Адӟонтэм адӟонъёсы

Удмурт Дунне
By Удмурт Дунне 20 июля, 2016 14:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
33 Елизарова З

Зинаида Елизарова вордӥськиз Пичи Пурга ёросысь Гожня гуртын.

Вужерысь — шарае

 «Удмурт дунне» газетлэн одӥгез мыло-кыдо лыдӟисез но авторез луэ Пичи Пурга ёросысь Гожня гуртысь Зинаида Елизарова.  2009-тӥ арын поттӥз «Сюлэм гурлан» бичетсэ.

Зинаида Елизарова вордӥськиз Пичи Пурга ёросысь Гожня гуртын. Уно аръёс ӵоже ужа ни Гожня школаысь библиотекаын. Кылбуръёсыз, иворъёсыз, очеркъёсыз печатласько «Ӟечбур!» но «Удмурт дунне» газетъёсын. Ачиз сярысь Зинаида Елизарова вера:

— Вужерынгес улӥсь адями мон.  Сюлмам нуллэм чуръёсме гожъяны бадӟым мылкыды вал егит дыръям ик, но, юромо пуксьыса, кылбур ӧй гожъялля. Со озьы луыны но кулэ ӧвӧл, дыр. Но аспӧртэм мылкыдъёс-малпанъёс пушкын кыллё-кыллё, кисьмало но шуак кыре курисько. Соосты кагаз вылэ кисьтӥськод но эркынак шокчиськод кадь. 30 ар талэсь азьло эшелы  кылбуръёсыным гожтэт лэзиськем вылэм. Мон соосты вунэтӥ ни вал, нош эше утем.  Кемалась гожъяськисько вал ке но, 45 аресэ тырмем бере гинэ дӥсьтӥ чуръёсме возьматыны кылбурчилы, «Ӟечбур!» газетын ужасьлы Антонида Ермолиналы. Со бурдъямен, потӥз кылбур сборнике. Азьло но али гожтэм чуръёсме учкыса, берлоосыз  вольытэсьгес пото. Но мылкыдъёсы уг воштӥсько.  Кылбуръёсам валтӥсь малпанэз сыӵе ик — малы мон вордӥськи  дунне вылэ, та юанлы валэктон утчан, нылкышно сюлэмез усьтон, — шуэ Зинаида Елизарова.

Зинаида Семёновна верамъя, со али но дӥсьтытэк гинэ кылбуръёссэ мукетъёсызлы возьматэ. Ас поннам гинэ гожъяськисько ук, радзэ уг валаськы, пе.

— Ми кадь авторъёслы, гуртъёсысь огшоры нылкышноослы, критикъёс кулэ. Мед соос вералозы: гожъяськоно-а, ӧвӧл-а, пӧрме-а, уг-а. Туж шумпотысал, валэктысалзы, индылысалзы, малпанзэс верасалзы ке, — мылкыдзэ усьтэ Зинаида Елизарова.

Кылбурчи, «Ӟечбур!» газетлэн  валтӥсь редакторезлэн воштӥсез Антонида Ермолина верамъя, З. Елизарова юнме возьдаське.

— Зинаида Семёновна, трос лыдӟиськем-гожъяськем сяна,  мукетъёссэ книгаен эшъяськытыны быгатэ. Кылбуръёсаз югытлыке кыстӥськонэз шӧдӥське, — шуэ Антонида Васильевна.

Галина СЕМЁНОВА

Зинаида Елизаровалэн кылбуръёсыз

Улонэ — кылбуръёсы

Чуръёсы-кылбуръёсы,

Тӥ сюлэм висёнъёсы,

Адӟонтэм адӟонъёсы,

Чигымтэ чиданъёсы,

Чепыллясь малпанъёсы,

Вормонтэм вормонъёсы.

Нош верано ке зэмзэ —

Мынам быдэс улонэ.

 

Шӧдэ меда?

Ӝужалоз, пиштоз шунды,

Зарни тылсизэ пазьгоз.

Пазьгоз ке но, уз ке но,

Со уз вуы мон доры.

 

Ӵук лысву но ву вылэ

Быльыр-быльыр усьылэ.

Усёз ке но, уз ке но,

Со уз юзаты сюме.

 

Тюрагаед лыз инмын

Чирдылоз шулдыр гурзэ.

Чирдоз ке но, уз ке но,

Чигтоз гинэ сюлэмме.

 

Мусое, лул-гажанэ,

Кытӥ калгиськод меда?

Сюлэмыд шӧдэ меда

Пӧсь, ӟырдыт яратонме?

 

Мӧзмисько

Тол жоб…

Толшор…

Лымы букосъёс…

Вандӥсь тӧл пыр

Тонэ утчасько.

 Южтолэзь…

Йӧӟузыри бӧрдэ…

Мон озьы тынэсьтыд мӧзмисько.

Куартолэзь …

Тулыс

Вае оскон…

Тюрагай куараен гурласько.

 Куарусён…

Ӵуж куаръёс пыд улын…

Тонэ куштыны вырисько сюлмысьтым.

  

Возьмасько

Толалтэ

Возьмасько гужемез,

Пӧсь сиос пуэктэм мугорме

Шунтозы кожаса.

 Тулысэн

Возьмасько тудвуэз,

Мынэсьтым тымиськем мылкыдме

Ӧръялоз кожаса.

 Сӥзьыллэсь

Возьмасько ӵуж дӥсьсэ,

Со зарни вакытъёс

Чик медаз бездэ вал шуыса.

 

Гочатӥсь шудэ

Шудэ пегаса шудэ,

Чилектэ, куалектытэ.

Я, гочатыса монэ,

Инвис сьӧры нош ыше.

 

Малпамтэ шорысь юнме

Сӥзьыл куазен со вуэ.

Я шуак куартолэзе

Чус омырын лэйкатэ.

 

Тодӥсько мон одӥгзэ:

Возьмаськон ӧвӧл юнме.

Усьтӥськоз витем шудэ,

Вуод тон, яратонэ.

 

Удмурт Дунне
By Удмурт Дунне 20 июля, 2016 14:55 Updated