Гомало бакчаос, тэльёс…

Удмурт Дунне
By Удмурт Дунне 16 июня, 2016 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Тросэз тылпуос пото турын кенжем бордысь.

Тросэз тылпуос пото турын кенжем бордысь.

Тулыс куазь шуак пӧсь кариськемен, нюлэсъёсын но сад-бакчаосын тылпу поталляз. Соин валче 14-тӥ июнёзь шаерамы ялэмын тылпулэсь утиськонъя нимысьтыз режим.

Россиысь МЧС-лэн Удмурт Республикая Валтӥсь управлениезлэн кивалтӥсез Пётр Фомин верамъя, таӵе режимез юнматэ шаерысьтымы Нюлэс хозяйствоя министерство. Матысь дыре куазь выльысь пӧсь кариськиз ке, тылпулэсь утиськонъя режим азьланьтэмын луоз.

— Сыӵе дыръя шаерысьтымы вань муниципал кылдытэтъёсын уй дежурствоос радъямын луыны кулэ, — шуэ Пётр Фомин. — Нюлэскын тылскем дорын ӵынатэм сӥль яке пыжем картош сиён сярысь вунэтоно. Кема витем зоръёс музъемез коттӥзы ке но, куд-ог интыосын куаро писпуослэн выжыоссы озьы ик кӧс кылемын. Азьланяз куазь нош ик пӧсь кариськыны медэ.

Туэ ар куспын нюлэсъёсын 15 пол тылпу потаз. Горд атас 6 пол чортӥз Вотка ёросын, 2 пол — Пичи Пурга ёросын, озьы ик Сюмси, Сьӧлта, Глазов, Эгра, Сарапул, Якшур-Бӧдья но Камбарка ёросъёсысь спасательёс сике потано луизы. Тылпу потон учыръёс ваньмыз дыраз синйылтэмын. Тылскем бервылзэс ӵем дыръя кысытэк кельто чорыганы яратӥсьёс.

Тылскыны лэземын ӧвӧл сад-бакчаосын но. Туэысен пыӵаны кутскиз таџе закон: тылскыны луэ юртъерлэсь 5 метр палэнын, котыраз кирпичъёс я кортъёс тыроно.

— Май толэзь ӵоже спасательёс калык пӧлын валэктон уж нуизы, — шуэ управлениысь тылпуэз алонъя валтћсь инспектор Павел Чукавин. — Та вие шаерамы 430 пала сад-бакчаос лыдъясько. Милям ужасьёсмы котькудаз юртэ вуылыны тыршизы но тылпулэсь утиськон амалъёсъя памяткаос люкылӥзы.

Котькуд ньылетӥез тылпу потэмын электроезъёс бордысь. Адямиос бакчаосазы нуо туала техникаез. Огдыре ужато телевизорез, чайникез, утюгез. Урод сямъёсын эшъяськисьёс но асьсэлэсь ваньбурзэс но уг гажало, бускельёссэс но шуге-леке вутто.

Сад-бакчаос — кузьыли муӵ выллем: пичи музъем кесэгын уно коркаос. Юртъёс ог-огзылы туж матэ пуктылэмын, ульчаос сюбегесь, куд-огаз ву басьтон интыос но ӧвӧл.

— Адямиослэсь верамзэс кылоно, тылпу кысӥсьёс, пе, машинаязы вутэк вуо, — шуэ Пётр Фомин. — Шонер ӧвӧл та веран, соос адӟыса уг вутто ву пазянэз. Лыдъялэ ай асьтэос, автоцистернаын шорлыдын 2 но ӝыны кубометр ву. 1 секунд куспын гумыетӥ 40 литр ву пазьгиське. Озьыен, быдэс машинаысь ву ог 2 минутлы сяна уг тырмы, отӥяз ву  утчан сярысь сюлмаськоно луэ.

Спасательёслы сюлмаськонъёс кылдыто ӵыпетъёс но. Муниципал кылдытэтъёслэн кивалтӥсьёссы тылпу кысӥсьёслы ву басьтон интыос дасяны кулэ. Куд-ог кузёос малпало, лэся, шурез ӵыпыса, вань йыр висёнзы быроз шуыса. Сыӵеос мур янгышало. Кызьы ивортӥз шаерысьтымы валтӥсь спасатель Пётр Фомин, со ӵыпетъёсын тылпу кысӥсьёслы нимысьтыз ву басьтон интыос лэсьтоно.

Ӝоген емышан, губиян вакыт вуоз. Калык тэле кыстӥськоз. Таӵе дыръя туж кышкыт луэ кысымтэ тамак пум. Озьы нырысь ик кенже сюрес вӧзысь кӧс турын, отӥяз горд атас тэль вылэ но омырскыны быгатэ.

Валентина Емельянова

Туспуктӥз Александр Горбунов

Удмурт Дунне
By Удмурт Дунне 16 июня, 2016 15:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<