Ӝужыт ярдурысен вашкалае зымон

Удмурт Дунне
By Удмурт Дунне 29 июня, 2016 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
ӟуч фольклор

Сарапул ёрос пуксемын Кам шурлэн ӝужыт ярдураз.

Сарапул ёросысь Дулесово гурт быдэс Россиысь вашкала кырӟанъёсты, эктонъёсты но шудонъёсты гажасьёсты люказ. Татын ортчиз ӟуч культурая «Высокий берег» 5-тӥез фестиваль.

Ас вакытаз фестивальлы кутскон сётӥзы Сарапул ёросысь Мазуниноын улӥсьёс. Поселенилэн кивалтӥсез Марина Шергина Удмурт кун университетысь студентъёсты ас дораз ӧтиз, вашкала ӟуч кырӟанъёсты мед гожтозы но калык пӧлы мед вӧлмытозы шуыса.

Сарапул ёрос пуксемын Кам шурлэн ӝужыт ярдураз. Соин сэрен но фестивальлы «Высокий берег» ним сётӥзы. Нырысетӥез фестиваль удалтӥз, соин ик сое азинтыны но муромытыны чаклазы, интызэ Камлы матэгес, Дулесово гурт котыре, выжтӥзы. Татын турбаза но вань — куноосты интыянэн но шуг-секытъёс уг кылдо.

Туэ фестиваль 5-тӥзэ радъяськиз. Татчы Москваысь, Пермьысь, Казаньысь, Владимирысь фольклор коллективъёс но студентъёс вуизы — ваньмыз ог 300 мурт. Ужрад сӥземын вал Тройча праздниклы. Окыт куазь шоры учкытэк, Кам шурлэн ярдураз радъямын вал турын турнаны, веник керттыны, пу пильылыны дышетскон мастер-классъёс, ортчытэмын пӧртэм  шудонъёс. Со сяна, Сарапул ёросысь кибашлыослэн «Сельский торжок» юртысьтызы усточиос асьсэ киын лэсьтэм арбериосынызы тодматӥзы, возьматӥзы, кызьы колоша гындоно, кызьпу суллэсь дэмдор лэсьтоно.

— Фестиваль 5 нунал кыстӥське, — вера Сарапул ёрос администрациысь культурая но егитъёсын ужанъя управлениен кивалтӥсь Ольга Киселёва. — Та дыр ӵоже фестивале пыриськисьёс ог-огенызы тодматско, ог-огзылы быгатонлыкъёссэс возьмато, кырӟанъёсты дышето. Гуртъёстӥ экспедициосын ортчо, арлыдо адямиосын пумисько. Сьӧразы гожтыса нуэм кырӟанъёсты азьланяз фольклор коллективъёс быдэстозы. Сарапулэ куд-огез нырысьсэ уг лыкты ни, сцена вылысен соос тапалан  вордскем кырӟанъёсты ик быдэсто ке, гуртоосмылэн мылкыдзы ӧръяське. Ужрад уго гала-концертэн йылпумъяське. Сое учкыны уно калык люкаське.

Фестивалез усьтонэ но гуртоос лачак лыктӥллям. Шумпотымон соиз но: ужрад ӟучъёсты гинэ уг огазея — мукет выжы калыкъёс но отчы пырисько. Соин но фестивалез усьтӥзы Пичи Пурга ёросысь Выль Мќнья гуртысь «Выль ӟардон» фольклор коллективысь песянайёс.

Ужрадэ вуылӥзы шаерысьтымы вылӥ кивалтӥсьёс но.

— Шумпотымон, туннэ ӟуч культураез азинтыны сомында мылкыд карись усточиос люкаськизы шуыса, — пусйиз Удмуртилэн Тӧроез Александр Соловьев. — Калык искусство улэ, азинтӥське, сюлмысь кисьтӥське ке, со котькуд калыклы валамон луэ. Асьмеос кылӥськом но валаськом ог-огмес. Та ик юрттэ эшлыко мылкыдын улыны.

Елена Сараматова

Туспуктэм: sarapulrayon.udmurt.ru

 

 

Удмурт Дунне
By Удмурт Дунне 29 июня, 2016 15:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<