Баллъёс маза уг сёто…

Удмурт Дунне
By Удмурт Дунне 1 июля, 2016 10:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Выпускникъёслэн кысык вакытсы ӧз йылпумъяськы на

Школаез туэ йылпумъям егитъёс ЕГЭ-ын люкам баллъёссэс лыдъяло ни. Нош вылӥ дышетскон заведениос кутыны кутскизы абитуриентъёслэсь куриськонъёссэс.

NIK_3258 фото Карипов Э

Горд аттестат басьтэм но ӟуч кылъя но математикая ЕГЭ-осын вылӥ баллъёс люкам егитъёсты ӟечкылан.

Одӥгаз  — 2, мукетаз — 117

Ваньмыз туж ӝог ортчиз кадь: жингыртӥз берпуметӥ гырлы, огез бӧрсьы мукетыз ортчизы ЕГЭ гожтон нуналъёс, собере пиналъёслы люкылӥзы аттестатъёс. Одӥгаз таӵе ужрадын кутсконысеныз пумозяз пуки — 5 час пала. Отысь басьтэм ӟеч мылкыды али но ӧз кысы на.

Ижысь 97 номеро школаын вал со. Отын аттестатъёс люкылӥзы 117(!) выпускникъёслы — элькунысьтымы школаос пӧлын тужгес бадӟымез выпуск. Нылъёс но пиос огезлэсь пӧртэм тузӥесь, соослэсь бере кылемзы потымтэ дышетӥсьёслэн но. Нош директор Ахтам Чугалаев 3 галстук керттэм, ява. Шуиз: 2-ез — выпускникъёслэсь кузьым, кыксы но куризы: аттестатъёсты люкылыку, одно керттэ.

Директор котькуд пиналэз сцена вылэ ӧте, котькудӥз сярысь шуныт кылъёс вера. Микрофонлэсь палэнэ кариськыса, котькудӥзлы сӥзёнзэ-ӵектонзэ ватса на. Паймымон, ваньзэ выпускникъёсты со тусын-буйын тодэ, тросэзлэсь покчи классъёсын дышетскон вакытъёссэ но вунэтымтэ.

— Одӥг пол адӟисько: коридор тыр викышъяса ортче пияш,  — тодаз вае со. — Мон — сьӧраз: мар меда луэм талы? Нош со, быльырась синкылиоссэ ӵушылыса, вера: «5» интые «4» басьтӥ…

Директор туж данъяське выпускникъёсыныз: покчи классъёсысен ик соос быгато ни, пе, ас азязы бадӟымесь ужпумъёс пуктыны. Эшшо одӥг пол валай: 2010-тӥ арын Россиысь вожвылъяськонын «Устоез директор» ним Ахтам Чугалаев юнме басьтымтэ!

Выпускникъёс понна ортчизы ни балъёс но. Тросэз шулдыръяськизы кафеосын, куд-огъёсыз ресторанъёсын. Вал школаосазы гинэ люкиськон ӝытэз радъясьёс — выпускникъёссы ӧжытэн.

Нош Яр ёросын берло кӧня ке аръёссэ ни быдэс ёросысь выпускникъёсты огъя балэ люкало. Отысь дышетонъя управлениысь валтӥсь специалист Наталья Барышникова верамъя, туэ соослэн 49 выпускниксы. Укан школаын — 2 кузя, Пудэмын — 4 кузя. Тужгес трос Ярысь 2 номеро шор ёзо школаын — 22 кузя. Выпускникъёслы радъямын вал Яр ёрос кузя круиз. Вуылӥзы Озёркае, Пудэме, Юдчиное…

Анай-атайёс туннэ но чотало на, ваньмызлы талы кӧня коньдон кулэ луиз… Городъёслэн 20 сюрс манетозь люкаськиз, гуртоослэн ӧжытгес.

Медаль понна — 11 ар

Нош нылпиос лыдъяло ни ЕГЭ-ын люкам баллъёссэс. Дышетонъя но наукая министерствоын йылпумъянъёс лэсьтыны уг дырто на. Кӧня выпускник ЕГЭ-ын 100 балл люказ, тодмо луоз, пе, 4-тӥ июль бере гинэ.

— Берлоосыз экзаменъёс ортчизы ай 30-тӥ июне гинэ, — вераз министерствоысь огъя тодон-валан сётонъя ёзэн кивалтӥсь Элеонора Семушина. — Угось берлолы тупатэмын на вал резерв нуналъёс. Вань 8 предметъя ЕГЭ гожтыны мылкыд карем егитъёс, уноез 5-6 предметэз бырйиз. Валамон, куд-ог нуналъёсы 2 экзамензы но тупалляз. Озьы соос резерв нуналъёсты кутоно луизы ни.

Но тодмо ни одно сётоно экзаменъёсъя тужгес трос балл люкамъёслэн нимъёссы: математикая соос 4 кузя, ӟуч кылъя — 11 кузя.

Горд аттестат басьтэм но ӟуч кылъя но математикая ЕГЭ-осын вылӥ баллъёс люкам егитъёсты ӟечкылаз ни Удмуртилэн Тӧроез Александр Соловьев. Резиденциын приём ортчытӥз, гадь бордазы бырттылӥз «За особые заслуги в учёбе» медаль.

