Александра Шкляева: Улон но Мон

Удмурт Дунне
By Удмурт Дунне Июль 31, 2016 15:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Шкляева

Александра Шкляева.

Верос

Туннэ университетын куать пара пуконо луиз, эшшо ик эшъёсылэсь ӝегаса кыли. Огъяулонние бертыны потӥ огнам акшан вакытэ.  Дугдылонние вуи гинэ, 12 номеро автобус вуиз. Шумпотӥ: пуксён интыос трос. Интыяськеме бере гинэ валай: автобусын мон чылкак огнам. Дорам кондуктор вуиз. Ворттылон билетме курем интые, шуиз:

— Ми тонэ кемалась возьмам…

— Монэ? Малы? — кышкай мон.

Валэктӥсь ӧз луы. Котырак ваньмыз воштӥськиз. Автобус укноос пыр пиштӥсь шунды шуак ышиз, пиялае зор шапыкъёс шуккиськемен, автобус сылмиз кадь. Йыр вадьсам мӧзмыт шаугетэм кылӥськиз. Сылӥсько ӝужыт, кужмо бадяр улын. Писпулэн вайёсыз тӧлъя дырекъяло, кышкатскем угыосыз йылсо куаръёс улэ ватскиллям.  Пасё-пасё сюресъёс кельтыса, бадярлэсь егит мугорзэ  нумыръёс портӥллям.

Бадяр копак огназ, мон но огнам. Котыр зоре, чилекъя, гудыръя. Нош мон уг котмиськы. Йырме ӝутӥ. Зор шапыкъёс мон вадьсын кылдо но, вылам усьытэк, кытчы ке ышо, быро. Паймоно кадь, нош мон уг паймиськы. Малы? Уг тодӥськы. Мыным татын ваньмыз тодмо. Бадяр но, котырысьтыз турын но, кыдёке кыстӥськись бусы но, со шортӥ кый музэн кошкись сюрес но. Мон та интыын куке но вал ни. Оло, уйвӧтам? Оло, кыдёкысь пинал дырысь суред йырам кылиз? Нош туннэ татын ваньмыз мукет.

Бадяр котырын куке но будӥзы писпуос. Сисьмем лӥялъёс пӧлысь тодманы луэ на льӧмпуэз — котыраз сяськаосыз кыстасько. Паймымон, кызьы соос такема возиськиллям. Артэ ик кызьпу туй кылле, палэнынгес лусьтыр-ласьтыр костасько пипу вайёс. Куке но ваньмыз со бадярлэн эшъёсыз вал. Нош ма муген соос быриллям, валантэм.

Куазь туж окыт кариськиз. Бадяр вадьсытӥ ортчись пилемъёс, ог-огзы борды шуккиськыса, ош сямен бурсйизы. Чилектэм, вож шормуӵ борды йӧтскытэк, пытьы кельтыса, усиз палэнынгес бызись шурлэн ярдураз. Кытысь со шур кылдӥз, али гинэ отын кӧсам музъем вал? Бызьыса мынӥ ярдуре. Матэктэмме шӧдыса, уртчыны турттӥсь шур пуксиз. Вуэз пож, кутылыны уг яра, дыр. Нош улланьын но вылланьын со озьы ик пӧзьыса сямен бызе. Бульыр вазись ву тулкымъёс кот киосынызы ярдурез кырмало. Нош ик чилектӥз, таяз учыре со мукет ярдуре шуккиз. Соку ик нырам ӵын зын вуиз. Шур сопалась кӧс турын вылтӥ тэтчаллясь тылсиос гомак луизы но, Феникс сямен, кӧшкемыт горд бурдъёсынызы, пӧсь тылыоссэс пазяса, котырысь дуннеез шобыртӥзы. Шур шукыосын пазяськыны кутскиз. Тыл бурдъёс тапал ярдуре выжыны ӧз дӥсьтэ. Нош сопалась дауръем писпуос но, выль пушъетъёс но вань лулосъёсын валче гомась тулкымлэн ньылоназ пеньӟизы. Зор но ӧз юртты тылэз кысыны. Та дырозь сюлэмме зӥбись из, пукон интызэ кельтыса, ньылонам тубиз. Ымдуръёсам кузьыт маке вуиз — синву.

Кема меда сылӥ — уг тодӥськы, сазьтӥськи сопал ярдурысь дунне ӝуамысь дугдэм бере. Вож-вож турын интые сьӧд му кылиз. Тыл ваньзэ быдтӥз! Номыре но, нокинэ но ӧз жаля…

Бадяр дорысь мон пала вуиз тӧллэн шуныт шокчемез:

— Эше…

Мар та? Оло,  татын эшшо кин ке вань на? Берытски. Бадярлэн куаръёсыз эктэмен, шудэмен, пумитам дыртытэк гинэ ыркыт тӧл пельтӥз. Пелям нош ик куара чузъяськиз:

— Чаль дорам.

Марзэ-созэ валатэк, бадяр доры дыртӥ. Писпу пала вуыса, куара золгес кылӥськиз ни:

— Эн куректы, эше. Сопал ярдур кемалась бырон калэ вуэ ни вал. Уй кучыранъёс кытысь ке вуизы но отын улӥсьёслэсь йырвизьзэс сынаса ортчизы. Сьӧд ужъёссэс тапала келяса ӧз вуттэ, мон пумитазы султӥ — ӟечсэ утён понна  шур кылдытӥ. Тон но татчы юнме ӧд сюры…

Со куспын бадярлэн йылысьтыз бергаса васькись бурд киям лэзиськиз. Валатски, со пушкын вож шормуӵлы улон кужым сётӥсь тысь. Бадярлэн выжы котырысьтыз сюез киосыным палэнтӥ но бурдо тысез отчы соги. Со дыре ик котырысь омыр сайкытаз. Кӧшкемыт пилемъёс бадяр вадьсысь пасьтана пазьгиськизы но, чагыр ин ымнырзэ усьтӥз. Шунды тылсиос куаръёссэ бичатэмен, писпу шонерскиз, вайёссэ вӧл-вӧл лэзиз. Мерттэм тысь интыысь пичи будос кылдӥз но, котырысь ваньмыз воштӥськыны ӧдъяз — музъемысь выль пушъетъёс кылдӥзы. Бадярлэн эшъёсыз, но льӧмпуэн кызьпу, улӟизы. Инмын кыӵе ке тылобурдолэн чирдэмез кылӥськиз. Бульыр пӧзись ву но чалмытскиз, чылкытаз. Сопал ярдур гинэ сьӧдмыт учке. Куке но вожектоз меда кулэм музъем? Оло, выль мерттэм пушъетлэн бурдыз кужым шедьтоз шур сьӧры лобӟыны?

Оскисько, ӧсэ йыгаське выль улон. Мур-мур шокчыса, осконме сопал ярдуре келяй. Сюлмы шыпытак вераз: «Ваньмыз тон киын». Валай: улон —  со МОН!

Удмурт Дунне
By Удмурт Дунне Июль 31, 2016 15:51 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<