3 ыж, 2 парсь, 1 скал…

Удмурт Дунне
By Удмурт Дунне 1 июля, 2016 14:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

переписьНырысетӥ июльысен Россиын кутскиз гурт удысын лыдъян-чотан. Шаерысьтымы 442 сюрслэсь ятыр объектэз лыдэ басьтоно. Бадӟым уже 92 инструкторъёс но 553 переписчикъёс пырисько. 

Лыдъян-чотан 1-тӥ июльысен 15-тӥ августозь кыстӥське ке но, переписчикъёс адямиос дортӥ 24-тӥ-30-тӥ июне ик ортчизы. Списокъёссэс эскеризы, калыкен пумиськылӥзы но валэктонъёс сётъязы. Ӵапак та ужлэсь мынэмзэ эскерыны вуылӥз Росстатлэн кивалтӥсез Александр Суринов. Со пумиськылӥз Удмурт Республикалэн Тӧроеныз Александр Соловьевен но Удмуртстатын ужасьёсын, вуылӥз Вотка ёросысь Июльское черкогуртэ.

Гурт удысын лыдъян-чотан кыкетӥзэ ортче, нырысетӥез радъямын вал 10 ар талэсь азьло. Соку но, али но переписчикъёс шоры пӧртэм сямен учкисьёс вань: кин ке њеч пумита, мукетъёсыз куалектэмын, ваньзэ шараямы ке, тросгес выт бичаны уз кутске-а шуыса. Лыдъян-чотанлэсь кышкатскыны кулэ ӧвӧл. Со шарая гуртысь огъя югдурез, лыдэ басьтӥськоз муниципал кылдытэтъёслэн азинскемзы.

Вотка ёросысь Июльское черкогуртысь огез лыдъясь-чотась Н. Якимова.

Вотка ёросысь Июльское черкогуртысь огез лыдъясь-чотась
Н. Якимова.

— 2006-тӥ арын лыдъян-чотан 25 нунал куспын ортчытэмын вал, соку котькуд переписчик 150 юртэ пыраз, — шуиз Удмуртстатэн кивалтӥсь Евгений Данилов. — Туэ котькудӥзлы шорлыдын 460 объект усе, переписчикъёс гурт но фермер хозяйствоосы, сад-бакчаосы вуылы кулэ. Вакчи дыр куспын гуртъёсысь 217 сюрс 940 юртъере, городъёсысь нимаз юртъёсысь 77 сюрс 481 улӥсь семьяос доры пырано.

Удмуртиысь 407 гурт хозяйствоос переписной листъёсыз асьсэос быдэстозы. Хозяйстволэсь вань музъемзэ, гыроно-кизёно техниказэ пыр-поч гожъяно луозы. Юалляськон листъёсын кун ласянь юрттэт басьто-а шуыса юан но вань. Гурт хозяйствоосын кивалтӥсьёс сяна, таӵе ик юанъёслы валэктон сётыны кулэ на шаерысьтымы 59 фермер хозяйствоосын кивалтӥсьёс но 843 ужбергатӥсьёс.

Гуртын улӥсьёс но сад-бакча возисьёс переписчикъёсты тодмалозы дӥсьсыя. Жилетсы, йыре пононзы но сумказы лыз. Куд-ог переписчикъёслэн планшетсы луоз. Туала техника сётэмын Ижевск, Вотка, Глазов, Можга но Сарапул городъёсын, Алнаш, Вотка, Глазов, Дэри, Пичи Пурга, Можга, Сарапул но Якшур-Бӧдья ёросъёсын ужась переписчикъёслы.

— Вотка ёросын 4 участок кылдытэмын, 24 переписчик ветлоз, — шуиз Удмуртстатлэн Вотка городысь валтӥсь специалистэз Галина Солодянкина. — Толэзь но ӝыны куспын лыдъямын-чотамын луыны кулэ 10 гурт хозяйство, 10 пичи предприятие, 75 фермер хозяйство, 10 сюрс 112 адямиослэн хозяйствооссы, со сяна, вань на 41 сад-бакча. Котькуд переписчик дышетсконэз ортчиз, оскисько, азязы пуктэм ужпумез ӟеч быдэстозы.

Июльское участокын лыдъян-чотан оскемын 1 инструкторлы но 6 переписчикъёслы. Ваньзы сямен соос муниципал кылдытэтын ужасьёс луо. Наталья Якимова та ужлы рос-прос дасяськем, вань адямиос доры азьлапал ик пыраса, кенешем, кыӵе нуналэ доразы лыктоно шуыса. Переписчикъёс пӧлы шедемын гурт библиотекаен кивалтӥсь Галина Останина но.

— Ог 7 ар талэсь азьло гурт хозяйстволэсь лыдъян-чотан книгазэ выльдонэ пыриськи, соку но коркась корка пыраса ветлӥмы, 1 скал, 2 парсь, 3 ыж… — шуэ Галина Владимировна. — Берло дыре доразы пудо вордӥсьёс ӧжытгес кылизы. Июльское черкогуртысь 109 юртэ пырам сяна, артысь Гольянский каргуртысь 224 юртэ вуылоно луоз. Нуналлы быдэ 7 иськеме ветлон монэ уг кышкаты, руль сьӧрын ачим ворттылӥсько. Та арня кутсконын отчы ветлӥ ни, калык шуныт пумитаз, лыдъян-чотан сярысь валэктоно ӧз луы, со сярысь гуртоос ӟеч тодо вылэм ни.

Гурт удысысь лыдъян-чотанлы нырысетӥ йылпумъянъёс лэсьтыны чакламын туэ ар пумын, нош быдэсак югдур тодмо луоз 2018-тӥ арын. Кызьы вераз Евгений Данилов, ӵошатон вылысь 2006-тӥ но 2014-тӥ аръёс басьтэмын вал.  Шараяськиз, гыроно-кизёно музъемъёслэн лыдзы 11 процентлы кулэсмемын, сюро таза пудо — 18 процентлы, парсьёс — 18 процентлы. Со вакытэ ик йӧл 30 процентлы тросгес кыскемын. 2006-тӥ арын сюро таза пудо нунал куспын 508 граммлы куае вылэм ке, 2014-тӥ арын — 576 граммлы.

Валентина Емельянова

 

 

 

Удмурт Дунне
By Удмурт Дунне 1 июля, 2016 14:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<