ФАП луоз, газ вуоз

Удмурт Дунне
By Удмурт Дунне 26 июля, 2016 10:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пичи Пурга ёросысь гуртоослэн сюлмаськонъёссы

Удмуртилэн Тӧроез Александр Соловьев таяз арняе вуылӥз Пичи Пурга ёросысь гуртъёсы. Эскериз, кызьы мынэ Пуро-Можгалан ФАП лэсьтон, кенешиз гурт калыкен, пумиськылӥз Брангуртысь песянайёсын.

NIK_9248 фото Карипов Э

Брангуртысь песянайёсын пумиськон.

Пуро-Можга гуртын 396 улӥсез, ФАП-сы татын пичи но вуж ини, нош ёрос больницаозь 33 иськем луоз. Кылем арняе та гуртэ пуктыны кутскизы выль эмъяськон пункт. Республикаысь кивалтӥсьёс вуозы шуыса тодэмзы бере гуртысь песяйёс шальтыр-шальтыр гинэ васькизы больница пала.

— Милям татын нырысь столовой вал, собере клуб каризы, пичи азяз — ФАП-мы. Фельдшермы Чушъялова Елизавета Николаевна милемлы висьыны уг сёты, гуртоосмылэсь тазалыксэс 31 ар эскерыса возе ни, пичи нылпиосты арнялы быдэ учке, — шуэ Нина Романова.

— Лизамы-а? Ой, туж умой, туж умой, нокызьы шуыны ик, — вераськонамы итӥське Анастасия Мишкина. — Алигес урод луи, фельдшермылы звонитьтэме уг луы, ярам, огезлы нылылы кари. Со ивортэм ини но, Лизамы вуиз ведь дорам. Выль ФАП гуртамы туж кулэ ни вал. Тани кылем арняе лэсьтыны кутскизы, чар! гинэ ужало, арнянуналэ но арня уг каро. Тазьы ик ужазы ке, ӝог вуттозы, — шумпотэмзэ уг ваты 75 аресъем песянай.

Туэ пуро-можгаос гинэ уз, шумпотозы мукет гуртъёсын улӥсьёс но. Удмуртиысь тазалыкез утёнъя министр Алексей Чуршин верамъя, 1-тӥ куарусёнозь шаерамы 25 выль ФАП усьтӥськыны кулэ.

— Матысь аръёсы Удмуртиын 76 выль фельдшер-акушер пунктъёс кылдозы, эшшо 80-зэ быдэсак выльдоно. 24-тӥ августозь Пуро-Можгаысез юрт вуыны кулэ ни. Со шунтӥськоз электроен. Татын луоз физиоаппаратура но. Адямиослэсь тазалыксэс юнматыны, нырысетӥ юрттэт дыраз сётыны фельдшер мед быгатоз шуыса, эмъян тӥрлык гинэ 637 сюрс манет тыр басьтэмын луоз, — вераз Алексей Чуршин.

Лэсьтӥськонлэсь мынэмзэ эскериз Александр Соловьев. Строительёсын вераськемез бере кивалтӥсь кенешиз гуртоосын.

Тӧроен вераськыны клуб азе люкаськизы гуртоос.

Тӧроен вераськыны клуб азе люкаськизы гуртоос.

— Шаерамы али котькуд ёросын та выллем ФАП-ёс лэсьтӥсько. Эмъяськон юрт вуэм бере мон нош ик дорады лыкто на, учко, кыӵе со пӧрмем. Но ойдолэ кенешом: выль ФАП татын усьтӥськоз, но тӥ уд виселэ, — сӥзиз Александр Васильевич.

Тӧро тунсыкъяськиз, мар эшшо сюлмаськытэ калыкез. Гуртоос шыпыт ӧз улэ.

— Газ кысконо, сюресъёсмес тупатоно, выль клуб но туж кулэ. Егитъёс гуртамы ужаны кылё, нош пуктӥськыны музъем басьтыны уг быгато, — шуо «Жильыртӥсь ошмес» ансамбле ветлӥсьёс.

Александр Соловьев ас кылзэ вераз:

— Республика бадӟым, клуб возьмано луоды, нош чагыр эстӥськонэн юанэз ӝегатэк сэрттоно-пертчоно. Гуртоос сотэк но быдэс ар ужало, сотэк но сюлмаськонъёссы уно, мозмытоно калыкез толлы пу дасянлэсь. Пуро-Можгае 20 иськем пала кыстӥськись газопроводэз лэсьтон ужъёс мытэмын луозы ини вуоно арын. Озьы ик выльдозы гуртысьтыды нылпи садэ нуись сюресэз, шобыртозы кӧльыен-луоен.

Пуро-Можгаысен Александр Соловьев кожиз Брангуртэ. Пыраз Дун-чылкыт Тройчалы сӥзем храме. Михаил баӵко Тӧролы кузьмаз Матрона Московскаялэсь оброссэ, нош Александр Васильевич выль храмлы — Инмар Анайлэсь Тихвинская мудорзэ. Гуртысь клубын Тӧро пумиськылӥз Брангуртысь песянайёсын но ансамбльлэн кивалтӥсеныз Ольга Туктареваен.

— Брангуртысь песянайёс тыршемен, кылдӥз татын выль черк. Мон соосын 7 ар талэсь азьло тодматски, со дырысен гуртлэн улонэз умой пала воштӥськиз. Тау соослы, — шуиз Александр Соловьев.

Песянайёсын вераськыкуз ик, Тӧро пусйиз: Брангуртысь черк котырез выльдон, чебер карон понна 250 сюрс манет тыр юрттэт висъяськоз.

Галина Семёнова

Туспуктӥз Э. Карипов

Удмурт Дунне
By Удмурт Дунне 26 июля, 2016 10:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<