Татарстанысь кивалтӥсьёс вуылӥзы Удмуртие

Удмурт Дунне
By Удмурт Дунне 9 июня, 2016 12:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Удмуртиысь Кун Кенешлэн Тќроез В. Невоструев но Татарстанысь Кун Кенешысь комитетэн кивалтӥсь Р. Валеев.

Удмуртиысь Кун Кенешлэн Тӧроез В. Невоструев но Татарстанысь Кун Кенешысь комитетэн кивалтӥсь Р. Валеев.

2008-тӥ арын кык республикаослэн парламентъёссы валче ужанъя, ог-огзылэсь адӟем каронъя соглашение кутӥзы вал. Таяз радэ бадӟым саклык висъяськиз анай кылъёсты дышетонэз радъянлы.

Соин но Татарстанысь куноос Удмуртие вуэмзы бере нырысь ик кожизы Ижысь 97 номеро школае. Татын уго нылпиос дышето бигер кылэз. Кун Кенешлэн Тӧроез Владимир Невоструев верамъя, шаерысьтымы 19 школаын но 20 нылпи садын бигер кыллы дышето, со понна вань луонлыкъёс кылдытэмын, печатлаське бигер кылын литература, потэ «Янарыш» газет. Со дыре ик куноослэн тодматскемзы потӥз, кызьы радъяське шаерамы удмурт кылэз дышетон. Со понна вуылӥзы Ижысь К. Герд нимо гимназие.

Нялтас вераса, шаерысьтымы 216 школаын удмурт кылэз предмет чотын дышето, нош 152-аз — кружокын. Вань школаос пӧлысь та 72 процентэз. Дышетонъя но наукая министрлэн воштӥсез Игорь Белозёров ивортэмъя, берло 3 ар ӵоже та лыдпус 15 процентлы йылӥз. Нош Татарстанын ваньмаз школаосын бигер кылэз ваньзы одно ик дышето. Таӵе политика нуо 1992-тӥ арысен, Татарстанын бигер кыл кун кыл шуыса законэн юнматэмзы дырысен. Та пумысен вераськон ӝутӥськиз Кун Кенешын радъям котырес ӝӧк сьӧрын пумиськон дыръя но.

— Вань школаосын бигер кылэз дышетыны пумитъяськисьёс нырысь-валысь сюрылӥзы, но ми законэн юнматӥмы, бигер кылэз одно дышетоно шуыса! Кытчы пырод дышетытэк! — шуиз Татарстанысь Кун Кенешысь дышетонъя, культурая, наукая но национальной ужпумъёсъя комитетэн кивалтӥсь Разиль Валеев. — Анай кылъёсты азинтон вылысь азьвыл бюджетамы араз 10-12 миллион манет висъяське вал. Туэ — 182 миллион манет.

Удмуртиын но анай кылъёсты азинтон палэнэ уг кыльы. Туэ бюджетын чакламын 8 миллион манет удмурт учебникъёсты федерал перечене пыртон ужез йылаз-пумаз вуттон понна. Татарстанын ог 15 пумоез учебникъёссы федерал перечене сюремын. Анай кылэз тодӥсь чиновникъёслы но Татарстанын уждунзы вӧзы 4,5-9 процент ватсаса тыриське, зэм, сыӵе шудоос пӧлын дышетон но культура удысын ужасьёс гинэ. Но азьланяз чакламын мукет удысын тыршисьёсты но санэ басьтыны. Асьме шаерамы удмурт кылэз тодӥсь специалистъёслы ватсаса уждун тыронъя юан Кун Кенешлэн сӥзьыл сессияз эскерыны чакламын.

Берло дыре удмуртлык пала берыктӥськись егитъёс уногес луизы ке но, юалляськонъёс возьматӥзы: семьяязы ог 50 процентэз гинэ удмуртъёс верасько удмурт кылын. 2002-тӥ арын та лыдпус ог 71 процент вал. Нациосын ужан политикая министерство верамъя, 25 процентаз семьяосын нылпиосынызы удмурт сямен уг верасько. Удмуртъёс гуртын уло шуыса валан кылдэмын ке но, лыдпусъёс возьмато: 42 процентэз удмуртъёс уло городъёсын. Соин но, оло, кылэз тодон вужере кыле. Кылэз утёнъя, азинтонъя ужпум лэчыт сылэ бере, Правительство бордын чакламын кылдытыны нимысьтыз кенеш.

— Удмуртъёс но бигеръёс артэ уло, эшъяськем гинэ ӧвӧл, кылдылӥсь ужпумъёсъя ог-огенызы кенешыло. Али но кылэз азинтон понна ог-огмылэсь адӟем карыса ужамы ке, пайдаез бадӟым луоз, — шуиз Разиль Валеев.

Котырес ӝӧк сьӧрын пумиськонлы йылпумъянъёс лэсьтыса, Кун Кенешысь Национальной политикая, калыкез кышкытлыклэсь утёнъя, регламентъя но Кун Кенешлэсь ужзэ радъянъя ялан ужась комиссиен кивалтӥсь Энвиль Касимов пусйиз: туннэ ми шедьтӥмы югдур шоры огкадь учкись но малпаськись эшъёсты. Россия — одӥг кун, аспӧртэм культураосты, калыкъёсты, кылъёсты ыштӥм ке, ыштомы Россиез.

Пумиськон дыръя кенешемын кусыпъёсты эшшо но юнматыны. Удмуртиын бигер кылэз, нош Татарстанын удмуртсэ дышетонэз рос-прос радъян понна республикаосы кулэ луись литература, аудио-, видеоматериал уногес вуттон сярысь сюлмаськоно. Татарстанын ӵектэмын кылдытыны удмурт кылэз дышетонъя нимысьтыз центр. Со сяна, калык огазеяськонъёслы юрттэт сётоно, Эшъяськон юртъёсын эшъяськоно.

Елена Сараматова

Удмурт Дунне
By Удмурт Дунне 9 июня, 2016 12:35 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<