Усто связист

Удмурт Дунне
By Удмурт Дунне Июнь 21, 2016 11:57
Эгра ёросысь Сеп гуртысь Г. Никитн. 1905-тӥ ар.

Эгра ёросысь Сеп гуртысь Г. Никитин. 1995-тӥ ар.

Эгра ёросысь Сэп гуртын улӥз Быдӟым оже пыриськем Геннадий Михайлович Никитин (1924-2004). Аслэсьтыз ортчем сюрессэ  со  гожтыса кельтӥз.

 Вордӥськи 31-тӥ феврале

— Вордӥськи 1924-тӥ арын Зура ёросысь (али Эгра ёрос) Бисар гуртысь крестьян семьяын. Вал мынам Василий дядяе, Соломида песянае, Михаил Максимович буби, Марина Константиновна анае (гуртоос сое Тэльгурт кенак шуылӥзы). Ми 3 нылпиос вал: 1921-тӥ арын вордскем Наташа сестрае, мон но 1926-тӥ арын вордӥськем Валя сестрае. Сестраосыным тупаса улӥмы. Коркамы бадӟым вал. Ӝытъёсы ӟус вылын пукимы: кин кутаськиз, кин черсӥз, кин керттӥськиз, нош мон чагтылэз вошъялляй, ӵем дыръя ӟус вылэ ик умме усьылӥ.

Пичи дыръям монэ ялан косылӥзы картошка но кушман вуштыны, соосты нянь пыжонэ ватсаллязы. Асьме лэсьтэм вуштонъёсын киосме вӧсь карыса, ӵабъяса быдтылӥ. Соку ик малпай кыӵе ке машина кылдытыны. Котырес чурка борды юнматӥ вуж ведралэсь пӧрмытэм вуштон. Вуштонэз понӥ кутэтъёсын ящике, нош ваньзэ сое пичигес тусь борды шукки. Лэсьтэм арбериелы ачим ик шумпотӥ: уж но ӝог мынӥз, киосы но вӧсь луэмысь дугдӥзы. Бубие адӟиз но паймиз: таӵе арбери лэсьтыны йырам но, пе, ӧй шуккысал.

1930-тӥ арын нырысьсэ школае мынӥ, Беризёвыр гуртысь покчи классъем школае, отӥяз дышетски Сэпысь семилетней школаын. Со вакытэ трос пиналъёс вал, котькуд классын ог 40 мурт. Со аръёсы ик кутскиз коллективизация. Калыкез колхозэ  пырыны косӥзы. Колхозэ пыремзы ӧз поты, угось солэсь азьвыл музъемез люкылӥзы адямилы быдэ. Ваньмыз трос пудоен улӥзы.

Школаме йылпумъяса, дышетскыны пыри вал Ижысь библиотечной училищее. Трос ик дышетскыны ӧз кылды, завуч дораз ӧтиз но вордскем арме юаз. Мон шуисько: 1924-тӥ ар. Нош вордскем нуналыд? 31-тӥ февраль. Сылӥсько, завуч шоры учкыса, номырзэ валатэк. Соку ини удмурт кылын вераз, дунне вылын 31-тӥ февраль ӧвӧл шуыса, документъёсме киям сётӥз но гуртам бертыны куриз. Зураысь загсэ ветлыса, вордскем нуналме 13-тӥ февральлы воштӥ но выльысь дышетскыны мынӥ. Экзаменъёсме умой сётӥ но, стипендия тыризы. 3-тӥ курсысен шулдыр улонэ куспетӥ луиз, «куиньёсын» дышетскисьёслы стипендия сётэмысь дугдӥзы. Озьы мон номыртэк кыли: средней образование но, профессия но ӧй басьты.

Отӥяз вамыштӥ мотозаводэ ужаны, уждун 200-300 манет тыризы. Трос ӧй ке но вал, мон солы шумпотӥ. Кӧня ке толэзь ужаме бере уждунме йылтӥзы — 400-500 манет луиз, со коньдонэн аслым брюки, пиджак, дэрем басьтӥ. Одӥг ӵукна вазь ик магазинэ мынӥ йӧл басьтыны. Черодын сылэ ни вал ог 10 адями, малпамтэ шорысь громкоговоритель вераськыны кутскиз: война, пе! Ма, али гинэ умойгес улыны кутски вал! Ӵуказеяз ӵукна магазинэ пырыса, ас синъёсылы ӧй оскы: вань ӝажыос тырттэм кылиллям. Нянь сётъяны кутскизы карточкаен, нош заводмы фронтлы снарядъёс лэсьтӥз. Улонмы нуналысь нуналэ уродгес луиз, спичка вузамысь дугдӥзы, мунчое пырыны ӧм быгатэ ни.

Г. Никитин егит дыръяз џыжы-выжыосыныз. 1931-тћ ар.

Г. Никитин егит дыръяз џыжы-выжыосыныз. 1931-тћ ар.

Луло кыли 

1942-тӥ арын 17-тӥ августэ почтальон повестка вайиз. 18-тӥ августэ ӵукна Зура военкоматэ 19 адями люкаськиз, ваньмы асьме транспортэн  Глазове мынӥмы.  Нырысь ик дышетски Ленинградысь пехотной училищеын. Сержантлэсь званизэ, сухой паёк сётӥзы но фронтэ келязы. Москвае вуимы. Строен вамышъяса, город пыр потӥмы. Столицамы котыртэмын  окопъёсын но танкъёслы пумит «ӵушъялъёсын» (ежи), куд-ог коркаос куашкамын, войналэн шокамез зол шӧдӥське.

