Эгра ёросысь Бачкей: Али ке но ульчаын жильы куара кылӥське кадь

Удмурт Дунне
By Удмурт Дунне Июль 17, 2016 16:00

Эгра ёросысь Бачкей: Али ке но ульчаын жильы куара кылӥське кадь

IMG_7304Татӥ ветлэмын тодмо адямиос

Эгра ёросысь Бачкей гуртлэн аспӧртэм историез: 19-тӥ дауре татӥ Сибире ссылкае пыдын келяло вылэм каторжникъёсты. Соослы шутэтскыны татчы корка лэсьтӥллям. 

Совхоз быриз — калык кошкиз

Тани ма вера гурт сярысь Комсомолец муниципал кылдытэтлэн йырыз Вера Стрелкова:

— Гуртын 108 корка,  пропиская 314 улӥсез. Азьвыл та гурт «Игринский» совхозэ пырылӥз. Совхоз быриз, калык ужтэк кылиз. Бачкей гуртын туннэ нуналлы тужгес но мӧйыосыз луо Раиса Корепанова но Нина Шатунова. Кыназы ик соос 1935-тӥ арын вордскемын. Гуртын нулло Чирков, Тугбаев, Корепанов, Волков, Агафонов, Пойлов но Дерендяев фамилиосты. Гуртоослэн нимысьтыз старостазы ноку ӧй но вал. Отын  калыкен ӟеч кусып возе арлыдоослэн кивалтӥсьсы Татьяна Ежова.

IMG_7269

Почтаын оломаин но вуз каре Н. Агафонова.

Гурт шорын ик магазин, почта но кык этажъем школа сыло. Ӧжытак выллань тубыса, клубе вуоно. Нылпи садзы школаен одӥг липет улэ интыяськемын. Вазен татын асьсэлэн шор ёзо школазы вылэм, бускель гуртъёсысь нылпиос интернатын кӧласа ик улӥллям. Совхоз бырем бере калык Эгра посёлоке, Иже но музон интыосы улыны кошкылӥллям. Гуртэ кылемъёсыз, шоро-куспо арлыдоос, Эграла, пе, ветло на ужаны. Школазы покчи классъем гинэ кылем на. Бадӟым нылпиосты автобусэн Эгра школае нулло. Гуртысь школаен но нылпи садэн  кивалтэ Валентина Тугбаева. Медпунктсы та гуртын ӧвӧл, висисьёс Эгра каргуртын эмъясько. Отчы рейсовой автобус ветлэ.

Почтаын Наталья Агафонова ужа. 2-тӥ арзэ гинэ ай, пе, газет люкылӥсько. Наталья Валентиновна кызь ар талэсь азьло татчы бызем. Ныл йыры, пе, Ижысь.

— Гуртын улон туж яра, нокытчы татысь уг кошкы ни, — шуэ со. — Аслад бакчаед, пудо-животэд. Кӧня мылыд потэ, сомында ик ворды. Скал возьманы нимысьтыз пастух медъяны кулэ. Нош ми кескич амал шедьтӥмы — возез езэн котыртыса, электропастух лэсьтӥм.

Е. Ларионова маде Сибире келямъёслэн улэм-вылэмзы сярысь.

Е. Ларионова маде Сибире келямъёслэн улэм-вылэмзы сярысь.

Юзыр-кезьыр

Музеен кивалтэ Елена Ларионова. Та юртэ ик интыяськемын библиотека. Отын Елена Корепанова ужа.

— Сибире мынӥсь каторжникъёсты шутэтскыны но кӧлтыны таӵе юртъёсы пыртыло вылэм, — вера Елена Валерьевна. — Милям но гурт шорамы ик сыӵе корка ӝутӥллям. Лэсьтэмын со 1877-тӥ арын. Бачкей гурт соку Глазов земствое пыре вылэм.

Юрт пушкы пырыса, мугор юзыр-кезьыр луэ, таӵе ик син азе пуксё сютэм, пыд йылысьтызы пограны дасесь, киоссы но пыдъёссы жильыен думылэм адямиос.  Куд-огез ним-тулъёссэс пуртэн яке гижыосынызы борддоре гожтыса кельтылӥллям. Син азе туж умой йӧто «Ковзинъ» но «Сандаковъ» фамилиос. Каторжникъёслы 3 бадӟымесь комнатаос лэсьтэмын. Котькудаз 30 адямиез кӧлтыны пырто вылэм. Собере юрт пичи потыны кутскем, шӧдске, со вӧзы эшшо сэрег итӥллям на.

Та юртын шутэтскизы каторжникъёс, дышетскизы пиналъёс, али ветло туристъёс.

Та юртын шутэтскизы каторжникъёс, дышетскизы пиналъёс, али ветло туристъёс.

Та интыын кӧня меда адями бырыны шедиз!? Татын али ке но валантэм но салкым омыр возиське, потӥз мыным. Корка пушкы пырыку ик, мугор сое шӧдэ.

— Мынэсьтым азьвыл музеен кивалтӥз Маргарита Бекмеметиева, — веранзэ азинтэ  Елена Валерьевна. — Мон татчы 2006-тӥ арын ужаны кутски. Дорамы трос  калык  экскурсие вуылэ. Алигес тани Балезино ёросысь нылпиос ветлӥзы. Соос татын кӧлыны но ӧз кышкалэ. Кытын ке но сюдоно ук соосты, ми кузь ӝӧк лэсьтытӥм ини. Экскурсие лыктӥсьёсты ӝукен сюдӥськом. Валамон, заключённойёслэн нокыӵе ӝӧксы ӧй вал. Соос пырак пол вылын сиськылӥллям. Ма, кӧлан интызы но, нары шуо соосты, миндэр-валесъёстэк вылэм. Адямиосты азбаре лэзьылӥллямтэ. Уйлы, педло потаны шуыса, пулэсь бадӟым ведра пуктылӥллям. Коридорын одӥг гинэ бадӟым гур сылэм. Толалтэ но гужем заключённойёслы сиён пӧзьтылӥллям ульчаын, та корка вадьсын ик, бадӟымесь пуртыосын.

IMG_7277

2 этажъем шокла эстӥське пуэн.

Татын кӧлыса, Сибире кошкемын нырысетӥез политической преступник Николай Радищев. Бачкейысь тюрьмаез эскерыны инспектор луыса вуылэм ӟуч писатель Михаил Салтыков-Щедрин.

1899-тӥ арысен арестантъёсты пыдын нуллӥллямтэ ни, чугун сюрес вылтӥ поездэн келяны кутскиллям.  1900-тӥ арын та юртэз школа кариллям. Мынам мамае но, ачим но, выны но татын дышетскемын ай. Соин ик со милемлы нокыӵе ик уг поты, школа ке школа. Нош палэнысь лыктэм адямиос, тӥляд татын маиз ке но валантэмез вань кадь, шуо. Уг-а, пе, пӧртмаськы? 1999-тӥ арын, выль школа пуктэмзы бере, та юртэз музей каризы.

Любовь Тихонова

Удмурт Дунне
By Удмурт Дунне Июль 17, 2016 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<