузъяське. Сцена вылын С. Виноградовлэн «Тӧролэн нылъёсыз» суредэз адӟиське. Ӝӧк сьӧрын пуко айшонъёсын удмурт кышномуртъёс… Соос ми шоры учко, ми, учкисьёс, соос шоры, нош вискамы — удмурт дӥсьлэн пумозяз эскерымтэ сюресэз.

Нунал ӵоже ужазы 7 мастер-классъёс, куноос котькудаз пыриськыны турттӥзы. Пичи Пургалась калык дӥсез люкась, вуриськись Т. Маштакова, лымшор удмуртъёслэсь дӥсьсэс чакласа, вераз: пӧртэм арлыдъем нылмуртъёслэн дэремъёссы пӧртэмесь вал. Нош нылпиослы дӥсь воксё мукет сямен вуриськиз.

К. Гердлэн «Айшон» кылбурез чузъяське. Сцена вылын С. Виноградовлэн «Тӧролэн нылъёсыз» суредэз адӟиське.

Женеваысь Искусствоя но дизайнъя институтысь профессор Н. Соломатина возьматӥз Византиысь дӥсьлэсь азинскемзэ но аспӧртэмлыкъёссэ.

— Та дӥсьлэсь котькуд чыры-пырызэ, котькуд вурыссэ валэктыны но соя калыкез, историез тодыны луэ, — вераз со. — Валады ке калык дӥсьлэсь пуштроссэ, быгатоды соя асьтэлы тупась дэрем вурыны.

Выл дӥсь но вӧсясь-конъёсын кутӥськись дӥсь-кут сярысь мадиз Вуж Мӧнья гуртысь кибашлыослэн юртазы ужась Э. Александрова.

Дэри ёросысь А. Четкарёв котыраз люказ чеберман арбериосты нуллыны но лэсьтыны яратӥсьёсты. Усточи возьматӥз, кызьы вашкала дыръя сюан урыс пунӥзы, кызьы кускерттонъёсты, еосты шонер думылӥзы. Еос сярысь вераськизы Пичи Пургалась дӥсь вурись     Т. Москвиналэн мастер-классаз но. Малы кышномурт воргоронлы е керттыны уг быгаты? Малы пиосмуртъёс шулдыръяськонъёс дыръя тӧдьы азькышетъёсын ветлӥзы? Тодӥськоды-а вал тӥ, «штан» удмурт сямен «ваё пуйы» шуыса? Пумтэм юанъёслы валэктонъёс шедьтӥзы куноос, та кибашлыен вераськыса.

Тодӥськоды-а вал тӥ, «штан» удмурт сямен «ваё пуйы» шуыса? Пумтэм юанъёслы валэктонъёс шедьтӥзы куноос, Т. Москвинаен вераськыса.

Мастер-классъёсты йылпумъяса, фестивале вуэм кибашлыос ас ужъёссэс возьматӥзы. Соосты дунъязы «Удмурт Кенеш» огазеяськонлэн тӧроез Т. Ишматова, Удмурт кун университетысь тодосчиос, Вуж Мӧньяысь кибашлыослэн юртэнызы кивалтӥсь Н. Тарасов, суредасьёс З. Лебедева, С. Виноградов.

Эграос паймытӥзы «Эгра инкуазь» дӥськут бичетэнызы. Туала дэремъёс но дукесъёс вылын италмасъёс, зангариос, ӵӧжъёс суредамын-пужыятэмын. Дэриос сцена вылэ потаны ярась дэремъёссэс возьматӥзы. Алнашъёс чылкак ас пал дӥсьсэс вайиллям. Вашкалазылы, вурысъёссылы паймыса, айшетъёссэс киыныз ик маялляса, Т. Москвина вераз: «Милям тазьы уг вуро. Уте таостэс!». С. Широбокова брангурт дэремъёсын тодматӥз. Пичи Пургалась Т. Маштакова калык шӧмо дӥсьёсыныз ушъяськиз. Ыж гонлэсь вурем дукесъёссэ но саестэмъёссэ адӟытӥз Пичи Пургалась егит дизайнер В. Галанова.

Али вурем дэремъёсты удмурт шуыны секыт. Ваньмыз соос, вашкала дӥсез, солэсь аспӧртэмлыксэ но пуштроссэ тодытэк, кылдытэмын.

Дунъясьёс йылпумъянъёс лэсьтӥзы: ваньмыз туж чебер, тунсыко, яркыт но…

Али вурем дэремъёсты удмурт шуыны секыт. Ваньмыз соос, вашкала дӥсез, солэсь аспӧртэмлыксэ но пуштроссэ тодытэк, кылдытэмын. Соин ик милям айшон нуллэ бызьымтэ нылмурт, нош дэриос кунооссэс, пурга дэрем дӥсяса, пумитало.

Фестивалез йылпумъясь концертэ эшшо но тросгес адями вуиз.

Наталья Фролова

Туспуктӥз Ярослав Анфиногенов

Удмурт Дунне
By Удмурт Дунне Июль 15, 2016 12:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<