Гербер: Тол бабай куноятӥз Москваын

Удмурт Дунне
By Удмурт Дунне 21 июля, 2016 08:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
гербер

Кам сьӧрысь удмурт кенакъёс Москваын.

Герберез чакламын Санкт-Петербургын но ортчытъяны

Москваын кыкетӥ арзэ ортчиз гырон быдтонлы сӥзем удмурт юмшан. 15-тӥ пӧсьтолэзе город шорысь Эрмитаж садын 10 час ӵоже Удмуртия быгатонлыкъёсыныз, узырлыкъёсыныз калыкез паймытӥз.

 Мӧзмонэз веськатон

Москвае мынӥзы артистъёс, кырӟась-верась коллективъёс, кибашлыос, дизайнеръёс, журналистъёс — ваньмыз ог 300 мурт. Уй ӵоже Эрмитаж садын ӝужазы удмурт шӧмо сценаос, пӧртэм площадкаос, Удмуртиысь дано адямиосын тодматӥсь плакатъёс. Ӵукна 6 часысен лӧсъяськыны кутскиз ческыт зын: ӟазег сӥлен ӝук пӧзьтыны ӧдъязы. Удмуртиысь юромо вуттэмын 75 кило йыды кеньыр. Но москвичъёсты озьы гинэ сайкатод, пе. Шутэтскон нуналъёсы соос нуназе котыр гинэ юртысьтызы пото. Таин сэрен но Герберез усьтон 12 часлы чакламын вал. Нырысь ик татчы кожизы Москваын улӥсь удмуртъёс. Эшъёссэс, тодмооссэс адӟыса, э-э-э ӟыгыръясько ук!

— Ми пареным (картэным) Башкирысь удмуртъёс, — синвуоссэ ӵушалтыса, вера Эльза Шаймухаметова. — 30 арлэсь кема Москваын улӥськом ни. Мӧзмиськом удмуртъёслэсь. Соин ик таӵе пумиськонъёс туж юртто мӧзмонэз веськатыны. Удмурт кылэз кылыны, удмурт кырӟанэз кылзӥськыны — макем шуд со! Удмуртъёс пӧлын улыса, сое, оло, валаны но уг луы. Нош Москваын та туж кулэ. Удмуртъёсыз адӟыса, сюлэм ик пӧзьыны кутске кадь.

Москваысь удмурт егитъёслэн азьветлӥсьсы Марина Бородина Гербере вуиз котыраз пинал калыкез кыскыны.

— Москваысь землячествоын ог сюрс удмуртъёс. Удмурт акцентэн вераськемез кыдёкысен валаны луэ ни. Сюлэм чидатэк, доразы матэктӥськод, тодматскиськод, — шуэ нылмурт. — Ми пӧртэм проектъёс бордын ужаськомы, асьме выжы калыкен тодматӥськомы. Кылсярысь, алигес радъямы туспуктэмъёсын «Эволюция превращений» адӟытон. Отын возьматӥмы, кыӵе адями огшоры улонын но макем со воштӥське, ас выжы калыкезлэсь дӥсьсэ дӥсяса.

IMG_7541s

Удмурт кырӟанъёс но эктонъёс  золгес но золгес ӧръяськем бере, сутӥсь шунды буйганы кутскыса, садэ вуыны ӧдъязы москвичъёс но. «О, удмуртский праздник, классно»  шуыса, вамыштылӥзы сад шоры. Татын куноосты перепечен кумышкаен пумиталлязы. Асьсэлы куноослы но луонлык сётэмын вал ӟырдам гур азьын пыжиськыса эскерыны. Перепеч, табань киосты суто, мылкыдэз бурдъяло.

