Мадьяр замокын — удмурт омыр

Удмурт Дунне
By Удмурт Дунне Июнь 1, 2016 08:23
SONY DSC

Мадьяръёслы Дарали Лели возьматыны турттӥз туала но вашкала удмурт дӥсьёсты.

Удмурт культуралы сӥзем нуналъёс ортчизы Венгриысь Искасендьёрдь гуртын но Веспрем карын, фин-угор дуннелэн культурая шоркаръёсаз. Отчы вуылӥз Удмуртиысь делегация.

Та вакытэ Венгриысь Искасендьёрдь гуртын ужа Удмуртиысь посол — Дарали Лели. Со ик радъяз та ужрадэз, люказ шаерысьтымы усточиосты. Мадьяръёслы Дарали Лели возьматыны турттӥз туала но вашкала удмурт дӥсьёсты. Амаде-Байзат-Паппенхайм замок азьысь садэ пуктэм подиум вылэ потазы Ижысь Полина Кубисталэн, Эгралась Надежда Касаткиналэн, Кез ёросысь Евгения Лекомцевалэн дӥськутъёсынызы нылъёс. Шаркан ёросысь Быгы гуртысь усточиос возьматӥзы вашкала шорт дэремзэс, Румыниысь Трансильваниын улӥсь удмурт нылкышно Настя Дэметер — пурга пал дэремез.

Фин-угор дуннелэн культурая шоркарлэн дуно куноосыз — Шаркан ёросысь быгыос. Та гурт вал фин-угор дуннелэн нырысетӥ шоркарез. Быгыос паймытӥзы удмурт эктонъёсын-кырӟанъёсын. Котырес ӝӧк сьӧрын та 2 шоркаръёсысь адямиос вераськизы кылдэм шуг-секытъёс но луонлыкъёс сярысь.

— Быгыослэн, та проектэ пыриськыса, потэ вал сюресъёссэс тупатэмзы, милям — замокез, — вера Искасендьёрдь гуртлэн йырыз Аттила Галл. — Ми таӵе ужрадъёслэсь ӟечсэ гинэ адӟиськомы: пиналъёсмы фин-угор культура сярысь тросгес мед тодозы.

Мода возьматэм но концерт пуктэм бере мадьяръёс удмуртъёсын ӵош перепеч но кыстыбей пыжизы, удмурт эктонъёсты эктӥзы, шудӥзы. Миклош Дэметер вераз удмурт крезьгуро инструментъёс сярысь — арган, кубыз но крезь. Кубызчиосты утчан понна со котыртӥз россиысь пӧртэм улосвылъёсысь удмурт гуртъёсты.

Ужрад сярысь гуртлэн газетаз, мерлыко вотэсбамъёсын гожтэмын ке но вал, жаляса верано, мадьяр калык трос ӧз люкаськы. Нош лыктэмъёсызлэн мылкыдзы ӟеч вал!
Ар ӵоже Искасендьёрдьын эшшо трос ужрадъёс чакламын на.

Мария Векшина

Удмурт Дунне
By Удмурт Дунне Июнь 1, 2016 08:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<