Вань милям выжы дуннемы!

Удмурт Дунне
By Удмурт Дунне 28 июня, 2016 12:43

 Азинлык лыктэ эшъяськыса

Кызьы ивортылӥм ни, 15-тӥ-17-тӥ июне Финляндиысь Лахти городын ортчиз дунне вылысь фин-угоръёслэн 7-тӥ конгрессы, нимаськиз со «Фин-угор калыкъёс — огсыр азинсконэ».

041115202326

Финляндиысь Лахти городысь Сибелиус-холлын ортчиз 7-тӥ фин-угор конгресс.

Гажаса-а, гажатэк-а лыктӥды?..

Ужрадэ вуиз 22 делегация: финъёс, саамъёс, венгеръёс, эстонъёс, сетуос, энецъёс, ненецъёс, нганасанъёс, ингерманландецъёс, водьёс, вепсъёс, ижоръёс, карелъёс, хантыос, мансиос, комиос, квенъёс, ливъёс, поръёс, мордва (эрзя но мокша), комиос, коми-пермякъёс, удмуртъёс — ваньмыз 174 делегат, 370 чакласьёс (наблюдательёс) но 50-лэсь трос журналистъёс.

Лахти карысь Сибелиус-холлэ люкаськем калык азе, рэп кырӟаса, потӥз саам артист Айлу Валле. Куно пумитасьёс озьы ваньзылы возьматӥзы: тани со — араны лыктӥсьёс, егитъёс, азинто милесьтым ужмес. Сыӵе ӟеч мылкыд пыӵатэм бере конгрессэз сӥё-дано усьтӥз Финляндилэн президентэз Саули Ниинистё. Со тау кариз выжыосмес эскерись тодосчиослы асьмелэсь огъя вашкаламес усьтэмзы, шараямзы понна. Собере бӧрсьысь бӧрсе вераськизы Эстонилэн но Венгрилэн президентъёссы. Ваньзы соос пусйизы: фин-угор калыкъёслэн кужымзы аспӧртэмлыко луон бордын. Таӵе конгрессъёс юртто кусыпъёсты юнматыны. Ваче син вераськыса, пайдаез тросгес луэ, адямиос шӧдо, макем матын асьмеос ог-огмылы, макем огкадь чузъясько асьмелэн крезьгуръёсмы, шуизы кивалтӥсьёс.

Зэм, ӧз кыле пышкылытэк но. Эстон кивалтӥсь Тоомас Ильвес олокӧня пол Россия пала из сэрпалтыны выриз: пичи калыкъёс кулэсмо, быро, ваньбур поттон сьӧры уйиськонъязы куд-огез арам каро выжы калыкъёслэсь улон интыоссэс но мукет. Сибирьын, пе, 50 ар ӵоже мувӧй кыскемлэсь курадӟыса, лымы но гордэктэмын ни… Пичи калыкъёсты утёнэз со ӵошатӥз пӧйшуръёсты но будосъёсты Горд книгае пыртонэн. Бадӟым калыкъёс сюлмаськыны кулэ пичи калыкъёс сярысь, шуиз со, валамон ини, Эстониысь, Финляндиысь но Венгриысь калыкез «бадӟымен», Россиысь калыкъёсты «пичиен» лыдъяса. Олокӧня пол вераз «оккупация» кылэз, солэн малпамезъя, Россиысь калыкъёс али но «оккупация улын», соосты пачкато, соин уг азинско кылъёс…

Но талы пумит Россиысь делегацилэн кивалтӥсез, культурая министрлэн воштӥсез Александр Журавский вераз: Россиез фин-угор кунъёсын, ӵыжы-выжы кусыпъёс сяна, герӟало экономика но, культура но, туризм но. Асьмеос туж ӵем шуиськом: культураез но политикаез сураны уг яра, но, жаляса верано, солэсь палэнскеммы уг луы… Россиысь делегатъёс дась шара эскерыны выжы калыкъёслэсь ужпумъёссэс, шугъяськонъёссэс, но уг яра висъяны «бадӟым» но «пичи» калыкъёсты, уг яра историез пӧяса вераны, мед луоз ог-огдэ гажаса вераськон, соку гинэ асьмеос ог-огмес валалом. А. Журавский эстон кивалтӥсьлы озьы ик тодаз вайытӥз, кызьы кылемаз конгрессын соосты пыкылӥзы, эстонъёс сетуосты нимаз калыкен уг лыдъяло шуыса…

Ивортодэтъя секциын верасько фин-угоръёслэсь электрон письменностьсэс вќлмытон сярысь.

