Выль кен чалмазэ воршудлы кузьмаз

Удмурт Дунне
By Удмурт Дунне 18 июня, 2016 11:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

089365,музей,Лудорвай,чан,котел,еда,костер,обрядовая каша,огонь,костерПичи Пурга ёросысь Аксакын вӧсяськон интыос но куалаос сярысь одӥг-кык арлыдоос гинэ тодо на. Соос улонысь кошкизы ке, вашкалаез бусэн шобырскоз, вуноз.

Вӧсяськон интыос

Гуртмы кылдэм дырысен ик тушо пересьёс самой чебер, шулдыр интыосты — Нӧднюк, Перепеч, Садо, Керемет — вӧсяськыны бырйиллям. Отын быдэс гуртэн вӧсяськиллям тулыс сезьы кизем но гужем ӟег кизем бере. Кызьы ортчылэм та ужрад, 1985-тӥ арын ай вераса кельтӥз 78 аресъем Мария Маркова:

— Нӧднюкын вӧсяськемзэс уг тодӥськы ни — тужгес вашкалаез вылэм со. Нош вадьсысьтыз ик шур сьӧрысь нюлэсо возез, Садоез, уг вунэтӥськы. Ой, кыӵе шулдыр вал отын! Вырйылаз — лысо нюлэс, азбарез паськыт, сяськаё. Котыраз бадьпуос, пашпуос будо. Пӧсь куазен шур вылысь ыркыт омыр лӧсъяське. Отчы тулыс, узьым ӝужам бере, ветлӥзы. Пашпу сяськаяськемын, кыз-ньылпуос — кызаузыен. Возь выл сяськаос турлы пишто шунды улын.

Калыклэсь азьло лыкто вӧсясь но партчасьёс. Инмарлы тау карыса, ош яке ветыл вандо. Вирзэ лэзё лёгамтэ, чылкыт ожо вылэ. Инмар, пе, мед адӟоз калыклэсь сое гажамзэ, чылкыт малпанъёсын улэмзэ. Инмар азьын сьӧлыктэм адӟиськон понна пӧрмылӥзы выль кутъёсын, тӧдьы бинялтонъёсын. Тӧдьы шорт дэремзы етӥнлэсь куэмын. Вӧсясьлэн йыраз — гын шляпа, киосаз — вӧсь ӵушкон вылын нянь колды. Инмарез данъя, вир сётэмез басьтыны куре, шунды пала вазиське-йыбыртъя. Няньлэн шораз ик азвесь уксё мертчытэмын. Сое ошмес вуэн нырысь гылто. Азвесь возьматэ адямилэсь чылкыт малпанзэ. Вӧсясьлэн кускерттонэз бурлатшорто куэмын. Сизьым буёло, иське. Сизьым пус, пе, вӧсез, Инмарез сӥлы каронэз урод синъёслэсь уте. Солы таӵе утисьтэк, вир сётытэк, вазиськиськод ке, толыкез уз луы. Пудо-живот вандэмез калык медаз адӟы — Инмар гинэ. Ӝук пӧзьтыны кеньыр пиналъёс бичало вал гурт вылысь. Вӧсь пудо-живот понна уксё но — гурт вылысь. Котькуд кузё туж возьмалляз солэсь ошсэ я ветылзэ басьтэмзэс — вылӥ данэн лыдъяськылӥз со.

Пуртыосын сӥль, ӝук пӧзьытозь, пиналъёс чапасэн (шальыен) шудылӥзы. Кышноос пуртыос азе ожо вылэ вӧлдылӥзы ӵушконъёс, пуктылӥзы кыстыбей, юача, кумышка. Вӧсясь киосаз нянен вазиське Инмарлы, киземъёс вылэ шуныт мед зороз, куазь мед ӟеч луоз, нянь но пудо мед удалтозы, калык медаз висьы, куспаз тупаса мед улоз шуыса. Собере капчи мылкыдын шуэ: «Тусьты пуктэ!» Сыџе кылъёс бере та интыын ваньмыз вӧсямен лыдъяське: сиён но, калык но.

Куалаос

Маркова Марья апайлэн верамезъя ик, гуртын вылэм на воршуд (покчи) но будӟым (быдӟым) куалаос. Таосаз, бӧлякен люкиськыса, вӧсяськылӥзы Выле но Быдӟымнуналэ.

2-тӥ августлы, Выльлы, тыршылӥзы выль ӟеглэсь выль нянь пыжыны. Лыдъяськылӥз: кыӵе ю-нянь басьтӥд, сыӵе ик луоз вуоно Вылёзь улонэд.

Будӟым куалае выль кен пыртон сярысь вераз вал кечпи Катя апай (Тихонова, вордскемын 1914-тӥ арын). Солы соку 6 арес вылэм. Дядяезлэн вынызлы кышно вайиллям. Кияса ёросысь Дальня гуртысь черкын гожтӥськемзы бере егитъёсты вашкала удмурт сямъя куалае пыртӥллям: воршуд, пе, выль кенэз басьтоз-а, уз-а семьяямы.

