Кызьы сценарий гожтоно

Удмурт Дунне
By Удмурт Дунне 30 июня, 2016 11:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

 

Умой киноын ӧжыт верасько

Кинолы сценарий гожтыны дышетскыны луэ. Но солэн, котьмалэн кадь ик, вань аслаз куронъёсыз но кескич амалъёсыз, шуо удмурт кино лэсьтӥсьёс Петыр Палган но Дарали Лели.

кинолагерь

Эстониысь Цийстреын ортчиз сценарий гожтыны дышетон.

 Валтӥсь эсэпъёс

  1. Котькуд кинолэн вань одӥг валтӥсь малпанэз — темаез. Быдэс фильм со котыр берга. Яратонлэн кужымез, астэ гажан, инкуазез утён, висёнлы пумит нюръяськон, вордскем шаереныд данъяськон яке кинэ ке жалян но утён — оломар но луыны быгатэ.
  2. Нырысь ик фильмез син азе пуктоно, котькуд сценазэ малпано (ог 50-55 сцена луыны кулэ), собере гинэ диалогъёсты гожтоно.
  3. Йырад выль сцена лыктэ ке, нимзэ но пуштроссэ гожты бумага юдэс вылэ. Юдэсъёсты сураса, трос пол интыенызы вошъяса — фильм кисьмалоз.
  4. Геройёс пӧртэмесь луыны кулэ, котькудӥзлэн аслаз сямыз.
  5. Геройёслэн вань асьсэлэн историзы, биографизы, мотивацизы. Сценарист кулэ соосты тодаз возьыны, озьы капчигес сценаосты малпаны но диалогъёсты гожъяны.
  6. Мудрон, шузи малпанъёсты но гожтыса кельтоно, йырын бергатоно, утёно. Оло, яралозы.

 Ваче вуон: протагонист но антагонист

  1. Киноын котьку луэ конфликт — мукет адямилы, обществолы, инкуазьлы, пӧйшурлы, висёнлы пумит нюръяськон. Комедиын но озьы со. Жанръёсъя пӧртэмлыкез ӧвӧл.
  2. Валтӥсь героез протагонист шуо, нош тушмонзэ — антагонист.
  3. Антагонист умой но луыны быгатэ. Ромкомын (романтической комедиын), кылсярысь, со яратонлы пумитъяськись нылаш.
  4. Протагонист пумозяз нюръяськыны кулэ. Со понна малпано, малы солы уг яра киоссэ лэзьыны, пегӟыны, сётскыны… Шуом, со ассэ туж гажа, малы ке мур оске, кинэ ке зол яратэ яке кыӵе ке шуг югдуре шеде. Одӥг ласянь, вань тушмон, мукет ласянь, героймы но — дӥсьтӥсь, эрказмем адями.
  5. Протагонист фильм кутсконын котьку антагонистлэсь лябгес, соин ик учкись пумозяз уг тоды, быгатоз-а со вормыны, уз-а. Со понна протагонистлы трос дышетсконо, малпаськоно, дасяськоно, тыршоно.

 Ма понна нюръяськоно

  1. Киноын кулэ луыны ставка — мар понна нюръяське герой. Мӧзмыт сценарийын ставка ӵемысь укыр пичи, соин ик сое будэтоно (кылсярысь, уксё понна гинэ медаз, улонэз понна мед нюръяськоз). Куд-ог сценарийёсын геройлэн аслаз улонэз но укыр дунтэм лыдъяське — соку эшшо тросгес шуг-секыт ватсано, дунзэ ӝутоно — нылпиезлэн улонэз понна мед нюръяськоз (висёнлы, тушмонлы пумит).
  2. Кинолэн нырысетӥ люкетаз учкисьлы возьматоно, мар понна герой нюръяське но кыӵе шуг-секытъёс сое витё. Кылсярысь, вестернъёсын кутсконаз ик бандитъёс сярысь ивор вӧлме но, шериф адӟе, адямиос пегӟо шуыса. Пумаз со огназ кыле. Кышкыт ук. Ставка — шерифлэн данэз но улонэз.
  3. Действие мынэмъя шуг-секытъёс тросгес но тросгес луыны кулэ.

 Ваче вераськонъёс

  1. Диалогъёс кулэ луыны вакчиесь но мур пуштросъемесь. Мултэс вераськон действиез уг азьланьты но номырзэ выльзэ уг возьматы, героез но дуннезэ уг усьты.
  2. Киноын тыршоно ваньзэ суред но шудон пыр возьматыны. Макем ичигес верасько геройёс — сокем умойгес.
  3. Веракуз валтӥсь герой котьку огдыре кышка но, оске но. Со ноку но 100 процентлы кужмо ӧвӧл. Сценарист тодыны кулэ, малэсь кышка но малы оске солэн героез.
  4. Умой диалогын дась йылпумъянъёс (выводъёс) ӧвӧл. Учкись соосты ачиз лэсьтэ. Дасьсэ тэркы вылын сётоно ӧвӧл!
  5. Шӧдонъёс (яратон, вожан, адӟемпотостэм карон) сярысь киноын уг верасько. Соосты шудоно!

 Геройёс

  1. Нимтулъёссы син шоры йӧтӥсь геройёслэн гинэ вань.
  2. Валтӥсь геройёс уг ышыло, соосты вис карытэк, котькуд сценаын, возьматоно.
  3. Валтӥсь геройлэн оскымон юрттӥсез, эшез вань.

Сценаос но суредъёс

  1. Котькуд сцена — пичи кино выллем. Солэн аслаз радыз, мугез но кульминациез, пумыз вань. Котькуд сцена азьланьтэ оглом действиез.
  2. Котькуд сценаын ӧжытсэ одӥг учыр вань. Солэн но мугез вань, ачиз но выль учырлы муг сётэ. Кылсярысь, чузъяське геройлэн кыӵе ке выль малпанэз.
  3. Котькуд выль суред (план) юнме шорысь уг кылды — воштӥськон герӟаськемын выль малпанэн, шӧдонэн, реакциен.

 Комедия сярысь

  1. Тросэз комедиос выл-тӥяськись адямиосты но пӧяськисьёсты сереме уськыто.
  2. Лушкаськисьлы, пӧясь-кисьлы одно ик пунэмзэ берыктоно.
  3. Ромкомъёсын протагонист — пияш, антагонист — нылаш (95% учыръёсын). Яке кыкназы ик протагонистъёс луо, нош антагонист — востэм сямзы, семья, вожвылъяськись пияш, сазь йырвизь.

 Дась сценариез лусъён

  1. Куштоно валтӥсь темаен (малпанэн) герӟаськымтэ сценаосты.
  2. Сценарий мӧзмыт ке, антагонистэз (тушмонэз) кужмоятоно. Яке протагонист лябгес мед луоз, малпаськись.
  3. Протагонист матысь адямиосызлы выль шуг-секытъёсты вае. Мӧзмыт ке, соосты ватсано!
  4. Конфликтлэсь мугзэ но солэсь фонзэ суредъёсын но действиен возьматоно, диалоген возьматыны уг яра — тазьы ляб киноосын гинэ лэсьтыло.
  5. Киноез лэсьтыку, сценариез тупатъяло на.

Дасямын Robin U. Russin,

William Missouri Downs.

Screenplay: writing the picture книгая.

Туспуктӥз Урмас Реисберг

Удмурт Дунне
By Удмурт Дунне 30 июня, 2016 11:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<