Быг-Быг: Алангасар но кӧтсэ тыриз

Удмурт Дунне
By Удмурт Дунне 21 июля, 2016 11:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
А. Лебедевалэн Алангасарез малпанъёсты быдэсъя.

А. Лебедевалэн Алангасарез малпанъёсты быдэсъя.

16-тӥ июле Быгыысь Быг-быг азбар нош ик калыкен тырмиз. Татын ортчиз фестивалез сӥё-дано  йылпумъян.

Азбар пумитаз пӧртэм площадкаосын. Быгы базаре гуртоос асьсэлэсь вузъёссэс поттӥллям. Нылпиосты тужгес но гочатэ «Чупырок» площадкаысь батут. Калык шудонъёс тунсыкъяськыто? Вамышты «Шудкаре». «Усточикар» доры матэктыса, киужъёслы палёмиськод. Асьсэлэн ужъёсынызы тодматыны,   мастер-класс возьматыны мылкыд кариллям шаерысьтымы кибашлыос. Дэбесысь киужъёсъя юртысь куроен ужась Е. Чермянина «Быг-быг» фестивале куинетӥзэ вуэм ни. Туж синмаськисько, пе, быгыослэн та ужрадзылы. Кибашлы нылкышно мылкыд карисьёсты куролэсь чингыли лэсьтыны дышетэ. Шуэ, кылем арын материалэ ӧз тырмы, соин ик туэ тросгес куро дасяса вайи.

Куноосты возьман сямен ужзы пӧзе пӧрасьёслэн но. Калыкез сюдыны оскемын Быгыысь нылпи садын ужасьёслы. Кивалтӥсьсы Е. Лебедева шуэ, 3 пурты сӥлен ӝук но 1 пурты шыд пӧзьтӥськом. Кылем арын но сомында ик дасям, пе, ваньмызлы окмиз. Азбаре пырон азьысь гурын табань пыжо. Пӧрасьёс шуо, нунал ӵоже 7 ведра котэм нянь кошкиз. Турын-куаръёсын чай но туж ческыт мынэ!

Ӵыныз потэ пӧраськонлы сӥзем музей юртлэн муръёысьтыз но. Куинь висъетэн коркаез йылаз-пумаз вуттыны чаклало Выль арлы, отын кунокуаез но луоз. Нош туннэ татын пересьмон пыжонъя мастер-класс ортчиз. Пӧраськон музее кожазы фестивале лыктэм кивалтӥсьёс но — гурт удысъя но сиён-юонъя министр А. Прохоров, нациосын ужан политикая  министрлэн воштӥсез Л. Соковикова, культурая но туризмъя министрлэн воштӥсез П. Данилов, Шаркан ёрослэн йырыз  В. Муклин но мукетъёсыз. П. Данилов пӧраськись кенакъёсты паймытыса кельтӥз пересьмонлы куарнянь куасаменыз, шуо, тӥни кинлэсь дышетсконо, пе, пӧраськыны.

Нош бадӟым гуръёс вӧзын но ӝӧкъёс котырын бергало пӧраськон фестивале вуэм куноос, кырӟась-верасьёс. Соос понна нимысьтыз 5 гур пуктэмын. Кин пӧраськемъёссэ сьӧраз ваем, нош кин али табазэ вӧя. Башкортостанысь Калтасы ёросысь Бадӟым Качак гуртысь «Зангари» ансамбле ветлӥсь апайёс та фестивале нырысьсэ вуиллям. Кивалтӥсьсы   Е. Шайметова шуэ, сьӧрамы, пе, номыр кутыса ӧм вуттэ, соин ик ӝог лэсьтоно сиён дасяно кариським, челатыш нимаське. Пызез вуэн, курегпузэн суралтыса дасям ыльняньлэсь (сылал но, сакыр но уг поно) пичи колӟоосты кӧсвӧй пӧлын ӝуась гур азьын пыжизы.

Пӧрамъёсты дунъяны мылкыд карисьёс коньдонзэс воштыны быгатӥзы быгыослэн валютазылы — быгъёслы: 1 быг сылэ 20 манет.  Быгъёс тужгес но трос люказы коми-пермякъёс, вуз каронъя но сервисъя техникумын дышетскисьёс О. Власова, И. Рыбьякова но Д. Корякин. Соос пӧразы коми-пермяк посикунчикъёсты но чырстурынлэсь юон. Вормисьёс пусъемын фин-угор пӧраськон фестивальлэн дипломеныз но кузьымен. Дипломъёс но синпель кузьымъёс, нянь колдыен пичи пу лопатаос, озьы ик сётэмын кырӟась-верась коллективъёслы.   Ужрадэз шулдыртонэ пыриськизы шаерысьтымы пӧртэм улосъёсысь ог 15 коллективъёс. Быгы муниципал кылдытэтлэн йырыз Н. Беляева шуэ, лыктыны мылкыд карисьёс уката но трос вал. Коньдонлы ёрмонэн потыны быгатӥллямтэ.

Вань та шулдыръяськонъёсты, возьмаськись сямен, синйылтыса возиз Алангасарлэн пулэсь йырыз, лэсьтӥз сое культура юртысь суредась А. Лебедева. Йыр огшоры вылымтэ: кидэ ымаз поныса, малпандэ быдэстыны куроно. та нуналэ Алангасарлэн но кӧтыз тыриз луоз ческыт фестивальлэсь.

Лия Малых

Туспуктӥз Надежда Касаткина

Удмурт Дунне
By Удмурт Дунне 21 июля, 2016 11:18 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<