Удмуртиез «Иж» мотоциклъя, Калашниковлэн автоматэзъя, Брангурт песяйёсъя тодо ни. Но луонлык кылдӥз мукет узырлыкъёсын но тодматскыны. Ӵошатскыса кадь азинтӥсько культура, промышленность, туризм, гурт удысъёсмы. Соин ик Гербер — шулдыръяськон гинэ ӧвӧл, со кусып тупатон, инвесторъёсты гочатон, туристъёсты кыскон. Таин сэрен садэтӥ поръяз, капчи мылкыд кузьмаз Шарканысь вуэм Тол бабай. Нылпиос воксё лӧптӥзы солы, алвылысьтыз ик ӧз васькалэ кадь. Нош Эгралась Лӧпшо Педунь доры сюрыса, уноез нырысьсэ адӟизы кутъёсты. Адӟем гинэ ӧвӧл — соосты кутчаны но быгатӥзы. Радъямын вал нимысьтыз ӵошатсконъёс. Туж шумпотӥзы нылпиос пӧртэм мастер-классъёслы но: куиськон станок сьӧры пуксьылӥзы, басмалэсь мунё лэсьтӥзы, куролэсь чебересь арбериос пунӥзы.

— Мастер-класслы ваем куро уз тырмы ни, кожасько вал, — шуэ куро мунё лэсьтӥсь Нина Тарасова, — туж трос адямиос пыриськизы киуж лэсьтонэ. Уноез паймиз но, лэся, куролэсь мар но пӧрмытыны уг луы шуыса.

Ма мар пичиосты веранэз — вылӥ кивалтӥсьёс но синмаськизы Нина Тарасовалэн ужъёсызлы. Москваысь  Нациосын ужан политикая, улосъёсын кусып возёнъя но туризмъя департаментэн кивалтӥсь Владимир Черников куролэсь керттэм изьызэ йыраз понӥз. Нош куролэсь ачиз эктӥсь мунёез тросэз басьтӥзы, нылпиосмес паймытомы шуизы.

 Калыке потон

Эрмитаж садысь адӟыны луиз Пётр Чайковский композиторлэсь семьязэ — Воткинскысь Чайковскийлэн музей-усадьбаяз ужасьёс озьы пӧрмытскиллям. Удмурт дизайнеръёс Дарали Лели, Татьяна Москвина, Полина Кубиста, модельёсты дӥсям  но калыклы возьматэм сяна, дэремъёссэс вузаны но поттӥзы. Аспӧртэм удмурт дэремъёсты кутылыса ик учкылӥзы москвичъёс. Фольклор коллективъёсысь, ансамбльёсысь нылкышноосмы-воргоронъёсмы яркыт пиштӥзы. Песянайёсмылэсь «тӥ Брангурт песяйёс-а?» шуыса, юаллязы. Удмурт дэремен вань арлыдоос москвичъёс понна — Брангурт песянайёс. Но песянайёсмы талы ӧз ӝожоме, рос-прос валэктылӥзы, котькуд ёрослэн но гуртлэн аслаз дӥськутэз, фольклор коллективез, аслаз данъяськонэз шуыса.

Калык ӧз бырылы Калашниковлэн пыӵал тӥрлы-кезлы сӥзем сэрегысь. Автоматъёслэн муляжъёссы зэмос пыӵал кадь лэсьтэмын вал, соосын фотое пуксьыны котькудӥз сямен дыртӥз. Отчы кожаз Бахрейн королевствоысь посол но. Площадка вӧзын ик тодматӥзы на «ИжАвто» заводын потӥсь машинаосын.

— Удмуртия трос дыр ӵоже мурт синъёслэсь ватэмын вал. Туннэ асьмеды возьматон, туристъёсты кыскон понна шаплыгес луыны, выль амалъёс утчаны кулэ, — шуэ культурая но туризмъя министр Владимир Соловьёв. — Гербер — ӵапак сыӵе аспӧртэм амал. Кылем арын Москваын Гербер ортчем бере адямиослэсь тунсыкъяськонзэс зэмен ик сайкатыны быгатӥмы, уноез улон-вылонмы сярысь юалляськыны кутскизы. Кылем арен ӵошатыса, туэ Удмуртие 50 сюрс адямилы уногес туристъёс вуылӥзы ни. Таиз Гербер но аслэсьтыз пытьызэ одно кельтоз. Али кусып тупатон ласянь китайёсын вераськиськом.

