Кыӵе ужпумъёс сюлмаськыто сарапулъёсты?

Удмурт Дунне
By Удмурт Дунне Июнь 1, 2016 15:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мылкыд вылын гинэ уд ворттылы…

Сяме пыриз ни Кун Кенешлэсь нуналъёссэ пӧртэм ёросъёсын ортчытъян. Кылем арня вискын Кун Кенешысь ялан ужась комиссиосын кивалтӥсьёс, депутатъёс вуылӥзы Сарапул пала законъёслэсь быдэсъяськемзэс эскерыны, интыысь кивалтӥсьёслэсь мылкыдъёссэс кылзыны.

_DSC6204

Кун Кенешысь депутатъёс Сарапул палъёсын.

 Музъемлы вожмаськон

Кун Кенешлэн Тӧроез Владимир Невоструев Сигаево черкогуртын  пусйиз: таӵе ужрадъёс дыръя законъёсты умоятонъя ӟеч дэмланъёс вуо. Таяз рад та зол шӧдӥськиз Гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссилэн ужан ӧраз.

Сарапул ёрос администрациысь музъем кусыпъёсъя ёзэн кивалтӥсь Анастасия Палабугина ивортэмъя, ёросысь 17 гурт поселение пӧлысь 14-яз гурт удыслы чаклам музъем пайёслы люкылэмын. Ваньмыз 172 пай. Адямиос соослы свидетельство басьтыны уг дырто. Секыт югдур нокинлы кулэ луисьтэм пайёсын. Сыӵе кесэгъёс муниципал кылдытэт кие выжыны кулэ. Но Россия Федерацилэн Конституциезъя адями ваньбурзэ кулэтэм каре ке но, сое судтэк таланы уг луы. Соин ик котькуд учыръя судэ вазиськоно луэ. Но суд ар но ӝыны ӵоже кыстӥське. Аналмыса улӥсь музъем эшшо но пашме.

— Ёросамы 40 пай пумысен суд ортчиз ни. Ужез капчиятон вылысь ӵектӥськомы: адями кулэмын ке, наследникъёсыз ӧвӧл ке, нотариус дорын басьтэм свидетельствоя гинэ мед луысалыз музъемез муниципал кылдытэтлы сётыны. Соку судъёстӥ костаськонлэн дырыз трослы вакчи кыльысал, — шуэ А.  Палабугина.

Та ӵектонэз Кун Кенешын нимысьтыз эскерозы на. Музъем 3 ар ӵоже ӧз гыриськы, ӧз кизиськы ке, сое кун таланы быгатэ. Но туннэ та закон уг ужа: музъем буш улэ, нош таланы сое уг луы. Комиссиен кивалтӥсь Владимир Варламов верамъя, законэ воштонъёс пыртон бордын ужано: кузё 3 ар ӵоже ӧз утялты ке, кесэгез талано. Отӥяз, 3 ар интые, кизьыны 2 ар дыр сётоно. Вологда, Кострома, Пермь палъёсын уго уноез бусыоссы нюлэсэн шобырско ни.

2015-тӥ арын мартысен Россиын кун но муниципал музъемез ужбергатӥсьёслы но музъемлы кулэяськись адямиослы пуктӥськон я хозяйство возён понна дунтэк висъяло. Удмуртиын туннэ муниципал кылдытэтъёсъя список но лэсьтымтэ на, кытын висъяськоз сыӵе музъем, кин сое басьтыны быгатоз. В. Варламов верамъя, санэ басьтӥськозы гуртын кулэ луись профессия басьтэмъёс.

 Гуртоос возьмало стадион

Кигбаево палась парсь вордонъя ферма куашкан калэ вуылӥз. Али пыд йылаз султӥз. Отысь югдурез адӟиз Кун Кенешлэн Тӧроез Владимир Невоструев.

Туннэ «Кигбаевский бекон» огазеяськон шаерамы огез азьмынӥсез. Тӧдьы бадӟым выжыысь парсь вордонъя племенной завод луиз 2012-тӥ арын. Но кивалтӥсьёсыз таин гинэ уг буйгало. Али кутскиллям туала куронъёслы тупась 5 гид ӝутыны. Озьы 10 сюрс 200 йырлы парсьёс уногес луозы. Та юрттоз арлы быдэ эшшо 2,1 сюрс тонналы уногес сӥль поттыны. Туннэ татын 40 сюрс  парсь.

— Рынокын инты шедьтон понна вожвылъяськон туж бадӟым, — шуэ «Кигбаевский бекон» огазеяськонлэн валтӥсь директорез Андрей Шутов. — 2005-тӥ арын гинэ Россия 500 сюрс тонна парсь сӥль поттэ вал,  троссэ кунгож сьӧрысь вуттылӥзы. Али ассэ быдэсак сюдыны быгатэ, арлы быдэ уго ог 300 сюрс тонналы парсь сӥль уногес поттыны ӧдъязы. Удмуртия али ог 50 сюрс тонна сӥль поттэ. Но ю тысь дун будэ — 1 тоннаез 11 сюрс манет тыр усе. Соин ик парсь вордон дуно луэ. Со дыре ик пудо вордон удыслы субсидиос туж зол кулэсмо. Котьма ке но Россиысь 63 улосвылэ сӥльмес келяны быгатӥськомы.