— Та медалез басьтон понна мон 11 ар ӵоже тырши,  — вераз Дэбесысь Елизавета Максимова. —  Ӟуч кылъя ЕГЭ-ын 100 балл люкай, математикая — 86 балл. 9-тӥ классозь дышетски Уйвай школаын, 10-тӥ-11-тӥын — Дэбес шор ёзо школаын. Улӥ интернатын, доре шутэтскон нуналъёслы гинэ бертылӥ.

Ваньзэ тае Лиза ортчем дырын вера ни. Нош азьланьын — вылӥ дышетскон заведение. Ижысь медициная кун академие куриськыны чакла, нылпи эмъясь, пе, луэме туж потэ. Туж вольыт вераське удмурт сямен  — оске, азьлань улоназ кылзэ тодэмез туж юрттоз ай.

— Удмуртилэсь палэнэ кошкеме уг поты, — пусъе Елизавета. — Удмуртилэн Тӧроез А. Соловьев вера ук: Удмуртиын кадь милемын нокытын уз данъяське!

Йылон но кулэсмон

Удмуртиысь вылӥ дышетскон заведениослэн приёмной комиссиоссы ужаны кутскизы ни 20-тӥ июньысен. Куд-огез ЕГЭ-ын люкам баллъёссэ уг на ке тоды, кин ке документъёссэ вузъёсы вуттӥз ни.

Туала выпускникъёслы котьку сямен ик луонлык сётэмын: куриськон троссэ гожтыны луэ 5 вузэ, 3 специальностья. Но дышетонъя но наукая министр Алексей Мирошниченко верамъя, берло дыре данакез егитъёс уг пазясько, соос умой-умой тодо, кыӵе специальность басьтэмзы потэ.

Мар вылез асьме вузъёсын? УдГУ-ын бюджет чотын дышетскыны кутозы 2 сюрс 737 муртэ, кылем арынлэсь со 445-лы тросгес. Шумпотымон ивор вуоно математикъёслы, физикъёслы, химикъёслы, биологъёслы — та специальностьёсъя бюджет интыос йылэтэмын. Но со дыре ӧжытгес кутозы вуоно экономистъёсты, юристъёслы.

ИжГТУ-ын бюджет интыос ог 5 процентлы кулэстэмын, соос воксё кылемын ќвќл «Экономика», «Менеджмент», «Торговое дело» специальностьёсъя.

Кќнялы ке интыос кулэстэмын ИжГСХА-ын но. Кылсярысь, вуоно экономистъёсты туэ отчы дунтэк уз кутэ ни. Кылем арын 15 инты вал на.

Ижысь медициная кун академиысь ог 60 процентэз интыос висъяськозы направлениосъя лыктӥсьёслы. Оглом 355 бюджет интыос висъямын.

Вылез но вужез

Элькунысьтымы вузъёсы кылем егитъёслы, ЕГЭ-зэс умой сётэмын, олимпиадаосын вормылэмын ке, элькун Тӧролэн фондысьтыз толэзьлы быдэ стипендизы борды ватсаса 5 сюрс манет сётӥське. 2014-тӥ арын сое басьтӥз 68 мурт, 2015-тӥын — 274 мурт. Та программа азинтӥськоз туэ но.

Тросэзлэн егитъёслэн экономист луэмзы потэ. Кылем  арын УдГУ-ысь та специальностья тужгес бадӟым конкурс вал — одӥг интые 47,9 мурт куриськиз.

2017-тӥ арын сентябрьысен УдГУ-ын усьтӥськыны быгатоз Религиоведениея кафедра, та сярысь ужпумез али университет эскере Удмурт Епархиен ӵош.

Туэысен абитуриентъёслэсь уг куро ни  медсправка, ИГМА-ысь но ИжГТУ-ысь куд-ог специальностьёсын сяна. Озьы егитъёс ог 5 сюрс манетсэс шыръяны быгато.

Малпаськыны дыр

Кытчы дышетскыны пырыны малпаськоды вал, отчы баллъёсты уг тырмо ке, документъёстэс мукет специальносте сётыса, эскере. Нош вуоно араз, оло, выльысь эскероды на азьло малпам удыстыя куриськыны — оло, арды но юнме уз ышы.

Вуоно арын выльысь ЕГЭ гожтэ. Баллъёсын сертификатлэн кужымез 4 ар ӵоже возиське. Соин ик кыкетӥ полаз уката ӧжытгес баллъёсты луизы ке, соос лыдэ уз басьтӥське.

Колледже пырыса, эскере. Кылсярысь, вуоно дизайнеръёслы, ювелиръёслы со туж пайдаё луоз.

Специальностьтылы матын луись уж шедьтэ. Уждунэз пичи шуыса, эн учке, со понна профессидыя опыт басьтоды, умой-умой валалоды: зэмзэ ик-а со тӥляд удысты.

Элина Кумачёва

Туспуктӥз Э. Карипов

Удмурт Дунне
By Удмурт Дунне 1 июля, 2016 10:40 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<