Удмуртиысь дано журналистлы Геннадий Романовлы 80 арес

Удмурт Дунне
By Удмурт Дунне Июнь 21, 2016 11:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
романов

Г. Романов али но бусыын, гидын, колхоз контораын…

Кельтэм пытьы токма ӧвӧл

80 арес тырмонзэ пусъе ӵош ужась эшмы Геннадий Романов. Туннэ но со нуналлы быдэ вамыштэ редакцие, потэ командировкае. 50 арлэсь кема тыршемез пусъемын уно Данъян грамотаосын, со — УАССР-ысь культура удысысь дано ужась, Удмуртиысь дано журналист. Юбилеез азьын поттӥз куинетӥ книгазэ — «Кельтэм пытьы токма ӧвӧл». Отысь оглюкетсэ ӵектӥськом лыдӟисьёсмылы.

Апайёсылэн верамзыя — оло оскоды, оло уд — вордскиськем ыж гидын. Со вылэм война кутскемлэсь азьло туж шулдыр нуналэ, 1936-тӥ арын 17-тӥ инвожо толэзе. Нэнэе, колхозын ужаса, одӥг нунал но шутэтскыны (декретэ) потатэк, 44 аресаз берпуметӥзэ нуны ваем. Инмар солы 8 пинал вордыны сётэм, но нырысетӥез но мон азьын вордскем нылъёсыз кема улӥллямтэ.

Вордскем Пежвай гуртэ мае но адӟылымтэ, кыӵе гинэ сильтӧл пыр потымтэ ќвќл. Война кутскон азьын, гуртысь ик висись адями тыл поныса, гужем уйшорын ӝыныез пала гурт сутскем, пеньӟем. Ми но отчы сюриськеммы — таӵе адӟонэз нокинлы уд сӥзьы.

Пежвай калык чидам, нокытчы палэнэ кошкымтэ. Ваньзы ӵыжак выль юртъёс пуктӥллям. Мынам но выжыосы, бере кыльытэк, сутскем коркамы интые ик юрт ӝутӥллям.

Пичи дыръям кылыктэм ерпечка вал: пиосын жугиськылӥ, кесям дэремъёсын доре бертылӥ. Нэнэ ноку ӧз тышкаськылы, кинэн жугиськид шуыса, юалляз но тятяедлы верало шуылћз. Собере, кӧня ке нунал асме зӥбыт возьыса, тятяелэсь жугемзэ возьмаса, улӥ. Но одӥг пол но кизэ, езэ йӧттылэмез ӧй вал. Озьыен, нэнэ мон вылэ ноку ӧз чагиськылы. Сое-а ӟеч сямъёслы дышетон уд шуы?

* * *

7-тӥ классэз Данъян грамотаен быдтӥ. Табере мар кароно? Колхозэ ужаны кылёно яке дышетсконэз азинтоно? Азинтоно ке,  Зура черкогуртысь шор ёзо школае мыноно, арлы быдэ 150 манет коньдон тыроно. Нэнэ шуиз: дышетыны коньдон ум шедьтэ. Мон ачим утчало, шуи. Со вакытэ удмурт радиое, «Советской Удмуртия» но Зура ёросысь «Сталинец» газетъёсы иворъёс гожъяны кутски вал. Отысь пичиен-пичиен гонорар сётылӥзы. Ваньзэ сое люкай но дышетсконэ понна тыри.

Шор ёзо школаын дышетскемме ик ӧй шӧдылы — 10-тӥ классэз «4»-ёслы но «5»-ёслы быдтэме сярысь аттестат басьтӥ.

 * * *

Армиын командир дораз ӧтиз но шуиз: тонэ, пе, 1 арлы санинструкторе дышетскыны келяськом — Спасск-Дальний кар сьӧры. Оло шумпотоно, оло бӧрдоно, нырысь-валысь ӧй вала. Куке эшъёсылы та сярысь верай, синвуосы потӥзы. Но соос буйгатӥзы: арлэсь ортчемзэ но, пе, уд шӧды.