Огазеяськон Кигбаевоысь шор ёзо школалы стадион лэсьтыны юрттӥськоз. Школа 1976-тӥ арын пуктэмын. Спортзалзэс выльдӥзы, нош стадионзы воксё ӧвӧл. Сарапул ёросын татын гинэ гуртоос но пиналъёс бызьылон интытэк кылемын. Футболэн шудыны туп В. Невоструев кузьмаса кельтӥз ни.

 Кыл но тазалык

Ӟырдыт вераськон ӝутӥськиз Национальной политикая, калыкез кышкытлыклэсь утёнъя, регламентъя но Кун Кенешлэсь ужзэ радъянъя комиссилэн кенешаз, кун кылъёс сярысь законэз эскерыку. Комиссие пырисьёс вуылӥзы Дулесово  гуртэ. Татын бигеръёс, удмуртъёс, ӟучъёс уло.

— Дулесовоын 26 мурт гинэ удмуртъёс. Соос пӧлын удмурт кылын вераськисез воксё чиньыен лыдъямон! Соин ик азинскон сярысь вераськыны секыт,  — шуэ «Удмурт Кенеш» огазеяськонэн кивалтӥсь Татьяна Ишматова. — Но шумпоттэ соиз: ёросын удмурт кылэз дышетыны кутскизы нылпи садысен. 4 дышетӥсь шедьтэмын  Тарасовоысь, Шевырьяловоысь но Нечкиноысь садъёсы. Таос ик школаын но урокъёс нуозы.

Пиналъёс шумпотыса пырисько удмуртлыкен герӟаськем ужрадъёсы, нылпиослэн мылкыдзы вань кылэз дышетыны. Но туннэ мылкыд вылын гинэ уд ворттылы — кун кылъёсъя законэ воштонъёс пыртоно. Закон вужмемын ни шуыса, «Удмурт Кенеш» вазиськиз вал 3 ар талэсь азьло Кун Кенеше. Удмурт кыл — кун кыл, но со бумага вылын, улонын со уг ужа шуыса, комиссиын ваньзы туннэ но соглаш кариськизы. Комиссиен кивалтӥсь Энвиль Касимов шуиз: сӥзьыл законэ воштонъёс пыртон пумысен юанэз эскерозы сессиын.

Нылпиослэн тазалыксы сярысь но малпаськоно. 2013-тӥ арысен быдэ вуымтэ пиналъёслы алэмын уйин анай-атайзытэк ульчаостӥ ветлыны. Нылпиосты куноятӥсь ужбергатӥсьёслы штрафъёс тупатэмын. Но со дыре ик пиналзэс чакласьтэм анай-атайёс понна нокыӵе кыл кутон чакламын ӧвӧл. 2014-тӥ арын 1 сюрс 700 пинал уйин кутэмын. Миым — 1 сюрс 500. Ваньзы соос мумы-бубыоссылы берыктэмын. Куд-огез керетыны кутскылӥзы, югдурез утисьёс изьыны уг сёто шуыса. Тазалыкез утёнъя, демографияя но семья политикая ялан ужась комиссиен кивалтӥсь Светлана Кривилёва шуэ: Кун Думае ӵектонэн потыны чакласькомы, нылпиоссы сярысь сюлмаськисьтэм мумы-бубыосты кыл кутон улэ кыскыны мед луоз шуыса. Соку, оло, тросэз сазьтӥськозы. Со сяна, нылпиослэсь арлыдзэс чакласа, урамын калгыны дыр тупатоно. 7-9 аресъем мурт 23 часын изьыны кулэ ни, шуэ С. Кривилёва.

Но нылпиос сярысь сюлмаськыку, палэнэ кельтыны уг яра сӧсыръёсты но. Сарапул ёросын туннэ 1 сюрс 552 инвалид. Таос пӧлысь 97-ез — пиналъёс. Но туннэ ёросысь 38 школа пӧлысь 3-ез гинэ инвалидъёслы тупамон каремын, мукетъёсаз пандусъёс, пырон ӧсъёс тупатэмын ӧвӧл. Ёросын культурая 27 объект, та пӧлысь 2-аз гинэ инвалидъёс капчиен сюрыны быгато.  Инвалидъёс понна сюлмаськись адямиос, лэсьтӥськисьёс куддыр асьсэос но уг валало, кызьы шонергес юртэз тупатъяно, шуэ Калыкез улон-вылонын утён политикая ялан ужась комиссиен кивалтӥсь Ольга Казанцева. Сигаевоысь куд-ог юртъёсты эскерыкузы, та умой адӟиськиз. Соин ик ӵектӥзы: дасяно нормативъёсын  методической пособиос, ортчытъяно семинаръёс.

* * *

Сарапулын трос лэчыт ужпумъёс ӝутэмын вал. Соосты азьланяз но эскерозы Кун Кенешын, шуиз Владимир Невоструев. Нош ёрос йыр Игорь Асабин оскытӥз: «пӧськыоссэс» районын бурмытыны тыршозы.

Елена  Сараматова

Туспуктэм: udmgossovet.ru

 

Удмурт Дунне
By Удмурт Дунне Июнь 1, 2016 15:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<