Улыны интыязы сике, сётӥзы рюкзак, оружие, патронъёс, 2 граната. Та сике ик вуттӥзы туркменъёслэсь бригадазэс. Тросэз соос ӟуч сямен ӧз валалэ. Соосты люкылӥзы частьёсы, монэ командире пуктӥзы. 12 мурт вал бордам, со пӧлысь 10-эз туркменъёс, кыкез ӟуч, ачим — удмурт.

1943-тӥ ар, гужем. Уйёс югытэсь, фронт пала пыдын мынӥмы. Тани пумитамы лобе 42 самолёт, одӥгез улӥе лэзькиз но 3 бомба куштӥз, собере мукетъёсыз. Музъем зурка, пельёс жин вазё, кылэмысь ик дугдӥзы кадь, мырдэм потӥ окопысь. Удалтӥз, соку ми ваньмы луло кылимы.

Фронтэ вуыса, передовой линиысь солдатъёс милемлы шумпотӥзы: ичи, пе, кылимы ни вал. Милемды пуктылӥзы фронт кузя. Татысен нырысьсэ адӟи «Катюшаослэсь» ыбылэмзэс, соос 15 минут пала тачырто. Одӥг пол 6 кузя разведкае мынӥмы, 2 иськем пала ортчыса, пичи сике вуимы, отын милемыз «пӧсь» салам вите вылэм. Шорамы ог 50 пала немецъёс лыкто, нош ми 6 кузя. Старший лейтенант ыбылыны ӧз лэзьы, матэгес, пе, мед вуозы. Милям ыбылӥськон тӥрлыкмы но 2 автомат, 2 винтовка, 2 пистолет сяна ӧй вал. Дорамы матэгес лэземмы бере ыбылыны кутскимы. Адӟисько, одӥгез усиз, кыкетӥез, дорамы ӧз вуэ, берытскизы. Ум валаське, малы. Озьы соос, берамы лыктӥсь Т-34 танклэсь кышкаса, пегӟиллям. Ми нош ик ваньмы луло кылимы.

Орша город котырын сӧсырмыны шеди. Санбатэ туж курадӟыса вуи но, пыдме, пе, вандоно луоз. Пыдме кельтыны курыса, сюлворисько, оло, фронтлы ярало на шуисько. Выдтӥзы ӝӧк вылэ, пыдес вылам пуксиз бадӟым мугоро медсестра, хирург кутскиз яраме сузяны. Чидантэм вӧсь, нош вырӟылэме уг лу.

Госпитальысь потыса, Раменскысь военкоматэ вамыштӥ. Учкисько:  танкистлэн погонъёсыныз офицер радиоспецшколае калык люка. Вить муртэ бырйиз, соос пӧлы мон но шеди. Ыстӥзы Москвае, радиостанциосты тупатъяны дышетӥзы, политзанятиос ортчытъязы. Отӥяз нош ик фронтэ вуи. Таяз учыре танковой бригадаысь 16-тӥ отделение шеди, радиомеханик вал. Отӥяз шеди Польшае.

Пан ӧй луы

Война бырон азьын немецъёслэн тросэз частьёссы кылемын вал сикъёсы. Соин валантэм вал, кытын асьмелэнъёс, кытын немецъёс. Огпол тушмон нош ик милемды котыртӥз. Сикын ми ичи кузя. Ву утчан сяменымы ӧжытак гинэ немецъёсын ӧм мырӟиське. Котыртэмысь потыны быгатӥмы ик, кема утчамы знаменосецез. Знамямы ӧвӧлэн милемды  расформировать карысалзы, штрафной батальонэ келясалзы, нош командирез — трибунал улэ. Шудмы вылэм, знаменосецмес шедьтӥмы. Знамязэ кус котыраз биням, гимнастёрка улаз ватэм. Кыӵе шумпотон вал.

Отӥяз Чехословакие вуимы, ыбылӥськем уг ни кылӥськы вал. 1945-тӥ арын 10-тӥ мае монэ Польшаысь заводэ ужаны ыстӥзы, радиостанциосты, аппаратъёсты тупатъяй. Котькуд нунал норма быдэсъяны кулэ вал, ӟеч ужаме понна туспуктэмме Данъян пул вылын но возизы, «Отличный связист» значок сётӥзы. Усто ужаме понна полякъёслэн доразы ужаны кельтэмзы потэ, вал, скал, 40 гектар музъем сётом, пан луод, шуизы. Но мӧзмон вордскем палъёсам вуттӥз.

1947-тӥ арын 6-тӥ мартэ демобилизовать каризы. Эграозь поездэн вуи.

Мамае но сестраосы шуизы, Сэп школаын, пе, егит дышетӥсь Анна Тимофеевна ужа, ӵем дыръя дорамы пыра. Апрель толэзе ми соин тодматскимы, ӵош улыны вераськимы, нош 2-тӥ мае пичи куно лэсьтӥмы.  Озьы кутскиз мынам мирной улонэ.

  Галина Лекомцева

Удмурт Дунне
By Удмурт Дунне Июнь 21, 2016 11:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<