Иж — бадӟым гурт

Удмурт Дунне
By Удмурт Дунне 13 июля, 2016 16:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Заводын ужась В. Попков кузпалэныз, пиеныз но внукъёсыныз. 1909-тӥ ар.

Заводын ужась В. Попков кузпалэныз, пиеныз но внукъёсыныз. 1909-тӥ ар.

8-тӥ июле Россиын пусйиське Семьялэн но яратонлэн нуналзы. Ижысь вашкала семьяослэн улэм-вылэмзы сярысь мадиз но шоркармыя экскурсия ортчытӥз тодмо писатель но журналист Сергей Жилин.

Сергей Алексеевич шоркармылэн историез сярысь вераз революцилэсь азьвыл Ижын улэм тодмо семьяослэн (Петровъёслэн, Килинъёслэн, Коковихинъёслэн, Бодалёвъёслэн) улэм-вылэмзы пыр. Шоркармылэн историез герӟаськемын пыӵал тӥрлык поттон заводэн. Оӵ шурез ӵыпемзы бере заводэз лэсьтонэ  котырысь гуртъёсысь удмуртъёс но кужмысь вуттэмын вал. Со сяна, татчы ужаны ӧтизы кунгож сьӧрысь мастеръёсты. Тросэзлы Иж нырысь-валысь мурт потэ вал. Сергей Жилин верамъя,  кыӵе ке инты дуно луэ но дорлы пӧрме, куке отын семья кылдэ, яратоно адямиосыд отын вордско яке куло, куке кышкыт ожъёс пуромо но, тон мукетъёсыныз огазеяськиськод улон интыдэ утён понна. Озьы ик туала Иж но кылдӥз. Солэсь историзэ «гожъязы» уно семьяос.

— Мын но вала на, кӧня пумо вир (ӟуч, удмурт, бигер, немец, еврей) сураськиз вашкала Ижын. Пӧртэм адямиос пумиськылӥзы, яратӥзы, семья кылдытӥзы.  Куддыръя паймиськод, соослэсь фамилиоссэс лыдӟыса ик. Кылсярысь, 1897-тӥ арын Ижысь Казанской (али сямен Азин) ульчаын улӥз вуриськись Яков Шнайдерман. Архивысь документъёсын со ӟуч, православной воргорон гожтэмын. Басьтом мукетсэ семьяез. 1889-тӥ арын Александр Невский соборын кузпалъяськизы 18 аресъем православной Николай Оранж (Великобританиысь подданойлэн Томас Оранжлэн пиез) но 16 аресъем Наталья Игнатьева (Ижысь заводын ужасьлэн нылыз). Вашкала Иж  одӥг бадӟым семья кадь вал, адямиос  гуртын кадь туж умой тодӥзы ог-огзэс, кинлэн кӧня нылпиез, кытысь кенэз-эмеспиез, — шуэ Сергей Жилин.

Котькуд корка, нимтул усьтэ вашкала Ижлэсь ортчем сюрессэ. Кылсярысь,  туж тунсыко  семья улэм Вуж ульчаысь (али сямен Карл Маркс) 118 номеро юртын.  Корка сылэм Свято-Михайловской черклы матын, али сямен «Аксион» заводлэн пырон дораз. Татын улэм Ижысь тодмо архитекторлэн Иван Коковихинлэн пиез Николай Коковихин. Соос трос лэсьтӥзы Ижлэсь туссэ чебер карон понна. 1897-тӥ арын ортчем переписья та юртлэн кузёезлы Николай Ивановичлы вылэм 64 арес. Воргоронлэн кышноез кулэм ни вылэм, но коркан улэм 12 адями — пиналъёсыз, внукъёсыз. Ӧвӧл ёрмиллям, шӧдске: Коковихинъёслэн семьяязы вылэм сиён пӧзьтӥсьсы, кучерзы, нуны утисьсы.

— Та юрт герӟаськемын эшшо одӥг нимтулэн. Полковник Дмитрий Федичкин вал Ижысь Калык армилэн командирез, большевикъёслы пумит ӝутэм восстаниен кивалтӥз, бӧрысь Колчаклэн армияз ожмаськиз.  Тамбов губерниысь потэм адямилы 118 номеро юрт тожо мурт вылымтэ. Со татын улэм но,  Нырысетӥ дунневыл ожын жугиськыкуз, Германиысен татчы гожтэтъёс но ысъям. Дмитрий Федичкин кышно басьтэм Николай Коковихинлэсь внучказэ. Та сярысь гожтэмын Александр Невскийлэн соборезлэн метрикая книгаяз. Ижысь но Воткинскысь заводъёсысь рабочийёс восстание ӝутӥзы но 90 нунал ӵоже пумитъяськизы большевикъёслы. Соосты 1918-тӥ арын сӥзьылаз ини Азинлэн дивизиез пазьгиз. Большевикъёслы пумит ожмаськем рабочийёс но офицеръёс Удмуртиысь кошконо луизы, нырысь Сибире, собере Китае, тросэз выжы лэзизы Америкае. Полковник Федичкин но вуиз США-е, кулӥз 1966-тӥ арын Сан-Францискоын. Солэн нылызлы Галиналы, восстание кутскыку, 6 арес вал. Но Галина Дмитриевна туж умой тодэ на вашкала Ижлэсь туссэ, ӵужатаезлэсь корказэ, бадӟым садзэ, кызьы 1918-тӥ арын шуласа лобазы снарядъёс, кызьы со анаеныз Свято-Михайловской храме вӧсяськыны ветлылӥз. Галина Храпова улонысь кошкиз 2010-тӥ арын, 99 аресказ, сое ватӥзы Калифорниысь Сербской шайвылэ, татын трос ватэмын Ижысь кошкем адямиос. Галина Храповалэн ӵыжы-выжыосыз куремъя, Ижысь Свято-Михайловской храмын, Галина Дмитриевнаез буре вайыса, панихида ортчытэмын вал, — шуэ Сергей Жилин.

Вашкала Ижез усьто туспуктэмъёс но. Кылсярысь, «Аксион» завод интыын ик улэм Ижысь тодмо шаерчи но фотограф Сергей Селивановский. Мумиз солэн немец выжыысь вылэм, песянай-песятайёсыз — вуз карисьёс, выжыязы вылӥллям баӵкоос но. Со бадӟым тунсыкен учкылэм вашкала фотоосты, но кинъёс отын, пияшлы ӧз вераллялэ, уго солэн песятаез Сибире келямын ни вал.

— 1949-тӥ арын ожысь бертэм бубиз Сергей Селивановскийлы кузьмаз трофейной фотоаппарат. Со дырысен Сергей Николаевич киысьтыз сое ӧз ни куялля. Кылем арын историк С. Селивановский поттӥз «Старый Ижевск. События и люди в объективе фотографов» книгазэ. Отчы вашкала Ижлэн 400-лэсь уно туспуктэмъёсыз шедизы. Соосты туж тунсыко учкыны, — шуэ Сергей Жилин.

Галина Семёнова

Удмурт Дунне
By Удмурт Дунне 13 июля, 2016 16:10 Updated