Ивортодэтъя секциын верасько фин-угоръёслэсь электрон письменностьсэс вӧлмытон сярысь.

— Россия уг аналты аслэсьтыз калыкъёссэ, — азинтћз А. Журавский. — Кылсярысь, Марий Элын гинэ берло куинь ар ӵоже усьтэмын гуртъёсысь усточи пиналъёслы школа, операя но балетъя театр, мунё театр, нылпи библиотека, этнографияя комплекс но трос мукет. Талы федерал бюджетысь 2 миллиард манетлэсь трос висъямын.

А. Журавский озьы ик лыдӟиз Россилэн Президентэзлэсь ӟечкыланзэ. Фин-угор калыкъёс быдэс Евразиын уло, соос огъя азинсконын (цивилизациын) бадӟым инты басьто, соослэн инкуазез валаны быгатэмзы но бадӟым ваньбурет, лулчеберет луэ, шуэмын отын. Владимир Путин оскемзэ вера, делегатъёслэн тупаса но валче ужамзы пайдаен берытскоз, калыкъёслэсь но кунъёслэсь кусыпъёссэс тупатыны, ог-огмылы осконмес будэтыны юрттоз шуыса.

Конгресслэн 2-тӥ нуналаз делегатъёс лумбыт ужазы пӧртэм секциосын: фин-угор кылъёсты но культураосты улонэ пыӵатон, ивор вӧлмытон, граждан общество но власть, экономика но инкуазь, демография но миграция ужпумъёс.

 

Вынлыко луонлэн кужымез

«Граждан общество но власть» секциын вераськиз Венгриысь политика удысын эскеронъёс ортчытъянъя центрысь тодосчи Золтан Кантор:

— Асьмеды шуо ӧжыт лыдъем калыкъёс, огласянь, бен, лыдмы трос ӧвӧл, но соку кызьы такема улыны пӧрмытӥськом? Эшъяськонлы луыса — ӵыжы-выжыосмы вань асьме шаерын но, мукет кунъёсын но. Ваньмылэн сюлмаськонъёсмы огвыллемесь, иське, соос сярысь кивалтӥсьёслы верано одӥг вынлыко калыклэн нимыныз! Соку асьмеды одно кылозы, озьы гинэ азинлыко луыны быгатом. Котькуд калык быгатэ ас кылзэ вераны, солэн тунсыкъёсыныз герӟаськем решениос кутӥськыку. Котькуд калык быгатэ аслаз кылыз понна нюръяськыны, кунлэсь кылзэ юаны. Нялтас вераса, дуннеын 24 пӧртэм фин-угор но самодий калык лыдъяське, 23 миллион адями со кылъёсын вераське. Государстволэн трос сюлмаськонъёсыз, соин ик асьмеос асьме сярысь ӧм вераллялэ ке, со милемды вунэтоз. Ичи лыдъем калыкъёс парламентэ нимысьтыз мандат басьтыны мед быгатозы.

Историяя, кылъя но литературая Удмурт институтлэн директорез, профессор Алексей Загребин мадиз, макем бадӟым инты басьто калыкен власть куспын общественной огазеяськонъёс. Берло аръёсы отчы мыло-кыдо пырисько егитъёс. Соос туж визьмо амал шедьтӥзы — вашкалазэ, туала карыса, модае пыӵато. Со кельышлы арлыдоослы но, тунсыко пиналъёслы но. Ӵапак выжыысь выжые выжись дунлыкъёс (преемственность) вылын возиське калыклэн азинсконэз.

Кат вань, кать ӧвӧл

«Экономика но котырысь дунне» секцилэн ужаз пыриськисьёс шуизы: асьмеос быгатӥськом ини сямъёсмес-йылолъёсмес возьматыны, лулчеберетмес дуннелы адӟытыны, но сое паськытгес вӧлмытыны луонлыкъёсмы укыр ичи. Кулэ ужбергатӥсьёс ласянь юрттэт. Экономикаез юнматытэк, уд азинты культураез но, кылэз но. Со дыре ик ваньбур (коньдон) поттон изъян вайыны кулэ ӧвӧл улон интымылы — выжы калыкъёслэн адямиоссы пыртэмын луыны кулэ улосъёсты (территориосты) ӝутонъя проект дасян группаосы. Угось та пумысен катъёс вань, нош уж вылын соос уг быдэсъясько — ӵемысь калыклэн малпанэз санэ уг басьтӥськы. Нялтас вераса, со котькуд удысын озьы — правоос сётӥсько, соосты быдэсъяны луонлыкъёс — уг.

