Атай армиын дыръя

Related Articles

• Мар сярысь вераськиз Александр Бречалов меӵак эфирын? 0 21.Янв
• Ижысь вокзалэ мина понэмын ӧй вал 0 27.Июл
• Сальялась шаян песянайёс 0 05.Окт

 Нылы вузын дышетскон висказ семья кылдытӥз, нылпи ваёно луиз, ужаса ӧз вутты. Картэз, нуныезлэсь вордскемзэ возьматэк ик, армие кошкиз. Тодэме потэ, кыӵе ке пособиос чакламын-а нылылы? Озьы ке, кытчы вазиськоно юрттэт басьтон понна?

Екатерина П., Пичи Пурга черкогурт

Валэктэ Калыкез утён, семья но демография политикая министерствоысь социальной выплатаосъя ёзлэн кивалтӥсез Людмила Ившина.

— Федерал законъя ужасьтэм нылкышноослы (ужзэс ыштэмын ӧвӧл ке предприятизы пытсаськемен сэрен) нуны ваёно луэмзы но вордэмзы понна (пособие по беременности и родам) пособие уг тыриськы. Но шаерамы кутэмын куд-ог категориосысь адямиослы улон-вылонын юрттэт сётон сярысь закон. Соя нокытын ужасьтэм но пинал витись нылкышноослы (сроксы 180 нуналлэсь ятыр ни ке) висъяське огпол сётӥськись пособие, солэн быдӟалаез 6 сюрс манетлэсь ятыр. Но со висъяське, семьялэн шоро-куспо доходэз ичигес ке Удмуртиын улыны тупатэм минимумлэсь. Та пособиез басьтон понна нылды мед вазиськоз ёросысьтыды  калыкез улон-вылонын утёнъя ёзъёсы.

Шуиськоды, нылдылэн кузпалыз армие кошкемын. Воргоронъёслэн семьяоссылы кун ласянь юрттэт висъяське. Нуныгердлы 180 нунал тырмемын ни ке, военнослужащийлэн кузпалэзлы одӥг пол сётӥське пособие — 28 сюрс манет пала. Со сяна, нылпиез вордскем бере нылкышнолы толэзьлы быдэ тыриське 12 сюрс манет, картэзлэн службаез йылпумъяськытозь. Та пособиез басьтон понна вазиськоно калыкез улон-вылонын утёнъя ёзъёсы. Эн вунэтэ кузпалдылэн частьысьтыз служба нуэмез сярысь справка курыны.

Нылды нокытын ужамын ӧвӧл. Но нылпизэ утись кышномуртлы — ужа-а со, уг-а — толэзьлы быдэ одно ик тыриськыны кулэ пособие, пиналызлы 1 но ӝыны арес тырмытозь. Сое басьтон понна вазиськоно калыкез улон-вылонын утёнъя ёзъёсы. Нырысетӥ нылпиез утем понна толэзьлы быдэ сётӥськись пособилэн быдӟалаез та вакытэ — 3 сюрс 300 манетлэсь ятыр, кыкетӥ яке со бӧрсьы пиналъёсын пукем понна — 6 сюрс 600 манетлэсь ятыр. Пусйыны кулэ, та лыдпусъёс арлы быдэ вошъясько инфляцилэн быдӟалаезъя.