Ӟатчаын воректӥз «Кизили»

Удмурт Дунне
By Удмурт Дунне Июль 13, 2016 09:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
райпо

Выль магазинэз усьто А. Васильев, муниципал кылдытэтлэн йырыз Н. Сентебова (бурысез).

Берло дыре гуртъёсын шер кылдо выль магазинъёс. Но Эгра ёросысь кооператоръёс 30-тӥ инвожое, Кооперацилэн калыккуспо нуналэз азьын, Ӟатча  черкогуртын «Кизили» магазинзэс усьтӥзы.

Эграысь райпо быдэс Удмуртпотребсоюзын адӟем карымон ужа. Миым Зура черкогурт сьӧрысь пичи гинэ Тюпти гуртэ магазин усьтӥз. Калык соос дӥне басьяськыны шумпотыса лыктэ. Ӟатчаын магазин усьтон но зэмос праздниклы пӧрмиз: егитэз но, мӧйыез но лыктӥзы. Культурая юртысь артистъёс сылалэн-нянен но шулдыр кырӟанъёсын пумитазы райпоысь кузёосты. Выль магазинэз усьтӥзы Ӟатча муниципал кылдытэтлэн йырыз Надежда Сентебова но райпо кенешлэн тӧроез Анатолий Васильев.

— Кооператоръёсмы милемды ноку уг вунэто, котьмаин юртто, мултэс йӧл-сӥльмес басьто, — вера Надежда Николаевна, — соин ик бадӟым тау карисько Эгра райполэн кенешезлэн тӧроезлы Анатолий Васильевлы. Со быдэс ёросын магазинъёсты выльдон сярысь сюлмаське. Озьы арысь аре йылэ «Кизили» нимын магазинъёслэн лыдзы. Милям но выль «Кизили» вордӥськиз. Чебер магазинэ пыдъёс асьсэос кыско. Туннэ дорамы бускель пичи гуртъёсын, кылсярысь, Малягуртын, улӥсьёс басьяськыны вуизы ини. Эграозь милям 35 иськем луоз. Тылое  ветлыны сюрес урод.

— Кооперация — дунне вылын туж вашкалаез удыс, — вера Анатолий Андреевич. — Валля арын Эграысь райполы гинэ но 110 ар тырмиз ини. Ми гурт калыкен кусыпъёсмес ялан юнматӥськом, пайщикъёслэн кенешъёсазы басьяськисьёслэсь сётэм куронъёссэс котьку лыдэ басьтӥськом. Ӟатчаос кемалась магазин лэсьтыны куро ни вал. Удысмес азинтон, магазинъёсмес выльдон капчиен уг сётӥськы, уката ик али, кризис вакытэ. Но быгатӥськом ке, со пайдаен берытске. Ми лыдъямы: выльдэм магазинын вуз карон 1,5-2 поллы йылэ. Ми ум учкиське бадӟым супермаркетъёслэн ужамзы шоры. Рынокын милям асьмелэн интымы. Котькуд гуртэ, ёрос центрлэсь кыдёкын-а со, матын-а, сиён-юон но мукет вузъёс вуттыны сюлмаськиськомы. Автолавкаосмы но графикъя ужало, адямиос доры дыраз вуо.

Геннадий Романов

Туспуктӥз В. Беломорских

Удмурт Дунне
By Удмурт Дунне Июль 13, 2016 09:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<