Вордэмлэсь трос кошкиськом

«Демография ужпумъёс. Вуж но выль диаспораос» секциез нуиз Ижысь медициная академилэн ректорез, профессор Николай Стрелков. Ачиз со фин-угор калыкъёслэн тазалыксы сярысь доклад лыдӟиз. Эскеронъёс возьмато: калык ичиёме! Татын пӧртэм мугъёс: шуо, берлоез перепись дыръя туж трос янгышанъёс шараямын. Но со гинэ ӧвӧл — палэнэ кошкисьёс лыктћсьёслэсь тросгес, кулӥсьёс — вордскисьёслэсь. Ӟеч югдур Уйпалан гинэ — берло дыре отын вордскисьёслэн лыдзы выльысь йылыны кутскиз, семьяосын куинетӥ нылпи вайыны кутскизы. Эскерисьёс тае герӟало кун ласянь пӧртэм юрттэт сётонъя программаос кутэмен.

Ӟеч улон утчаса, калык палэнэ кошке. Огласянь, со умой кадь — угось озьы дуннее вӧлмо асьме культураосмы, но, мукет ласянь, диаспораослэн ӧвӧл тырмыт кужымзы но луонлыкъёссы, палэнын улыса, кылзэс азинтыны, адямиос асьсэды ас калыксылэн оглюкетэныз лыдъямысь дугдо. Финъёс но венгеръёс ас дорысьтызы сьӧрло кошкыло ке огдырлы — одӥг гужемлы яке кӧня ке арлы, асьмелэн, кызьы шуо, кошкисез кошке ни. Тани кӧня удмуртъёс уло палэнын — бен, арлыдоос тодо на Удмуртиын улэм-вылэмзэс, ӵош пумиськыкузы, кырӟалляло на удмурт калык кырӟанъёсты, но соослэн нылпиоссы удмурт уг луо ни.

Сыӵе шугъяськонъёс сярысь ик секциын вераськиз Свердловск улосысь удмуртъёслэн «Эгес» огазеяськонэнызы кивалтӥсь Марина Ягуткина.

— Удмуртъёсты, лыктыны курыса, оген-оген бичаса ветлӥсько, — вера Башкириын вордӥськем удмурт нылкышно. — Оломар но малпаськом кадь, но калык туннэ улэ мукет сюлмаськонъёсын. Бен, пумиськиськом ке, ӟыгырскиськом, ӵыжы-выжы луэммес шӧдӥськом, но со мылкыдэз нуналмысь утьыны шуг — Удмуртилэсь палэнын удмурт кыл уг чузъяськы уго…

Консультативной комитетлэн азьвыл кивалтћсез В. Марков њечкыла выль кивалтӥсез  Т. Клеероваез.

Консультативной комитетлэн азьвыл кивалтӥсез В. Марков ӟечкыла выль кивалтӥсез
Т. Клеероваез.

Кыл сярысь — огкылысь

«Фин-угор кылъёсты но культураосты дышетонын преемственность» секциын одӥгез валтӥсез луиз филология наукаосъя докторлэн, Удмурт кун университетысь Удмурт филологияя, финно-угроведениея но журналистикая институтлэн директорезлэн Наталья Кондратьевалэн докладэз. Со сӥземын вал национальной интеллигенциез будэтонлы.

— Ӵапак национальной интеллигенция нырысь ик кылдытэ калык сярысь малпан, со азинтэ этносэз, адямиез. Адямиез интеллигентэн вордскемез дырысен будэтыны кулэ: семьяын, нылпи садын, школаын, вузын… Нош али сыӵе луонлыкмы асьмелэн ӧвӧл. Кытын ке удмурт кыл вань (нылпи садын, ӵемгес — школаын), нош вузэ пырыса, егит мурт сое уг но кылылы ни. Вылӥ школаын национальной кылъёс вань на кылосбур факультетъёсын-отделениосын гинэ. Отысь но бюджет интыосты арысь аре кулэсто. Со дыре ик ас улоно интыысьтызы калыкъёслэсь культуразэс ӧжыт ке но валан понна студентъёслы со туж пайдаё луысал. Та ласянь адӟем карымон луэ Мордовиысь кун университет: вуоно арысен отысь вань институтъёсын-факультетъёсын мордва кылъёсты дышетозы. Учконо ке, шуг 1990-тӥ аръёсы ми ӟечгес азинским — тросаз улосъёсын кылдытэмын вал национальной факультетъёс (МарГУ, СыктГУ, УдГУ…). Со туж юрттӥз егитъёслэсь асваланзэс будэтыны, анай кылзэс но калыксылэсь культуразэс паськытгес вӧлмытыны, нош табере вылӥ школаысь реформаос берлань мыно: гуманитарной удысъя интыосты кулэстэмен, огазеяло факультетъёсты, кафедраосты — сыӵе учыр Россиысь вузъёсын гинэ ӧвӧл, Финляндиын, Эстониын, Венгриын но, — шуиз Наталья Владимировна.

