Иж тыметын усьтӥськиз пыласькон вакыт , гужем ужалозы нылпи лагерьёс, Каргуртэ пуктӥзы выль часовня

Удмурт Дунне
By Удмурт Дунне 8 июня, 2016 13:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Яр

Окопысь — киное

Ярысь нылпи библиотекаын «Окопысь — киное» ужрад ортчиз.

Одӥг ӧре огазеямын вал Быдӟым Вормонлы 71 ар тырмонлы но Кинолэн арезлы сӥзем ужрадъёс. Люкаськемъёс пыр-поч тодӥзы Совето Союзысь тодмо актёръёс Ю. Никулин,

А. Папанов, Г. Юматов, А. Смирнов но мукетъёсыз сярысь. Библиотекаын ужасьёслэсь веранзэс узырмытӥзы та актёръёслэн военной туспуктэмъёссы, кинофильмъёсысь люкетъёс. Нылпиос куд-ог лыдпусъёслы паймизы. Кылсярысь, Юрий Никулин кык ож пыр потэмын, 7 ар ожмаськемын. Анатолий Папанов пусъемын Отечественной войналэн I но II степенё орденъёсыныз. Леонид Гайдай режиссёр ожмаськыны мынэмын ас мылкыд каремезъя 18 аресаз, нош Элина Быстрицкая актриса луэм «сын полка» («дочь полка» уг шуо вылэм).

Балезино

Правооссэс тодо

Нылпиос эскеризы, кин ӟечгес политикаез вала, правооссэ тодэ.

Бадӟым классъёсын дышетскись пиналъёс пӧлын пӧртэм предметъёсъя олимпиадаос ортчыло. Тужгес тунсыкоез — быръёнэн герӟаськемез. «Мон — бырйись» вожвылъяськонэ пыриськисьёсты дунъясьёс пӧлын одно ик луо кивалтон удысын ужасьёс, депутатъёс. Пиналъёс та олимпиадаын 50 юанлы валэктон сётыны кулэ, ваньмыз герӟаськемын адямилэсь правооссэ но эрикъёссэ тодонэн. Та вожвылъяськонэ туэ 34 школаысь пиналъёс пыриськизы, котькинлэсь трос шонер валэктон сётӥз Балезиноысь 2 номеро шор ёзо школаын дышетскись Дмитрий Микрюков.

 Дэбес

Эшъяськон эстафета

Туннэ, 3-тӥ июне, шаерамы вуэ «Бег мира» эстафеталэн факелэз.

Сое пумитаны шуд усиз Дэбес ёросысь пинал спортсменъёслы. Дуннеысь бадӟым ужрадлы кутскон сётэмын туэ 6-тӥ январе. Пӧртэм калыкъёсты огазеясь ӵошатскон 100-лэсь ятыр странаостӥ ортче, сюреслэн кузьдалаез 70 сюрс иськемлэсь ятыр. Таӵе ужрад Россиын 25-тӥ арзэ радъяське. Факел нуонэз 1-тӥ июньысен мытӥзы Пермь городын, нош 3-тӥ июне сое Удмуртие вайизы. Шаерысьтымы спортсменъёс 3-тӥ-9-тӥ июне факелэн ортчозы 490 иськемез. Эстафетаез мытозы Дэбес ёросысь Чупчидур  гурт вадьсын 14 часын. Бӧрысь сое Кез каргуртэ нуозы, отӥяз со ортчоз Балезино, Глазов, Красногорск, Эгра, Якшур-Бӧдья, Ижевск, Пичи Пурга, Можга но Алнаш пыр.

 Эгра

Выль пус

Каргуртэ пырон доры Муромысь дун-чылкыт Пётрлы но Феврониялы часовня пуктӥзы.

Ёросысь ужбергатӥсьёс но Казакъёслэн огазеяськонзы сюлмаськемен, Эгра каргуртлэн выль пусэз кылдӥз. Кылем арня шорын часовняез сӥё-дано усьтӥзы. Сое пуктӥзы загслэн юртэз но ошмес котыре: загсын выль семья кылдэ, ошмес улонлы кутскон сётэ, нош соосты выж герӟа. Часовняез усьтонэ 2 семья ӧтемын вал: Феоктистовъёс та нуналэ пусйизы 1 ар валче улэмзэс, нош Широбоковъёс — 50 ар ӵош улэмзэс.

Иж

Ярдур но тымет — дась

Иж тыметын пыласькон вакыт усьтӥськиз.

Ярдуре ог 40 тонна луо кисьтэмын. Дӥсь воштон сэрегъёсты, сьӧросъёсты, юон вуэн колонкаосты, зонтикъёсты  выльдонлы-буянлы кошкиз оглом 350 сюрс манет.

Ярдурез син азязы возё югдурез утисьёс. Отын сӥль пыжыны, курытсэ юыны но машинаен вулы матэ кариськыны лэземын ӧвӧл. Пыласькисьёсты чакласа возё спасательёс.

Тымет вулэсь ӟечлыксэ эскериз Роспотребнадзор. Ву пыласькыны ярамон.

Дэри

Кык арлы одӥг пол

Кылем арня пумын ёросысь Азин нимо эштосэ люкаськылӥзы шаерысьтымы пудо бызьылытӥсьёс.

Бадӟым вожвылъяськон радъяське кык арлы одӥг пол. Дэри ёросын 25-тӥез сыӵе ӵошатскон ортчиз. Отчы люкаськизы ас ёросъёсазы вормисе потэмъёс. 4 люкетлэсь радъям вожвылъяськонын азьпала потӥзы Вавож, Яр но Ува ёросъёсысь пудо бызьылытӥсьёс. Соосты Данъян грамотаен но коньдон премиен пусйизы, бадӟым ужрад йылпумъяськиз ческыт ӝук сиёнэн.

Пичи Пурга

Турнаны дасясько

Гырон-кизён ужъёс йылпумъяськизы гинэ, ёросысь комиссия пудо сиён дасян техникаез эскерон борды басьтӥськиз.

Та комиссия ужзэ мытӥз 31-тӥ мае. Нырысь ик вуылӥзы «Восход», «Новое», «Молния», «Первый май» огазеяськонъёсы. Ваньмаз техниказы бусые турнаны потыны дась. «Первый май» огазеяськонын огдыре турнаны потыны быгатоз 4 техника. «Молния»  понна шумпотоно, соос выль техника — пресс-подборщик, ПРФ-145, мажесъёс но 2 выль самосвал — басьтыны быгатӥзы. Но эскерем хозяйствоосын силос гуос сузямын ӧвӧл на.

Кизнер

Шудозы, шутэтскозы, ужалозы

Гужем вакытэ ёросысь ваньмаз 19 муниципал кылдытэтъёсын нылпи лагерьёс ужалозы.

1 сюрс 100 пиналъёс 21 нунал ӵоже дэмен шутэтскозы но мугорзэс кыдатозы. Со сяна, Кизнер ёросын радъяськозы на шаерысьтымы нылпиос понна Атыкай музъеммес утёнлы сӥзем «Воинский долг» но «Подвиг», спортэз гажасьёс понна «Олимпийские надежды» сменаос. 7-аз муниципал кылдытэтъёсын ужанъя но шутэтсконъя сменаос луозы на.

Дасяз Валентина Емельянова

Удмурт Дунне
By Удмурт Дунне 8 июня, 2016 13:25 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<