Гуртъёсысь иворъёс: Чутожмонлы — 300 ар, Кукуиын — яна потон но Усо гуртын — этнофутуризм

Удмурт Дунне
By Удмурт Дунне Июль 26, 2016 13:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сюмси

Данъян пул вылын — дано адямиос

Пӧсьтолэзе ёрослэн кылдэмез дырысен 87 ар тырмиз. Арысь аре  районысь ужын азьветлӥсьёслэсь туспуктэмъёссэс Данъян пул вылэ тыро.

— Милемыз, районлэсь дано муртъёссэ, ёросмылэн вордӥськем нуналаз одно ик администрацие ӧтё, — вера «Удмурт Кенеш» огазеяськонлэн Сюмси ёросысь ёзэныз кема аръёс ӵоже кивалтэм но Маркел школаын 25 ар покчиосты дышетэм Евдокия Ильиных. — «Знамя» газетлэн азьвыл валтӥсь редактореныз Иван Рябовен но Сюмси ёрос больницаын терапевтын ужам дано врачен Маргарита Соковиковаен ми кема аръёс ӵоже ини ёрослэн дано пиосыз но нылъёсыз луиськом. Арысь аре Данъян пул вылын азьмынӥсьёслэн туспуктэмъёссы вошъясько. Шумпотоно, туэ отчы 15 адямиез но 3 коллективез пыртӥзы.

Дэри

Виле — Байкузё тымет дуре

2-тӥ гудырикошконэ Дэри ёросысь Байкузё тымет дуре эшъёссэ огинэ люкалоз Пальник гуртысь «Нылкышно клубен» кивалтӥсь Елизавета Баушева.

— Кылем арын Виле, 2-тӥ гудырикошконэ, Сарапул ёросысь Нечкиноысь, Шевыряловоысь но Соколовкаысь эшъёсмес дорамы ӧтьыны быгатӥм вал, —  вера Елизавета Николаевна. —  Озьы ик дорамы вуылӥзы Пичи Пурга ёросысь Улӥ Кечол гуртысь «Уллапал кенакъёс» но Эдэйгуртысь «Вуюись» коллективъёс. Кырӟаса-вераса гинэ дырмес ум быдтӥське, ми сюлмысьтымы улон-вылонмы сярысь кенешиськом, сюлэмшугъяськытӥсь ужпумъёсты сэрттӥськом-пертчиськом.

Дэбес

Аръян шуккозы, турналозы…

Зар-Медлоысь  «Зарни медло» удмурт культурая центрын ужасьёслэн та нуналъёсы тэк пукыны пичи но дырзы ӧвӧл.

—  Дэбесын 10 нунал ӵоже Парк скульптураосъя калыккуспо конкурс-фестиваль ортчоз, — вера культура юртысь лулчеберетъя кивалтӥсь Анна Чернова. — Удмурт культурая центр милям гуртамы интыяськемын бере, кунгож сьӧрысь, Россиысь но асьме шаерысь куноосты 3-тӥ гудырикошконэ ми доры ваёзы. Ми туристъёсты сям-йылолъёсынымы тодматӥськом. Таоссэ но куноосты — соос Португалиысь но Бразилиысь лыктыны кулэ — аръян шуккытом, турнатом, перепеч но табань пыжыса, утялтом. Пӧртэм удмурт кырӟанъёсты, шудонъёсты но эктонъёсты дышетом, мастер-классъёс ортчытом. Талэсь азьвыл ми доры Австралиысь но Бразилиысь куноос вуылӥзы вал. Сям-йылолъёсмылы воксё синмаськыса кошкизы. 6+

Воткинск

Кукуиос яна потылозы

Кукуи гуртын сюрслэсь ятыр адямиос уло. Яна потыны быгатытэк, тросэз егит семьяос анай-атайёсынызы ӵош улоно луо.