— Выль кен куала сэргы пурысь ӵӧжлэсь вирзэ лэзиз, курике ошем пурты улысь тылскеме но виятӥз, — тодаз вае Катя апай. — Сӥлез пӧзьтӥзы пуртыын. Сиемзы бере лысьӧмзэ куала сэргы вирен ӵош согизы. Дядяйме куала кузё шуо вал, юртамы со самой мӧйыез вал. Кенмы котырес няньзэ солы сётӥз. Дядяй сое асьмелэнэз вӧзы понӥз, собере ваньзэ, ӵушкон вылэ тырыса, киосаз кутӥз но йыбырттӥз сэргысь мудор пала. Мудор шуо вал ӝажыез, со вылысь коробез. Берлогес отчы инмар пуктылӥзы ни. Тазьы вазиськиз: «Остэ, Эгра воршуд! Басьты семьяяд выль адямиез. Картэзлы ӟеч кышно, корка тыр нылпиосызлы мусо нэнэй мед луоз. Пересьёсмес но сямъёсмес мед утёз-гажалоз, выжымес мед азьланьтоз. Мае ке курыны вунэтӥ ке, вождэс эн вае, кошкем (кулэм) пересьёс, воршуд, остэ!» Ваньмыз та ӝӧк сьӧры пуксемлэсь азьло вал. Куалаын 3 пар вал: нэнэен дядяе, кенмы картэныз но солэн нэнэй-дядяез. Ӝӧк сьӧрын кышноос пиосты утялтӥзы, пу сюмыкъёсын ляб кумышка сётъязы. Кенмы йырысьтыз чалмазэ воршудлы кельтӥз на. Табере гинэ со картэзлы кышно луиз. Азьланьын егитъёс куспазы тупазы ке, иське, воршуд выль адямиез басьтӥз семьяе.

Будӟым куалае выль кен пырылӥз огпол — чалмазэ кельтыны. Нош кышномурт луэмез бере бӧлякысь мукет кышноосын ӵош котькуд ар «куала миськон» сяме пыриськылӥз. Пушказ утялскылӥзы, борддоръёссэ миськылӥзы. 22-тӥ июне луэ вал со.

Воршуд куала котькуд юртъерын вал, отчы пырылӥзы быдэс семьяен. 1930-тӥ аръёсы, колхоз кылдыса, вӧсяськонъёсты алыны кутскизы. Отӥяз воршуд куала гужем пӧраськон инты луиз, пӧсь куазен кӧлазы но отын.

Нош будӟым куалаос азьлогес быризы ни. Озьы но бервылысьтызы номыре но исаны уг лэзё — кужымзы кылемын. Соин мар ке луэ ке семьяын, отчы пурысь ӵӧжен мыно, калык адӟонтэм дыръя вир сёто. Юрттэ, шуо. Малы? Вирын сылалэз вань. Нош сылалтэк улон ӧвӧл.

Лудэ пыронъёс

Аксак котырамы вылӥллям на Лудэ пыронъёс. Соос сярысь тодаз вайылӥз Марко Ога апай (Маркова Агафья Васильевна, 1920-тӥ-2008-тӥ аръёсы улэмын). Устинья нэнэез солы вераллялоз вылэм:

— Одӥг нунал пересьёс кенешо, Четкер гурезьлэн выжыяз (дӥняз) пуксьыса. Чильымазы тамак тыро но кенжыто. Кыскыса быдтытозязы, берпалзы ӧз ке кынмы — яра ни пырыны-потыны.

Ӵуказеяз котькуд выжыысь быръем семьяос лыкто Лудэ пыронэ. Котькудӥзлэн со аслаз вал: биграослэн — Дуана бусы дурын, омгаослэн — Вож яг нимо пичигес нюлэс бордын, эграос люкаськылӥзы кыкетӥ: Быдӟым куа сик вӧсяськонэ но Сусыпу ульча пуме. Самой пересез адями бусы (ана) дуре кенерысь майыген гоп гудэ, корт лопатаен уг яра вылэм: Мукылчинлэсь мугорзэ вӧсь карод, бусы ужед секытэн мыноз. Гопе понэ ыль курегпуз, нянь юдэс, виятэ кумышка. Куриське Мукылчинлэсь: «Вождэ эн потты, мугордэ герыен вӧсь кареммылы. Гырон-кизён ужмес капчияты вал. Остэ!» Со вискын семьяысь, бӧлякысь самой гажано, капчи киё воргорон, «остэ!» шуыса, валзэ вырӟытэ но бусы дурез кидыс пазьгымон гыре. Гырем вылэ кудыысь кидыс пазьго, буям курегпуз но куяло. Пиналъёс вожмаськыса соосты бичало. Кинлэн тросгес курегпузэз, солы улонын но удалтоз. Та вакытэ пересь нош куриське: «Остэ, Инмаре! Кизем выламы шуныт зордэ, ӟеч куазьдэ сёт, ӝужыт модосо кар. Котькуд шепын тысез курегпуз быдӟа медло. Остэ!» Киземез усыяса, бусы дуре пуксё. Кышноос пиосты пыжиськемен, ляб виятэмен (кумышкаен) утялто. Валъёс со вискын ӝужась ожоез ишко, пиналъёс шудо палэнын. Шунды пальыша. Тылобурдоос чирдо. Куазь сайказ! Капчи мылкыдын адямиос дор палазы вырӟо. Но таин нунал уг быр на. Пиос мыно вӧсяськыны быдӟым куалаосы. Инмарлы, Мумыкылчинлы, куазьлы, воршудлы, вир сётыса, курисько соослэсь гырон-кизёнзэс капчиен ортчытыны. Кызьы кутскод ӵуказе нуналэз, озьы ик ужед но отӥяз мыноз.

Валерий Баймурзин

Удмурт Дунне
By Удмурт Дунне 18 июня, 2016 11:25