Пороз гуртысь песянайёс табань кадь ик ӟырдытэсь!

Удмурт Дунне
By Удмурт Дунне 1 июня, 2016 09:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
DSC_3667

Шаркан ёросысь Порозысь песянайёс но пиналъёс ог-огзэс туж ӟеч валало.

26-тӥ мае Песянайлэсь нуналзэ пусъё асьме шаерын гинэ. Со кылдытэмын «Брангурт песянайёслэн» 2012-тӥ арын «Евровидение» вожвылъяськонын 2-тӥ инты басьтэменызы валче.

Песянайлэн нуналэзлы сӥзьыса, «Удмурт дунне» газетлэн редакциез элькунысьтымы ветеран огазеяськонысь адямиосын ӵош вуылӥз Шаркан ёросысь Пороз гуртысь Пукон коркае. Пумиськон ортчиз «Удмурт дунне» газетлэн элькунысьтымы ветеран огазеяськонэн ӵош радъям «Пукон корка» ужрадэз чотын. Та проектъя чакламын ёросъёсысь арлыдоослэн шутэтскон сэрегъёсынызы тодматскыны. Кин ке, оло, нырысетӥ вамышъёс гинэ лэсьтэ ай та ужын, но вань мар сярысь но кин сярысь вераны. Азьланяз та пумиськонъёсы калыклы улон-вылонын юрттэт сётон удысын ужасьёсты, кибашлыосты ӧтчалляны чакламын. Кинлэн ке, оло, ас дораз куное бускельёссэ но ӧтемез потоз.

Пусйымон, Пороз гуртысь арлыдоос песянайлэсь нимзэ вылӥ возё — асьсэлэн быгатэменызы тодмато школаын дышетскисьёсты но, нылпи садэ ветлӥсьёсты но. Та нуналэ но дышетскись пиналъёс понна радъязы табань пыжонъя но куиськонъя мастер-класс. Нылъёслы яраз гур котырын берганы, нош пиос туж мыло-кыдо басьтӥськизы куиськон станок борды.

Шаркан ёросысь Порозысь ветеранъёслэн огазеяськоназы 131 мурт пыриське.

Нимаз Пукон корказы вань. Со шунтӥське электричествоен, тыриськонзэ администрация ас вылаз басьтӥз. Пороз муниципал кылдытэтлэн йырыз Александр Чазов шуэ: ветеранъёс — милям зарни фондмы, визь-кенеш но сётозы, пӧртэм ужрадъёсы но пыриськозы, кызьы соослы юрттӥськытэк? Тани корказьзэс тупатъяны юрттӥз ужбергатӥсь Александр Софронов.

Ветеран огазеяськонэн 5 арзэ кивалтэ ни Эмма  Корепанова.

— Пукон коркаямы арняяз 2 пол люкаськылӥськом — вторнике но четверге, — шуэ Эмма Мефодьевна. — Школаын дышетскись пиналъёс классэн-классэн вуыло дорамы. Куиськон станокен тодматско, табань пыжыны дышетско, собере асьсэос ик туж ческыт потыса сиё. Огполаз сыӵе пумиськон бере одӥгез пияш, пе, шуэ: туннэ мынам самой шудо нуналэ вал.

М. Туданова «Удмурт дуннеен» кемалась эшъяське.

М. Туданова «Удмурт дуннеен» кемалась эшъяське.

Шарканысь Тол бабайлы юрттыса, Пукон коркае ветлӥсь пиналъёс тол вылтӥ картонлэсь пӧртэм синпель кузьымъёс, басмалэсь мунёос лэсьтӥллям, пичиесь гын сапегъёс гындӥллям. Вуззы 1 сюрс 400 манетэн кошкем. Та коньдонэн басмаос, клей но киужен выроно мукет арбериос басьтӥллям. Пиналъёсты пӧртэм киужъёслы дышетэ Вера Иванова. Кылем арын со ёросазы ортчем «Зарни песянай» вожвылъяськонын нырысетӥ инты басьтӥз.

Ма, асьсэос но песянайёс киужъёс пӧлы выемын. Кин ке мар ке выльзэ шедьтэ ке, ваньзы сямен со борды басьтӥсько. Али туж аспӧртэм тапочки керттонэн выро, шортэз линейкае котыръяса, шарфикъёс чильпало. Таза улон сярысь но уг вунэто. Егитъёсызгес пенсионеръёс куас вылэ султо, нош арлыдоосызгес, ог 20-25 пала люкаськыса, фин амалэн бодыосын ветло. Пӧртэм спорт ӵошатсконъёсы вуыло.

Ужбергатӥсь Александр Софронов но туж ушъяз песянайёсты:

— Котькыӵе ужъёсы пырисько. Гуртъёстӥ концерт но возьматъяса, ветлӥськом, кафеын ортчоно ужрадъёсын но песянайёс — нырысетӥ юрттӥсьёсы. Котькуд аре Вормон Нуналлы муниципал кылдытэтын спортъя эстафета радъяськомы, пиналъёсын, егитъёсын ӵош ветеранъёс но отчы мыло-кыдо пырисько.

Шаркан ёросысь Порозысь арлыдоос мыло-кыдоесь.

Шаркан ёросысь Порозысь арлыдоос мыло-кыдоесь.

Пороз гуртын «Удмурт дунне» газетэн кемалась  эшъяськисьёс но вань. Песянайёслэсь нуналзэс пусъён ужрадэ вуылӥз 78 аресъем Маиса Туданова. Ужамын скал кыскисьын, СССР-ысь коммунистической но социалистической ӵошатсконъёсысь ударник, ужысь ветеран. Газетэн егит дырысеным ик эшъяськисько, пе. Кутсконысеныз пумозяз 2-3 нунал куспын ваньзэ лыдӟыса вуисько, шуэ.

«Герд» газетысь «Йӧноесь, визьмоесь, чебересь» визьсынанын но порозъёс вормисе потӥзы. «Удмурт Кенеш» огазеяськонлэсь кузьымъёссэ басьтӥзы Иван Кондратьев но Ольга Лопатина. Пумиськонэ люкаськемъёс шуизы, туж яра, пе, газетысь чеберлыко ужъёсты лыдӟыны. Николай Никифоровлэн «Сьӧд кашо зундэс» повестез киысь кие ветлэм, табере Геннадий Мадьяровлэсь «Аналтэм сяська»  повестьсэ озьы ик дэмен лыдӟо. Оскиськомы, Порозысь Пукон коркаен эшъяськонмы азьланьтӥськоз.

Лия Малых

Туспуктӥз Александр Горбунов

Удмурт Дунне
By Удмурт Дунне 1 июня, 2016 09:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<