Санкт-Петербургын ужа «Удмурт Кенешлэн» ёзэз

Удмурт Дунне
By Удмурт Дунне 6 июля, 2016 15:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
pWw71zKvVbg

Уйпал шоркарын трос пӧртэм выжы калыкъёс уло.

Туннэ нуналлы удмуртъёслэн даслэсь трос диаспораоссы лыдъясько. Тужгес тодмоосыз — Татарстанын, Башкортостанын, Свердловск, Томск, Киров улосъёсын, Москваын. Нош 1 ар талэсь азьло удмуртъёслэн огазеяськонзы кылдӥз Санкт-Петербургын.

Бадӟым городын удмуртъёсты огазеяны малпанэз кылдӥз Татьяна Серебренниковалэн. 9 ар талэсь азьло со семьяеныз ӵош (3 пиналын!) татчы улыны выжиз Дэбесысь. Шаплы нылкышно туж ӝог уж шедьтӥз, интыяськиз школае, но ялан культура удысын тыршемын бере,  ӧз вунэты дышем ужзэ но: бордаз эш шедьтыса, кутскиз  пӧртэм шулдыръяськонъёс ортчытъяны. Ваньмыз умой кадь — ужлэсь шокчыны маза ӧвӧл, но кытын ке  пушказ пукиз дорлэсь мӧзмон, аспалъёсыныз пумиськыкузы, вераськыса кӧтсы ӧз тырылы. Озьы нырысь малпаз «ВКонтактеын» группа кылдытыны — мылкыдзэс кисьтылӥзы вотэс пыр, собере пумиськылыны кутскизы. Ӝоген эшъёс 50 мында люкаськизы но, Татьяна Евгеньевна вазиськиз Санкт-Петербургысь Выжы калыкъёслэн (национальностьёслэн) юртазы, соосты пусйыны курыса. Татын выль огазеяськонлы  шумпотӥзы. Уйпал шоркарын трос пӧртэм выжы калыкъёс уло, соин 10 ар талэсь азьло кылдытэмын вал соослы юрт. Туннэ татын ужало 30 пӧртэм национальной  коллективъёс.

ge8V7YjMaf8

Удмурт делегациез Санкт-Петербургын пумитало.

Санкт-Петербургысь удмуртъёсын пумиськыны муг сюриз июнь шорын, Финляндие фин-угор конгрессэ мыныку. Ужан нунал шоры учкытэк, бӧлякъёсмы лумбыт дырзэс ортчытӥзы удмурт делегациен. Вазь ӵукна ик аэропортын арганэн, перепечен пумитамзы шоры тросэз вожъяськыса учкизы. Удмурт делегациез соку ик нуизы Выжы калыкъёслэн юртазы, отын ортчиз котрес ӝӧк — Санкт-Петербургысь национальной политикая департаментысь ужасьёс но удмурт делегация вераськизы  калык огазеяськонъёслэн туала улонын интызы сярысь.

— Туала вакытэ калыкъёс одӥг интыын гинэ уг уло ни — соос пазьгисько дунне тыр, но кин ке, кӧня ке ар улыса, ас выжыоссэ вунэтэ, мукетъёсыз со борды уката юн ӝабырско, ас лулчеберетэнызы мукет интыез но узырмыто. Санкт-Петербургмы милям со ласянь но туж узыр — калык огазеяськонъёс шулдырто вань праздникъёсмес. Удмуртъёс «пиналэсь» ай ке но, туж шаплыесь. Соос котьку мыло-кыдо пырисько городын ортчылӥсь бадӟым ужрадъёсы, нимаз ансамбльзы ӧвӧл ке но, артистъёс музэн кырӟало. Нош юаськыны ӧдъяд ке удмуртъёс сярысь, дугдытэк мадёзы — сокем данъясько ас выжыосынызы, — вера Выжы калыкъёслэн юртэнызы кивалтӥсь Елена Кузнецова.

09Z0ozni7iU

Санкт-Петербургысь Национальностьёслэн юртсы но «Удмурт Кенеш» огазеяськон валче ужан сярысь тупанкыл кутӥзы.

Та юрт но «Удмурт Кенеш» огазеяськон кутӥзы валче ужан сярысь тупанкыл. Озьыен, азьланяз кусыпъёсмы уката юнэсь луозы.

Вераськон азинскиз тыро ӝӧк сьӧрын — дормылэсь палэнын но ми гусъяським зыретэн табанен, ӝуко мильымен, перепечен. — Ӟеч малпанъёсмы туж трос, — вера петербург удмуртъёслэн азьветлӥсьсы Т. Серебренникова. — Кылсярысь, удмурт кылэз дышетонъя курсъёс усьтыны. Удмурт шаерын улыкум, котырам сомында удмуртъёс вал, но кыл сярысь ӧй но малпаськылы, нош палэнэ кошки но, удмуртэз дышетэме потыны ӧдъяз. Огазеяськонамы трос сыӵеос, но вань усточиосмы но — Ува ёросысь Узей-Тукля гуртысь Ангелина Даничкина (Бекчурина), Кезысь Ирина Ложкина. Та нылъёс — мынам матысь юрттӥсьёсы, кыкназы дышетон удысын ужало, быгатысалзы мукетъёссэ но визьноданы.

Санкт-Петербургысь делегация элькун Герберын.

Санкт-Петербургысь делегация элькун Герберын.

Милям огазеяськонмы нырысь кылдӥз бӧляк выллем, но туэ «Удмурт Кенешлэн» ӧтчамаз Иже вуылыса, мон пушкын мукет адями сайказ кадь — мынам удмуртлык понна маке лэсьтэме потэ! Котьку яратылӥ удмурт кырӟанъёсты, но ноку ӧй малпалля, со Питерын улӥсьёслы тунсыко луоз шуыса. Огаз-кыказ празднике мынӥськом, сцена вылэ потӥськом но — милемлы синмасько, эшшо но эшшо кырӟаны куро. Вылаз ик, Выжы калыкъёслэн юртсы котькуд кичӧлтонмылы дурбасьтэ. Соин ик ми кыдёкын ке но, ум вунэтӥське кытысь луэммес, данъяськиськом асьмелэн пӧртэм-лыкенымы.

Зинаида Рябинина

Удмурт Дунне
By Удмурт Дунне 6 июля, 2016 15:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<