Ижкар Гербер сӥземын «Удмурт Кенешлы» 25 ар тырмонлы

Удмурт Дунне
By Удмурт Дунне 7 июня, 2016 16:08

гербер12-тӥ инвожое 13 часысен Ижысь Кызьпу арамаын кутскоз Гербер шулдыръяськон. Таяз рад со сӥземын луоз «Удмурт Кенеш» огазеяськонлы 25 ар тырмонлы.

— Кылем арын туж чебер пӧрмиз «Удмурт дунне» газетлэсь 100 аръем юбилейзэ Кызьпу арамаын пусъён. Калык али ке но сое тодаз вае, — вера огазеяськонэн кивалтӥсь Татьяна Ишматова. — Малпамы: Ижысь калык «Удмурт Кенеш» сярысь тросгес мед тодоз шуыса, «удмурт дуннеослэсь» адӟем кароно. Ижысь Индустриальной ёросысь администрация мылкыдмес умоен лыдъяз. Соку йырмес тӥяны кутским: мар кароно, Гербере калык эшшо но мыло-кыдогес мед пыриськоз шуыса? Пуштроссэ узырмытоно! Соин ик туэ кылдытоно кариським «Кырӟась арама» азбар. Татчы лыктыса, котькудӥз мылкыд карись аслэсьтыз кырӟанзэ огназ микрофон азьын уз быдэсты. Ваньзы одӥг кырӟанэз, бадӟым хорын музэн, кырӟалозы. Аппаратура вуттомы. Адямиослы тодмо кырӟанъёсын песенник дасяломы. Юрттӥськозы Ижысь тодмо ансамбльёс. Ӵапак соосын ӵош вань мылкыд карисьёс кырӟаны быгатозы. Дэмен кырӟаны лыктом шуыса, ивортӥзы ни шарканъёс. Одӥг вакытэ ваньмыныз ӵош одӥг кырӟанэз кырӟаны туж секыт. Но оскиськом: пӧрмоз.

Малы огазеяськон калыкез дэмен кырӟатыны малпа? Удмурт калык ужакуз но, шулдыръяськыкуз но, ӝожомыкуз но, куно пумитакуз-келякуз но кырӟа. Кырӟан котьку огазея. Асьмеос одӥг мылкыдын кырӟаськомы ке, огкадь шокчиськомы кадь. «Удмурт Кенешлэсь» 25 арзэ пусъёно бере, калык асьмеды огазеясь мылкыдэз мед шӧдоз, шуэ Татьяна Ишматова. Соин ик вань мылкыд карисьёсты ӧте ужрадэ пыриськыны.

— Азьвыл Кызпу арамаын Ижысь котькуд ёросысь ёзэтмы нимаз азбарлы люкиськылӥз, котькудӥз ачиз сямен адямиосты гочатыны выриз. Туэ, ёросъёслы люкиськытэк, одӥг азбар лэсьтыны кенешимы, — азьланьтэ Татьяна Витальевна. — Асьмеос ваньмы — «Удмурт Кенеш». Ваньмы одӥг семья кадь, гурт праздникъёсын сямен, одӥг бадӟым ӝӧк дорын шулдыръяськыны кулэ. Азбарын ик луозы эктонъёс, шудонъёс. Котькуд ёрос «кенешлы» вашкала конкурсъёсты но шудонъёсты тодазы вайыны, соосты ортчытыны косэмын. Озьы пиналъёс капкаетӥ потаса шудонэн тодматскыны, небыльтокен шудыны быгатозы. Со сяна, нылпиослы сэрег радъялоз К. Герд нимо гимназия. Котькудӥз татчы лыктӥсь ассэ праздникын кадь мед шӧдоз. Учкыса гинэ палэнысен медаз сылы — котькытчы пыриськыны мед быгатоз. Котькудӥз капчи мылкыдын лыктӥз ке, ӝук но ческытгес кошкоз.

Валтӥсь сцена вылысен чузъяськоз концерт. Отын ик возьматэмын луоз «Удмурт Кенешлэн» 25 ар ӵоже историез. Ӧтемын луозы огазеяськонлэн ваньмыз азьвыл кивалтӥсьёсыз.

Елена Сараматова

0+

Удмурт Дунне
By Удмурт Дунне 7 июня, 2016 16:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<