Малы элькун котькуд копейказэ лыдъяно луэ?

Удмурт Дунне
By Удмурт Дунне Июнь 8, 2016 13:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Асадуллин

Удмуртиысь коньдон ужпумъёсъя министрлэн воштӥсеныз Фарид Асадуллин.

Россиысь Лыдъян палаталэн ивортэмезъя, Удмуртилэн пунэмен тыронъёсыз (госдолг) 3 ар ӵоже 2,4 поллы будӥллям. Маин та герӟаськемын? Кенешиськом Удмуртиысь коньдон ужпумъёсъя министрлэн воштӥсеныз Фарид Асадуллинэн.

— Фарид Гильмуллович, 2009-тӥ арын республикамылэн пунэмен тыронъёсыз 7,6 миллиард манет ке вал, 2015-тӥ арын соос 41,8 миллиард луизы ни…

— Пунэмъёслы шумпотонэз ӧвӧл. Соин ик рос-прос чаклано, малы сыӵе югдур кылдӥз? Талэн кӧня ке мугез. Нырысь ик,  республикамылэн кисыяз ялан ӧжытгес доходъёс кылё, уноез кошке федерал бюджетэ. Сыӵе ини Вытъя федерал закон. Чаклалэ ай асьтэос: 2015-тӥ арын федерал бюджетэ 90,3 миллиард манет келямын, республикамылэн кисыяз 47,3 миллиардэз кылемын. Процентъёсты учконо ке,  2009-тӥ арын шаермылэн кисыяз 43 процентэз доходъёсмы кылизы  вал, нош 2015-тӥ арын 33 процент гинэ ни. Со дыре ик, 2009-тӥ арен ӵошатыса, 2015-тӥ арын Удмуртиын 2,3 поллы тросгес вытъёс бичамын…

Кыкетӥез, асьмелэн республикамы дотациос чотын улӥсь субъектъёс пӧлы пыре. Но кӧня аръёс ӵоже ни федерал бюджетысь висъяськись коньдон уг буды. Нош 2009-тӥ арын интыослы 18 выль полномочиос сётэмын вал, расходъёс 8 миллиардлы йылӥзы. Полномочиос сётыны сётэмын, нош коньдон висъямын ӧвӧл ук. Сое республика ачиз утчано луэ.

Арлы быдэ будэ бюджет удысын ужасьёслы уждун тырон,  пуктӥсько нылпи садъёс, тупатӥсько сюресъёс, куашкан калэ вуэм юртъёсысь калык выль коркаосы выжтэмын луэ. Озьыен, элькунмылэн бюджетысьтыз со понна ялан тросгес уксё кошке. Со сяна, пособиослы, пӧртэм социальной тыриськонъёслы индексация лэсьтоно на. Та вылэ ватсаськиз на экономикаын секыт югдур но.

Эшшо: сюлмаськоно луиз Россилэн Президентэзлэсь май указъёссэ быдэстон сярысь. Таосызлы 2012-тӥ-2015-тӥ аръёс ӵоже Удмуртилэн бюджетысьтыз 53 миллиард манетлэсь трос висъяськиз.

2009-тӥ арын республикамы аслаз поттэм коньдонэныз 95 процентсэ расходъёсты быдэстыны быгатэ вал на, нош 2015-тӥ арын доходъёсмы 87 процент расходъёсмылы гинэ тырмизы.

— Нош мар лэсьтэ республика пунэмен тыриськонъёсты кулэстон понна?

—  Удмуртилэн Тӧроез но Правительство югдурез сак чаклало. Ужаськомы доходъёсты будэтон но коньдонэз пайдаёгес кутон бордын.

Удмурт Республикалэн Тӧроез бордын кылдытэмын огъя бюджетлэсь доходъёссэ юнматонъя нимысьтыз кенеш. Отын улосысьтымы тужгес бадӟым выт тырисьёсын пумиськонъёс ортчыло, вераськон мынэ предприятиосты азинтон сярысь.