Солы дурбасьтыса, вераськиз Карелиысь университетысь тодосчи Ирма Муллонен. Магистратураын интыос ӧвӧлэн выпускникъёс артысь кунъёсы кошконо луо но отысь уг берытско ни, фин-угор удысэн тунсыкъяськемысь дугдо. Соин ик кылчиос ӵектӥзы вань фин-угор кунъёсысь университетъёсты кыӵе ке огъя сетевой университет кылдытон сярысь малпаськыны.

Ивор кӧче Интернетэ

«Фин-угор ивортодэт: азинскон амалъёс» секция вань конгрессъёс дыръя валтӥсь инты басьтылӥз, угось иворлы луыса асьмеос кусып возиськом, ог-огмы сярысь тодӥськом, кылмес вӧлмытӥськом. Вылаз ик, арысь аре дунне воштӥське, ивор басьтон амалъёс ӝогомо. Кылмы бере медаз кыльы шуыса, сое тросгес пыртоно Интернетэ, со понна кылдытоно тросгес электрон ресурсъёс, калыклы аслыз анай кылзэ вӧлмытоно социальной вотэсъёс пыр.

Эстон кылэз эскеронъя институтлэн кивалтӥсез Свен-Эрик Соосар мадиз, кызьы соос узырмыто Википедиез, Тарту университетысь дышетӥсь Мария Лохмус — кызьы туала амалъёсты ужазы куто музейёс но библиотекаос.

Та секциын пукыса, оглом ӟеч мылкыд кылиз: удмурт ивортодэтэз учконо ке, шуыны уг луы, ми бере кылиськом. Бере кыле, дыр, лыдӟись, угось али Интернетын удмурт иворъёс тымиськемын ӧвӧл ке но, соос вань, нош лыдӟисьёс (интернет-пользовательёс) ушъяськымон трос ӧвӧл. Зэм, специалистъёс верамъя, фин-угор но самодий электрон письменностез азинтонын шугъяськонъёс лачак, соин ик кенешемын та пумысен, юрттэт курыса, кивалтӥсьёслы вазиськыны.

Ушъяськыса уд кышъяськы

Конгресс ӵоже трос ужпумъёс эскеремын. Ваньмыз соос, валамон, конгрессысь конгрессэ огвыллемесь, но табере вераськон уг мыны ни кин ке кужмоез борды ӝабырскыса улэп кылён сярысь гинэ, табере калыкъёс ӟеч тодо асьсэлэсь правооссэс, быгато соосты утён понна нюръяськыны, тодо, кызьы азинскыны. Зэмзэ вераса, трос калыкъем-а тынад выжыед, ӧжыт-а — ваньмызлэн сюлмаськонъёссы огвыллемесь. Кылсярысь, конгрессэз пытсан ужрадын Финляндиысь парламентлэн йырыз Мария Туулия Лохело аслаз вераськоназ пусйиз: фин но венгер кылъёс пумен сылмыны быгатозы, малы ке шуоно егитъёс пумен выжо англи кылэ. Со мадиз, кызьы фин кылъя урокын но пиналъёс сочиненизэс англи кылын гожтыны курисько… Со кун ласянь кыл политикалы туж юрттыса, дурбасьтыса но!

— Пусйыны кулэ, мукет конгрессъёсын ӵошатыса, кунгож сьӧрысь ӵыжы-выжыосмы таяз радэ милям пӧськыосмы шоры возьматыса гинэ ӧз пуке, асьсэлэсь но сюлмаськонъёссэс шараязы, — шуэ «Удмурт Кенешлэн» тӧроез Татьяна Ишматова. — Со сяна, азьвыл ми, нимаз калыкъёслэсь мар ужамзэс кылзыса, пукиськом ке вал, али сыӵе отчётъёс ӧй вал ни, делегатъёс тыршизы тужгес шугъяськытӥсь ужпумъёсты ӝутыны. Фин-угор движенилы 25 ар ини, та дыр ӵоже солэн пӧртэм вакытъёсыз вал, но али адӟиське: «фин-угор дунне» валан кыл вылын гинэ ӧвӧл ни, со — вань!