Малпанъёс вань вуоно арын Герберез Санкт-Петербургын но ортчытыны. Соин ик, кызьы ортче Гербер Москваын, ас синмыныз адӟыны вуылӥз Удмуртилэн Тӧроезлэн Санкт-Петербургын но Ленинград улосын оскем муртэз Валерий Просвирин.

— Калыкез одно ик тодматоно удмурт культураен, соин ик вуоно арын Герберез уйпал шоркарын ортчытомы, — шуиз со. — Сям-йылолъёсты, культураез,  лулпуш узырлыкез, мылкыдэз возьматыны быгато таӵе ужрадъёс гинэ. Россиысь туризмез азинтоно. Нош Удмуртия маин но паймытыны уг быгаты. Финляндия берло дыре асьмемын туж тырше куспын тупатыны, бадӟым саклык висъя туризмлы.

 Кусып юнматон

Быгатӥз-а Удмурт шаер москвичъёсты гочатыны? Сцена вылэ вылысьтыз вылаз потазы удмурт фольклор коллективъёс. Куд-огез учкисьёс пӧлысь нырысь-валысь пыкылӥз ик: Удмуртиын арлыдоос гинэ шат культуразэс азинто? Но сцена вылэ егит артистъёсмы потэм бере мылкыдзы воштӥськиз. Ӝытпал татын кузёяськизы «Сайлент Ву Гур» удмурт рок-группа, Электоники Dj’s, Богдан Анфиногенов но мукетъёсыз.

IMG_8001s (1)

Ӝытпал татын кузёяськизы «Сайлент Ву Гур» удмурт рок-группа.

Уката лӧптӥзы куноос, лотереяос ортчыку. Удмуртие 5 нуналлы вуылыны турпутёвка усиз Москваысь огезлы журналистлы. Со сяна, «Варзи-Ятчи» но «Металлург» санаторийёсы путёвка утӥзы Удмуртия сярысь юанъёслы шонер валэктон сётэмъёс. Одно ик Удмуртие лыктом, шуизы куноос.

— Мон шумпотӥсько: Москваын Герберез кыкетӥзэ пусйиськомы. Но Москваын ваньзэ уд возьматы — инты уз тырмы. Нош милемлы вань маин данъяськыны, — Герберез усьтыку, шуиз Удмуртилэн Тӧроез Александр Соловьев.

Москвичъёслэн делегациенызы кивалтӥсь Владимир Черников шуиз:

— Москваын олокыӵе но праздникъёс ортчыло. Но туннэ ужрад возьматӥз: ми ваньмы — одӥг бадӟым кун, ми эшъяськыса улӥськомы. Туннэ син азямы вордске сям-йылол — Гербер. Со аслэсьтыз дорзэ шедьтӥз. Туэ со — Эрмитаж сад. Мон оскисько, татчы со кемалы кылёз.

Удмуртие берытскыса, Александр Соловьев шуиз: Герберез Москваын ортчытъянэз азинтом. Та кулэ со ласянь но: столицаын Удмуртиысь туж трос потэм адямиос уло, валче улон, пумиськон но эшъяськон туж кулэ.

Эшъяськон кусыпъёс юнматэмын вал Москваысь кивалтӥсьёсын но. Котькуд удыс понна кыл кутӥсьёс Удмурт юмшанэ лыктэмын вал уго. Герберез ӵектэмын пыртыны ЮНЕСКО-лэн культура ласянь быдэс дуннелы дуно луись объектъёсын, сям-йылолъёсын списоказ.

Елена Сараматова 

Удмурт Дунне
By Удмурт Дунне 21 июля, 2016 08:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<