Мувӧй кыскисьёс элькун бюджетэз данаклы тырмыто. Но укыр трос выт федерал кисые кошке.

Мувӧй кыскисьёс элькун бюджетэз данаклы тырмыто. Но укыр трос выт федерал кисые кошке.

Оптимизация мынэ, юнме сылӥсь ваньбур вузаське, бюджет учреждениосын реорганизация мынэ но мукет. Кылсярысь, 3 ар ӵоже кун учреждениосын 5 сюрс 790 штатной единицаос кулэстэмын вал. Нимысьтыз саклык висъяське коммерческой кредитъёсты бюджет кредитъёсын воштонлы. Кылсярысь, Удмуртилэн Тӧроез Александр Соловьев сюлмаськемен, 2016-тӥ арын март толэзе федерал бюджетысь 5 миллиард 890 миллион манет кредит кыскыны луиз, 0,1 процентъем гинэ со. Та коньдон мынӥз банкъёсысь бадӟым процентъем кредитъёсты ворсаны.

Эшшо кутӥськом федерал казначействолэсь вакчи дырлы сётӥськись бюджет кредитъёссэ (0,1 процентэн). Куд-ог банкъёсын вераськиськом азьвыл аръёсы басьтэм кредитъёслэсь процентсэс кулэстон сярысь.

— Тӥляд верамдыя, али республикаямы бичам вытъёс пӧлысь куиньмосэз гинэ дорамы кыле. Берло дыре трос верасько та югдурез тупатон сярысь. Дорамы ӝыныез ке но кыльысал ке, шокчыны капчигес луысал, вылды. Та малпан быдэсмоз-а кадь?

— Учконо ке, Россиысь 71 субъектлэн кисыяз 50 процентлэсь трос вытъёс кылё. Озьыен, бюджет кусыпъёс оглом умой радъясько.  Россиысь 12 улосын гинэ шугъяськонъёс кылдо. Та ужпумъя Удмурт Республика дэмлаз Россия Федерациысь Бюджет кодексэ воштонъёс пыртыны, вазиськиз Кун Думае но Федерацияя Кенеше.   Улосын бичаськись вытъёс пӧлысь ӝыныезлэсь тросэз федерал кисые кошко ке, сыӵе субъектлы ватсаса дотациос мед висъяськозы на. Кун Дума но, Лыдъян палата но та малпанэз умоен лыдъязы. Туннэ нуналлы законопроектэз Кун Думаысь комитетъёсын эскеро ни.

— Бадӟым кун долг — со Россилэсь бюджетъя законзэ тӥян уг луы-а?

— 2014-тӥ-2015-тӥ аръёсы шаераымы та ласянь нокыӵе шекъёс, законэз тӥян учыръёс ӧй вал. Солэсь азьвыл — вал.

Кун долглэн быдӟалаез вытъёсъя доходлэсь 100 процентлы трос луыны кулэ ӧвӧл. Асьмелэн али 98,5 процент. Зэм, Россиысь 14 субъектын та ласянь умойтэм югдурзы. Шуом, Мордовиын госдолгзылэн быдӟалаез доходзылэсь 187,5 процентлы бадӟымгес.

Оглом Удмуртия — огсыр азинскись шаер. 2009-тӥ арын дорамы 60,6 миллиард манет вытъёс бичамын ке вал, 2015-тӥ арын — 137 миллиард ни. Выт бичан будӥз 2,3 поллы.

Эшшо пусъеме потэ на: бюджетысь коньдон нырысь ик мынэ пенсиосты, пӧртэм пособиосты, уждунэз тыронлы. Та ласянь шугъяськонъёс азьланяз но уз луэ.

Сергей Захаров

Туспуктӥз А. Горбунов

Удмурт Дунне
By Удмурт Дунне Июнь 8, 2016 13:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<