Галина Маркова: Миллионер луысал ни

Удмурт Дунне
By Удмурт Дунне 21 июля, 2016 10:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Можга ёросысь Кватчи гуртысь 63 аресъем Галина Маркова паймытэ лыдӟиськыны яратэменыз но гуртысьтызы котькыӵе ужрадэ мыло-кыдо пыриськеменыз.

Галина Маркова туж мыло-кыдо нылкышно, кыл пӧськы шуо сыӵеос сярысь. Котьма сярысь лабыртоз,  я серекъятоз,  я малпаськытоз. Вань солэн одӥг  тунсыко висёнэз — кылбуран. Чуръёссэ кагаз вылэ кисьтыны со кутскем школаысен.

— «Дась лу!» газетэ чуръёсме лэзьяны кутски но ачим ик нерад луи. Соку пиналъёс ог-огзылы трос гожтэтъёс лэзьяло вал ук. Газетын фамилие потэм бере пумтэм-йылтэм гожтэтъёс вуылыны ӧдъязы. 7-тӥ классын дышетскыкум, учительское ӧтчазы, укыр трос гожтэтъёс вуэмысь. Нош 8-тӥ класс бере мон Можга педучилищее мынӥ ини. Кылбурчи Григорий Данилов литературая кружок нуиз отын. Иже но нуллӥз, телевизор пыр возьматӥзы, кылбуръёсы печатласькизы. Нылпиослы гожтэм чуръёсме писатель Николай Байтеряков но ушъялляз: тазьы, пе, гожтыны быгатыны кулэ ай. Али бон нокытчы ик кылбуръёсме уг лэзьяськы, тетрадям гинэ гожъясько, ёрос газетэ одӥг-ог пыртасько Можгае ветлон сяменым. Бускель Водӟи гуртысь крезьгурчиос Валентин Егоров но Семён Дмитриев кылбуръёсылы гур но гожъяло. «Удмурт дунне» газеттэс мыло-кыдо лыдӟисько, кырӟанъёс-кылбуръёс ӵемгес печатлалэ. Пичи гуртъёс, колхозъёс сярысь, чурзэ кельтытэк, лыдӟисько. Картэ вань ке но, «Тодматскон сэрегдэс» учкылӥсько, интересно ук,  — шуэ Галина Александровна.

Пельпум вылысьтыз кышетсэ адӟыса, тунсыкъяськисько: кылбуран висказ-а  чильпаське, керттӥське?

— Киужен чик уг выриськы, ӟеч адямиос кузьмало. Кылбуръёсме книгаен поттыны кисы кулэ, соин ик уг но турттӥськы. Компьютерез «уг тодмаськы»,  печатланы уг валаськы. Мотри,  вань вераськемме газетад эн печатла. Мон сыӵе: вераськыны косыса, копейка сётод, дугдыны косыса, манеттэ поттод. Вераськем понна коньдон тырысалзы ке, мон но гражданинэ (картме озьы шуисько) миллионеръёс луысалмы ини. Эсьмаса, одӥг-кык кылбурме печатлалэ, соос мыным нылпиосы кадь ик пото.  

Галина Семёнова

Галина Марковалэн кылбуръёсыз

Мон улонын ӧвӧл куно

Усё куаръёс, ортчо аръёс,

Мургес луо кисыриос.

Кузь уйёсы уг лу изем,

Малпанъёсты пужнэ сюлэм.

Чота, кӧня лэсьтӥ сьӧлык,

Тырмиз-а семьялы саклык,

Кинлы верай кӧтӝож кылъёс,

Кӧня-о вал урод ужъёс,

Ваньзэ вуттӥ-а лэсьтыны,

Сое ӝик-ӝик ӟыгыртыны.

Малпанъёсме, сюлэм, тон лэзь:

Инме ӝужаз котрес толэзь.

Мон улонын ӧвӧл куно,

Азьпалан ай ужъёс уно,

Вуттымтэзэ каро, лэсьто,

Кылбуръёсам ваньзэ сэртто.

 

 

Бубыли

Шыртыл котырын бубыли

Жадьытэк бурдыныз лопыръя.

Кожалод, курдатэк со али

Тыл бордысь шунытэз омыръя.

Я, эн лыкты тон туж ик матэ,

Бурдъёсыд жадёзы, сутскозы.

Уз но жаля нокин но тонэ

Я астэ ик янгыш карозы.

Валатскиз бубыли, кылзӥськиз —

Ӧз, ӧз сёты бурдзэ сутыны.

Ульчаысь пеймытэ ватӥськиз

Нуназе шундыя шунскыны.

Уӵые

Уӵые, лыз синмо уӵые,

Кытын тон та шулдыр чус уе?

Кыӵе тон садъёсын лобаськод?

Кинлы выль кырӟанъёс кырӟаськод?

Вунэтӥд шат шыпыт ӝытъёсты?

Сюлэмысь потӥсь пӧсь кылъёсты?

Я ыштӥд-а лыктон сюрестэ?

Я кысӥд-а гомась гизьыдэ?

Уг, уг изьы мынам сюлэмы,

Со уӵы гуръёсы выемын.

Оло нош, мӧзмемме тон шӧдод,

Вунэтэм сюрестэ но шедьтод.

Кызьпу

Шунды си васькиз музэ,

Кызьпуэз небыт вешаз.

Сайкатӥз солэсь умзэ,

Вайёсаз, лэся, кугӟаз.

Назьыльскиз баблес кызьпу,

Кӧлонзэ сэрыт улляз.

Ыркыт тӧл пельтылыку,

Вайёссэ лэзьяз, сыназ.

Егит ныл кадь, возь вылын

Со эктоз но бергалоз.

Тулыс куазь нош йырсияз

Вож лентаос думылоз.

 

 

Одно, одно пумиськом

Шур дуре туннэ васьки но

Мон вуи егит дырам.

Лызгырлы но, купанча но

Бинисько кадь пыд бордам.

Мылкыды инме тубе кадь,

Гадь тыр потэ кырӟаме.

Дас тямыс арес нылмурт кадь

Тонэ потэ адӟеме.

Куд-огез, оло, оске, дыр,

Яратон пересьмонлы.

Нош мынам сюлмы егит на —

Со оске пумиськонлы.

Одно, одно пумиськом на —

Тон монэ юн ӟыгыртод.

Мӧзмем синъёсын учкыса,

Сяська керттэт кузьмалод.

Удмурт Дунне
By Удмурт Дунне 21 июля, 2016 10:00 Updated