Со вал 1955-тӥ арын. Милемыз дышетӥзы медицина удысысь майоръёс но подполковникъёс. Дышетсконме «4»-лы но «5»-лы гинэ йылпумъяй, Данъян грамота сётӥзы. Собере келязы туж лушкем войсковой часте, интыяськемын Куйбышевка-Восточная станциын. Милям Ми-4 вертолётъёсмы вал. Отын 2 ар дышетски атом бомбаен ожмаськонлы. Огпол шудтэм учыр луиз. Одӥгез вертолётмы, куинь гурезьёс-сопкаос вискы сюрыса, музъем вылэ усиз. Ярано, лётчикъёслы номыр ӧз луы. Вертолётэз эскерон вылысь мукетыз вертолёт лобиз. Но таиз но усиз. Мугез тодмо луиз: тӧл отын гумыетӥ кадь поръя вылэм. Воштос ёзъёс шедьтыса, 2 машинаысь 1 вертолёт люкам. Со инме ӝутскиз! Сыӵе шумпотонэз, оло, ноку адӟылэме ик ӧй вал.

* * *

Ижысь гурт хозяйствоя институтын диплом уже сӥземын вал Дэри ёросысь «Путь Ильича» колхозысь парсьёсты искусственной амалэн бызьылытонлы. Отын уго производствоя практикаме ортчи, одӥг гужемзэ зоотехник луыса ужай. Нокин косытэк-курытэк, фермаын парсьёсты бызьылытон пункт лэсьтӥм. Малпанме, ужме умоен лыдъяз но юрттӥськиз колхозлэн тӧроез Николай Тарасов. Выль уж уноезлы быдэстонтэм кадь потэ вал. Соин ик, вылды, Якшур кузё нырысетӥ парсьпиосмес учкыны фермае васькиз. Кельшизы солы сяртчы кадь чебересь нурскетӥсьёс. Со вал 1962-тӥ арын. Таӵе амалэн со вакытэ одӥг колхоз-совхоз но уг ужа на вал. Озьы дипломме капчиен ути, институтэз эшъёсылэсь быдэс толэзьлы вазьгес быдтӥ но, Ува ёросысь гурт удысъя управление ужаны направление сётӥзы. Но оштолэзьлэн шораз ваньмыз мукет пала берытскиз, ӧтизы партилэн Удмурт обкомаз но отын шуизы: гуртэ мыныны ноку бер ӧвӧл, туннэ тӥ кулэ мукет удысын — иворъёс сётӥсь ёзын. Ужаны ыстӥзы «Удмуртская правда» но «Советская Удмуртия» газетъёслэн огазеям редакциязы, гурт удысъя консультант-специалист луи.

* * *

1971-тӥ арын КПСС-лэн ЦК-ез Вылӥ партийной школаяз журналистэ дышетскыны лэзиз. Москваын 2 ар тодон-валан люкай но кыкетӥзэ горд диплом басьтӥ. Но дышетсконэлэн кутсконэз юн секыт вал. Нырысетӥ сентябрь азьын кышноелэн анаез кулӥз. Обкомысь орготделлэн кивалтӥсез Игорь Бердников доры мыныса, кылдэм югдуре сярысь мади, дышетскыны уг мыны ни, шуи. Ӝыны толэзь семьяяд шутэтскы, Москвае югдуред сярысь жингырто, пе, нош интыяд али шуак-дуак нокинэ ум шедьтэ. Соку мынам 3 нылпие вал ни, Валералы 3 арес гинэ. Но партия ыстэ бере — мыноно. Нырысьсэ кошкыкум, пие пыдъёсам кырмиськиз но бӧрдыса кошкыны уг лэзьы. Ачим но синвуаськи. Кыл сётӥ, толэзьлы быдэ бертыло шуыса.

