Кӧ пытьыя

Удмурт Дунне
By Удмурт Дунне 12 июля, 2016 08:54
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
xF6O0c2nXC0

Быдэ вуон ужрадын асьсэды котыр ласянь ӟеч возьматӥзы Софья Вахрушева но Валерий Загребин.

Якшур-Бӧдья ёросысь Кекоран школаын ортчиз «Кӧ пытьыя» лагерь.

Школа лагерьлэсь пуштроссэ малпакум, йырам вози, туэ сӥзьыл школамылы 150 ар тырме шуыса. Туж потэ вал пиналъёслэсь шаертодонъя, историяя тодон-валанъёссэс паськытатэме, вордӥськем шаерзэс, гуртсэс эшшо но золгес мед яратозы шуыса. Тодам лыктӥзы школаысьтымы дышетӥсьмылэн Нина Ивановна Вахрушевалэн алангасаръёс сярысь азьло печатлам ужъёсыз. Ӵош ужась дышетӥсьёс мыным туж юрттӥзы. Озьы лагерьмылэн нимыз но, огъя концепциез но алангасаръёсын герӟаськиз. Нош малы «кӧ»? Татын, пе, азьло вукоослы кӧ (жёрнов) потто-корало вылэм. «Кӧ коранлэсь» пӧрмем Кекоран.

45  пиналъёс 4 отрядлы люкемын вал. Спортэн вырисьёс нуназеозь бызьылӥзы, кибашлыос кызьпу туйлэсь арбериос лэсьяллязы, инкуазез эскерисьёс турын-куар бичазы, нош пичильтокъёс шудӥзы, мультфильм учкизы. Нуназе бере котькуд нунал  конкурсъёсы, ужрадъёсы пыриськизы. Лагерьлэн пумаз Кӧ нимо алангасарлэсь ватоссэ шедьтон понна 4 отрядъёс одӥг бадӟым огинэ валчеяськизы. «Кӧ пытьыя» квест-шудонэз ортчизы. Адӟе вал шумпотонэн пачылмем синъёсты, куке ваньзы ӵош пересь кызьпу улысь шедьтӥзы ческыт кузьымъёс!

H9d-AWCEKlw

Пиналъёслэн сюлмазы озьы ик кылиз, Тол бабаен пумиськон.

Пиналъёслэн сюлмазы озьы ик кылиз, Тол бабаен пумиськон. Шарканысь ачиз Тол буба эшъёсыныз дорамы вуылӥз! Кекоран но Порва садъёсысь покчиос но ветлӥзы Тол бабай шоры учкыны, соин ӵош шудыны. Пумаз ваньмы ӵош туспуксим Тол бабаен, алангасарлэн ӵыжы-выжыеныз.

Туж яраз пиналъёслы Кекоран черкогуртэтӥ экскурсиен ветлыны. Тросгес тодӥзы гуртлэн историез сярысь, тодматскизы-вераськизы пересьёсын. Нош мукет нуналэ, фотоаппаратъёс кутыса, шонтӥзы фотокроссэ. Туспуктӥзы Кекоранлэсь ульчаоссэ, адямиоссэ, инкуазьзэ, чеберлыксэ. Лэсьтэм фотоосынызы вуоно дышетскон арын школаын радъялом адӟытон.

Одӥг нуналэ, удмурт дэремъёс дӥсяса, потӥмы Сюровае. Мынонэз 4 иськем пала. Потон азямы мон мади пиналъёслы быдэ вуон праздник сярысь. Пӧртэм ёросъёсын со пӧртэм сямен нимаське, нош ми, «Шунды» огазеяськонлэсь адӟем карыса, «Эру» ик шуимы. Тямыс нылъёс но пиос пӧртэм ужъёсты быдэсъязы. Пиос веник тӥязы, керттӥзы. Нылъёс бирды вуризы, табань пыжизы. Котькуд пар пу вандӥз, ву дуре ветлӥз. Тужгес чупыресэсь, ужаны быгатӥсесь луизы Валера Загребин но Софья Вахрушева.

LI7BNJigf7Y

Тямыс нылъёс но пиос пӧртэм ужъёсты быдэсъязы.

Туж шулдыр но мыло-кыдо, арганэн шудыса, кырӟаса, милемыз пумитазы Сюровай клубын ужасьёс. Бадӟым тау пумитамзылы но, ческыт табань пыжемзылы но. Пиналъёсмы, 2 пол пуксьылыса ик, ымтыросазы сиизы ческыт удмурт сиёнэз. Кунояськеммы бере пуклёкен но, кутэн но шудӥм, урамен но эктӥм, куэм выж лёгетэз позыръяса но, тэтчам. Таӵе удмурт пуртые зымыса, удмурт сямен вераськисьтэм пиналъёсмы но валаны-вераськыны кутскизы кадь.

Ветлӥмы на Эгра ёросысь Сундурысь Лӧпшо Педунь дӥне. Пиналъёсмы вань конкурсъёсы мыло-кыдо пыриськизы, тодазы вайизы, кызьы астэ нюлэскын возёно. Нош собере турынэн чаен, перепечен куноятӥськизы. Сундуръёс паймизы, удмурт сямен валаськом но вераськиськом шуыса.

RJaxXBRiB74

Лагере пыриськисьёс.

Бен, табере нылпи удмурт кылын вала но вераське ке, со паймымон потэ адямиослы, асьмелы ик, удмуртъёслы. Ми Кекоран школаын тыршиськом ик возьыны удмурт кылэз. Туж оскеме потэ, удмурт кылэз но лулчеберетэз тазьы пыӵатон пайда ваёз шуыса.

Лилия Широбокова,

Кекоран школаын ужрадъёсты радъясь

Удмурт Дунне
By Удмурт Дунне 12 июля, 2016 08:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<