Кык Гербер: пӧртэм но огкадь

Удмурт Дунне
By Удмурт Дунне Июнь 10, 2016 12:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Арня кутсконын люкаськылӥзы «Удмурт Кенеш» огазеяськонлэн исполкомаз пырисьёс. Эскеризы Гербер шулдыръяськонъёсты ортчытонлы дасяськонэз, вераськизы огазеяськонлэсь 25 аръем юбилейзэ пусъён сярысь.

SONY DSC

Кызьпу арама кырӟатоз

Ижысь Кызьпу арамаын 12-тӥ июне 13 часысен удмуртъёс понна Гербер шулдыръяськон кутскоз. Берло дыре татчы артысь ёросъёсысь но удмуртъёс вуо. Таяз рад шулдыръяськон сӥземын луоз «Удмурт Кенеш» огазеяськонлэсь 25 аръем юбилейзэ пусъёнлы. Сӥё-дано ужрад ноябрь толэзе ортчоз ай, но Герберын но «кенешчиос» асэнызы тодматозы. Таин валче чакламын арамалэн огпалаз кылдытыны нимысьтыз быдэс азбар. Нимаськоз со «Кырӟась арама».  Огазеяськонлэн вице-президентэз Алексей Серебренников верамъя, татын чузъяськозы удмурт кырӟанъёс. Котькуд кожисьлы чебер песенник сётозы. Ӵапак отысь гуръёсты шаерысьтымы артистъёсын ӵош быдэстыны луоз. Кырӟан удмуртъёсты «Удмурт Кенеш» кадь огазеяны кулэ.

Со сяна, азбарын сылоз гур. Отын дугдылытэк пыжозы табань. Радъямын луозы пӧртэм удмурт шудонъёс но вожвылъяськонъёс. Кибашлыос дышетозы манет шуккыны. Тодосчиос радъялозы «Тодосчи куаын» пӧртэм археологической экспедициосысь шедьтосъёсын адӟытон. «Удмурт дуннелэн» азбараз котьку сямен ик газетлы гожтћськыны луоз. Бератаз вань лыктэм куноос люкаськозы флешмобе: 25 лыдпусэз кылдытозы. Ужрад сярысь лэсьтӥськоз кино.

Вӧсям  ӝуклы куддыр сютэмъёс кадь бидонэн лыкто. Туэ сыӵе шӧртчиослы но ӝук пичиен гинэ висъяськоз. Кудӟытӥсь юон уз вузаськы.

 Пӧбъя ӵошатскытоз

25-тӥ июне элькун Гербер ортчоз Сюмси ёросысь Пӧбъя гурт котырын. Возь сайкемын, сценаос лэсьтэмын. Ижысь Эшъяськон юртысь ужрадэз ортчытон понна кыл кутӥсь Татьяна Фёдорова верамъя, туэ валтӥсь сцена вылысен чузъяськозы удмурт кырӟанъёс гинэ. Котькуд делегациез пумиталозы азбаръёслэн кузёоссы, хозяйствоослэн кивалтӥсьёссы.

Бордазы кыскозы, вылды, батыр шудонъёс. Котькудӥз сямен делегация аслэсьтыз батырзэ дася. «Удмурт кенешъёс» но тужгес кужмозэ но сэзьзэ пӧлысьтызы быръё. Воргоронъёслэсь эскерозы пуклё куяны, гира ӝутъяны быгатэмзэс. Санэ басьтозы удмурт дэремен луэмзэс но. Вожвылъяськонын 1-тӥ инты басьтэм муртлы сётӥськоз ыжпи, 2-тӥ интылы — кролик, 3-тӥ интылы — атас. Пудозэс гуртоос ӧз жалялэ. Кибашлыос соослы чебересь ящикъёс шукко. Гербер шулдыръяськон шулдыр мед ортчоз шуыса, сюмсиос маин быгато ог-огзылы юртто.

Аспӧртэмлыко конкурс чакламын веник керттыны яратӥсьёслы. Писпу вайёс но йӧнатӥсь турын-куаръёс дасямын луозы. Со веникез отӥяз доре но нуыны яралоз.

— Малпано калыкез огазеясь вожвылъяськон. Арысь аре адямиос солы мед дасяськозы. Кылсярысь, Сабантуйын вал вылын ӵошатскон котьку сямен туж аспӧртэмлыко ортче, сотэк одӥг шулдыръяськон но уг кутскы. Оло, асьмелы но соослэсь адӟем кароно? — исполкомчиослы вазиськиз Удмурт театрлэн директорез Андрей Ураськин.

Солы дурбасьтӥз Историяя, кылъя но литературая Удмурт институтлэн директорез Алексей Загребин. 1920-тӥ аръёсы валэн ӵошатсконъёс удмуртъёслэн сямазы пыӵамын вал. Умой луысал сое улӟытыны, шуиз Алексей Егорович. Но туала вакытэ та ӵошатсконэ дасяськыны но отчы пыриськыны мылкыд карисьёсты шедьтыны шуг. Но кин тодэ, азьланяз, оло, калыкез огазеясь кыӵе ке вожвылъяськон малпалозы ик. Огвакытэ мотоблокъёсын ужаны быгатэмез эскерылӥзы ук. Но та сяме ӧз пыӵа.

Элькун Герберын ик шаерысьтымы вылӥ кивалтӥсьёс сӥлы карозы кизён ужъёс дыръя тужгес ӟеч ужам уйпалась 3 но лымшорысь 3 механизаторъёсты. 1-тӥ инты басьтэмъёслы 12 сюрс манет сётӥськоз, 2-тӥе потэмъёслы — 10 сюрс, 3-тӥ кылемъёслы — 8 сюрс манет. Нимтулъёссы тодмо луозы арня кутсконын.

Удмуртлыкен герӟаськем юанъёсъя валамтэос я эчешонъёс медаз кылдылэ шуыса, исполком бордын люкамын экспертъёслэсь нимысьтыз кенеш. Отчы пыремын тодосчиос, министръёс, артистъёс, спортсменъёс — ваньмыз 30 мурт.

Елена Сараматова

Туспуктӥз Мария Векшина

Удмурт Дунне
By Удмурт Дунне Июнь 10, 2016 12:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<