Биньгозы выжиз нылкышнолы

Фин-угор калыкъёслэн валтӥсь ёззы луэ Консультативной комитет. Со ужа ялан — конгрессъёс вискын но. Отчы котькуд калыклэсь ёзчиос пыро — соосты быръё ќтчамын. Кылсярысь, удмуртъёс пӧлысь Консультативной комитетэ пыро Татьяна Ишматова, Игорь Семёнов, Николай Мусалимов.

Нош кивалтӥз комитетэн 24 ар ӵоже ик нимо-дано коми воргорон Валерий Марков. Аслаз йылпумъян кылаз со шуиз: та аръёс ӵоже со мукет ёзчиосын ӵош вань луонозэ лэсьтӥз выжы калыкъёсмес утён понна. Солэн емышез шӧдӥське: фин-угор движение кыстӥськыны ӧдъязы егитъёс, озьыен, соос валазы, дунъязы асьсэлэсь кулэлыксэс. Но табере Валерий Петрович та ужлэсь мозмытэмын, угось со Россия Федерациысь Федеральной Собранилэн ёзчиез луэ. Нош Россиын кун служащийлы уг яра калыккуспо огазеяськонэн кивалтыны. Соин конгресс дыръя выль кивалтӥсь быръемын — Карелиысь Татьяна Клеерова. Татьяна Семёновна — фин-угор движениын туж гажамон адями, кивалтэ карел калыклэн огазеяськонэныз.

Ӟеч лу, Лахти. Возьма, Тарту3 нунал ужамзы бере делегатъёс резолюция кутӥзы. Вакчияк ке, фин-угор движение граждан обществоын бадӟым инты басьтэ, шуэмын отын. Ортчем аръёс ӵоже трос лэсьтэмын кылъёсмес, культураосмес азинтон, историмес но сямъёсмес-йылолъёсмес дышетон программаосы пыртон понна. Берло дыре фин-угор движение мыло-кыдо пырисько егитъёс. Соос валало, выжы уз азинскы соостэк, табере ӵапак соос кыл куто калыкъёсмылэн ӵуказе нуналзы понна — пиналъёслы ас калыктэ гажан мылкыд пыӵатытэк, вань ужаммы арам луоз. Выжы калыкъёсты ӟечгес азинтон вылысь валче ужано кивалтон ёзъёсын, ужбергатӥсьёсын, юнматоно кусыпъёсмес. Со асьме калыкъёс но кунъёс понна выль луонлыкъёс усьтоз.

Ужрад огшокчем кадь ортчиз, ваньмыз тыршизы тросгес усьтӥськыны, асьсэлэсь сюлмаськонъёссэс кисьтыны но кыӵе ке ужрадъёс кутыны. Секциослэн кивалтӥсьёссы, вань ӵектонъёсты лыдэ басьтыса, вуоно 4 арлы ужрадъёс чаклалозы. Нош вуоноез конгресс ортчоз 2020-тӥ арын Эстониысь Тарту городын.

ВакчиякБадӟым конгрессъёс ортчыло 4 арлы одӥг пол черодэн вань фин-угор кунъёсын: Финляндиын, Эстониын, Венгриын, Россиын.

1-тӥ конгресс ортчиз Россиын (Сыктывкар) 1992-тӥ арын

2-тӥ конгресс — Венгриын (Будапешт) 1996-тӥ арын

3-тӥ конгресс — Финляндиын (Хельсинки) 2000-тӥ арын

4-тӥ конгресс — Эстониын (Таллин) 2004-тӥ арын

5-тӥ конгресс — Россиын (Ханты-Мансийск) 2008-тӥ арын

6-тӥ конгресс — Венгриын (Шиофок) 2012-тӥ арын

7-тӥ конгресс — Финляндиын (Лахти) 2016-тӥ арын.
Конгресслы сӥзем материалъёсын тодматомы на «Герд» номерын (5-тӥ пӧсьтолэзе).

Зинаида РЯБИНИНА

Удмурт Дунне
By Удмурт Дунне 28 июня, 2016 12:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<