Вылӥ партшколаез быдтон азьын мыным Москвае кыльыны ӵектӥзы. «Птицеводство» журналлы, пе, валтӥсь редактор кулэ. Ӝыны ар ВШИ-ын ик улод, собере квартира сётом, шуизы. Бен, ваньзэс столицае уг кельто. Но кышное Москвае мыныны пумит луиз. Семья вормиз, сотэк но кӧня курадӟытӥ ни, жаль потӥзы.

* * *

Москва бере мон юн дӥсьтӥсь вал. Йырын трос ӟеч малпанъёс бергало. Но редакциын 8 толэзь но ужаны ӧз сётэ, обкоме инструкторе басьтӥзы. Мыным соку 38 арес но тырмымтэ на вал.

Одӥг аре юосты октонэз чакланы Шаркан ёросэ ыстӥзы. Сосновка котырысь сюрес дурысь ӟег бусые кожи. Валаса но ӧй вутты — машинае вӧзы туж чебер выль «Газик» дугдӥз. Отысь каллен гинэ потӥз обкомлэн нырысетӥ секретарез Валерий Марисов. Сыр куалекъясь луи, ява. Мар вазьыны но уг тодӥськы. Ӟечъяськеммы бере юа: вазь на-а араны? Одӥг-кык нунал мед куасьмоз на, шуисько. Нош районын вань ни-а, пе, арасьёс. Туннэ «Мишкинский» откормочной совхозын бусые потӥзы, валэктӥсько. Туж умой, пе.

Котькуд понедельнике В. К. Марисов аппаратсэ, кивалтӥсьёсты но уполномоченнойёсты обкоме люкалляз. Куд-ог ёросъёсъя отчёт лэсьтылӥзы. Та кенешын со монэ сыӵе ушъяз но ваньмызлы шуиз: адӟем каре Романовлэсь, кызьы ужаны кулэ!

* * *

Улон сюресме учкыса, сое 2 бадӟым люкетлы люкыны луэ: одӥгез — Совето Союз вакыт, мукетыз — рыноке потон яке капитализме выжон дыр. Кыкез ик люкет быдэн 26 ар луэ. Куд-огез, оло, юалоз: кудӥз люкетэд умойгес яке уродгес вал? Нырысетӥяз ӟечгес вал улонмы но, ужмы но. Нош 1960-тӥ аръёсы редакциосын ужасьёслы сад-бакча люкылӥзы, ӝыныез пала удмуртъёс музъем басьтӥзы, нош ӟучъёс пӧлысь туж ичиез. Малызэ ӧм валалэ, соос музъем ужлы дышемын ӧвӧлгес — соин-а, мар-а.

Бакчаямы лэсьтӥськыны кутским но, правленилэн кузёез шуэ: мунчо пуктыны уг яра, нош корка 25 квадрат метр гинэ мед луоз. Адямиос кызьы но мунчо ӝутыны ӧз выре. Малы сыӵе куронъёс-могӟетъёс вал, нокин ӧз вера.

Со вакытэ калык огкадьгес, умой улӥз. Но демократъёс быдэс странаез тус-тас каризы, калыклэсь ваньбурзэ нимаз адямиос басьтӥзы. Белоруссиысь Брест город дорысь Беловежская пуща заповедникын СССР-ез быдтӥзы. Бадӟым страна куашказ. Табере Белоруссия но Россия 20 ар огазеяськыны выро ни…

Кызьы бен та вакытэ журналистъёс ужало? Капчиен, ӧй шуысал. Журнал-газетъёсын, мукет СМИ-осын ужасьёсты али но асьсэды уксё поттыны косо.

Кызьы шуо, ваньзэ вераса уд быдты. Оглом, ӝыны даур ӵоже редакциын ужатозям, 6 редактор воштӥськиз. Эшшо нимъёссэс гожто: Михаил Гнедин, Алексей Стрижов, Василий Михайлов, Анатолий Комаров, Алексей Шкляев, Зинаида Рябинина.

Туспуктӥз В. Беломорских

 

 

Удмурт Дунне
By Удмурт Дунне Июнь 21, 2016 11:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<