Соос нимаз кариськыны али ик соглаш, но пуктӥськыны нокытчы. Кӧня ке ар ӵоже Кукуи муниципал кылдытэтлэн йырыз та сюлмаськытӥсь юанэз сэрттыны-пертчыны тыршиз. Йӧ кылем арын интыысьтыз вырӟиз.

Лэсьтӥськыны висъям инты — бусы — туннэ нуналлы буш сылэ на. Но тани пумен отчы ву но тыл кыскозы — адямиос лэсьтӥськон борды басьтӥськозы.  Уд но шӧды, ӝоген син азе быдэс ульча кылдоз, шумпотыса верало гуртоос.

Пичи Пурга

Чутожмонлы — 300 ар

6-тӥ гудырикошконэ 300 ар тырме Чутожмон гуртлы.

Со нуналэ ӵукна 10 часын чутожмон  калык но сьӧрло улыны кошкемъёс  люкаськозы гурт шорысь клуб азбаре. Брангуртысь Михаил баӵко молебен ортчытоз.

— Архивъёсын бугыръяськыса, гуртмылэсь историзэ шедьтӥм, — вера Брангурт шор ёзо школаын удмурт кыллы дышетэм Владимир Байсаров. — Чутожмонлэн юбилеезлы сӥзьыса, клуб азбарамы бадӟым из пуктыны чакласьком. Озьы ик ваньмы ӵош Бадӟым ошмесмы дуре васькалом. Баӵко вуэз вӧсялоз. Гурт калык пӧлын асьмелэн котьмар карыны быгатӥсьёсмы вань. Вордӥськем гуртаз бертоз Брангуртэ бызем Наталья апаймы. Со Брангуртысь песянайёс пӧлысь одӥгез устоез артистка — Наталья Пугачёва.

Гуртысь кибашлыос киужъёссэс адӟытыны поттозы, калык будэтэм емышъёссэ но бакча сиёнъёссэ ваёз. 0+

Алнаш

13 нунал ӵоже суредаськозы

Усо гуртын 1-тӥ-13-тӥ гудырикошконэ этнофутуризмъя 9-тӥез  «Кольыёшурма» фестиваль ортчоз.

Сое радъя творчествоя огазеяськон «Ижкар» (кивалтӥсез — суредась Юрий Лобанов). Симпозиуме пыриськозы Удмуртиысь, Башкортостанысь, Марий Элысь, Татарстанысь, Комиысь, Пенза улосысь, Финляндиысь но Эстониысь 30 художникъёс. Симпозиумын котькуд художник инкуазен герӟаськем ужзэ возьматыны кулэ. 12-тӥ гудырикошконэ Кам шур дурын бадӟым возьматон усьтӥськоз. Отын ик ужалозы мастер-классъёс. Фестивальын лэсьтэм суредъёс ёросэ ик синпелетлы шуыса кылёзы. 6+

Кизнер

Дышетскозы киужлы

Кизнер черкогуртысь Кибашлыослэн юртазы ужасьёс «Воргорон ужъёслы азбука» проект дасязы. Со сӥземын ёросысьтызы пӧртэм гуртъёсысь 55-65 аресъем воргоронъёсты киужлы дышетонлы.

— Дышетыны кутомы 20 муртэ, — вера Кизнерысь Кибашлыослэн юртэнызы кивалтӥсь Валентина Россомахина. — Тросэз арлыдо воргоронъёс маин вырыны шугъясько. Соин ик малпамы та проектмес. Дышетскыны мылкыд карисьёсты гуртъёстӥ утчаса ветлӥськом ини. Ужмы радъямын луоз 4 удысъя: бадьпу ньӧрын кутаськон, кызьпу туен вырон, бекче лэсьтон но пу вӧлон. Котькуд группаын 5 адями луоз. Воргоронъёс тодон-валан басьтыны Кибашлыослэн юртазы толэзяз кык пол ветлозы. Соос понна ми станокъёс но басьтӥм ини.

Дасяз Любовь Тихонова

Удмурт Дунне
By Удмурт Дунне Июль 26, 2016 13:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<