Википедия: Удмурт вотэс — асьме киын

Удмурт Дунне
By Удмурт Дунне Июнь 10, 2016 13:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Карелиын ортчиз фин-угор кылъёслы сӥзем 3-тӥез калыккуспо вики-семинар. Отчы пыриськизы Финляндиысь, Эстониысь но Россилэн пӧртэм улосъёсысьтыз журналистъёс, тодосчиос но финноугристикаен тунсыкъяськисьёс.

википедия

Конференцие вуылэмъёс.

Соос 4 нунал ӵоже лыдӟизы но кылзӥзы, кызьы выжы калыкъёс нуо Википедиез, пыриськизы Википедиосыз азинтонлы сӥзем мастер-классъёсы, озьы ик вераськон мынӥз фин-угор культураез но кылъёсыз вӧлмытонын Википедиез кутон пумысен. Уго тросэз асьмеос пӧлысь кулэ иворез утча но шедьтэ Интернетлэн эрико энциклопедиысьтыз. Вань вотэсбамъёс пӧлын со юнме 5-тӥ интыын уг сылы, луоз. Но ваньзы уг тодо, Википедиез азинтыны но бадӟыматыны котькудмы быгатӥськом шуыса.

Удмурт Википедиын ужаку, шуг пуктыны точкаосын букваосты (аффрикатаосты). Соос клавиатураосы пыртэмын ӧвӧл. Соин ик нимысьтыз программа пуктоно луэ. Куд-огез понна со туж акылес но секыт йӧтэ. Та ужпумез сэрттон понна семинарез радъясьёс ӵектӥзы кылдытыны викификатор — программа, кудӥз букваосыз ачиз тупатъялоз. Удмурт программистлэн Гриша Григорьевлэн udmspell.ru сайтаз сыӵе тупатъясь программа вань ни. Википедия пушкын но со выллем ик программа мед луысал.

Википедиосын статьяослэн лыдзы ӝог мед будоз шуыса, вики-вожвылъяськонъёс ортчытъяно. Та ласянь гижысь-пиньысь ужало ӟучъёс но башкиръёс. Удмуртъёс но та малпанэз лыдэ басьтӥзы — матысь дыре ортчоз вожвылъяськон. Вормисьёс дуно кузьымъёсын пусъемын луозы. Нош конкурслэн куронъёсыз секыт медаз йӧтэ шуыса, радъясьёс ортчытозы мастер-классъёс, валэктозы, кыӵегес статьяос тупало Википедилы но кызьы соосыз отчы интыяно.

Карелъёс сюлмасько карел но ливвик наречиосын энциклопедиоссэс бадӟыматыны. Уго соос «инкубаторысь» потэмын ӧвӧл на: статьяоссы 2 сюрслэсь ӧжытгес бере, соос ваньмызлы уг адӟисько. Гожтэмез шедьтон понна кулэ тодыны солэсь нимысьтыз чӧлскон адрессэ.

Ортчись ужрадъёс сярысь калык мед тодоз шуыса, «Викимедия РУ» огазеяськон вики-иворъёс гожъя. Петрозаводскын ортчем семинарын ӵектэмын вал сыӵе иворъёсыз фин-угор кылъёсын но дасяны. Азьвыл соос ӟуч но башкир кылъёсын гинэ вал. Пусъем потэ: удмурт кылын нырысетӥез сыӵе ивор та нуналъёсы потӥз ни.

Вуоноез вики-семинар туэ сӥзьыл Ижкарын ортчоз.

Елена Рябина

Удмурт Дунне
By Удмурт Дунне Июнь 10, 2016 13:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<