ЕГЭ уг куртчылӥськы!

Удмурт Дунне
By Удмурт Дунне Июнь 7, 2016 09:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нылпиос, дышетӥсьёс, мумы-бубыос солы дышо ни 2002-тӥ арысен

 Школаез йылпумъясь егитъёслэн кысык вакытсы сярысь вераз дышетонъя но наукая министр Алексей Мирошниченко.

Экзаменъёслэсь ортчемзэс адӟыны луэ меӵак эфирын.

Экзаменъёслэсь ортчемзэс адӟыны луэ меӵак эфирын.

Минутъёс луо пӧртэмесь

27-тӥ мае нылпиос понна ортчизы нырысетӥосыз экзаменъёс — ӟуч литературая но географияя. Элькунысьтымы 1 сюрс 59 пиналъёс та предметъёсты бырйизы.

Элькунысьтымы Информатизацияя но тодон-валан сётонлэсь ӟечлыксэ эскеронъя центре та нуналэ люказы журналистъёсты. Вуизы дышетонъя но наукая министр Алексей Мирошниченко но министерствоысь огъя тодон-валан сётонъя ёзэн кивалтӥсь Лариса Пластинина.

— Туннэ 8 часын ӵукна ик Ижысь одӥгаз школае вуылӥ ни, отын ЕГЭ ортчытыны ваньмыз дась, — веранзэ мытӥз министр. — Экзамен сётонъя мукет пунктъёсын но валамтэос кылдыны кулэ ӧвӧл. Соос вазен ик дасесь вал ни: пуктылэмын видеокамераос, кортэз шӧдӥсь арбериос — металлоискательёс. Ваньмыз-ӧвӧлэз 53 сыӵе инты дасямын.

Собере ватсаз:

— Туннэ асьмеос видеосвязь пыр адӟыны быгатом, кызьы радъяське экзамен. Котькуд классын быдэн 2 видеокамера пуктэмын — одӥг мурт но со улэ шедьытэк уг кыльы. Котькуд классын быдэн 2 мурт юрттӥськисьёс, КИМ-ёсты (контрольно-измерительной материал) люкылӥсьёс, нылпиос пуксё огзы бӧрсьы мукетсы, — классын соос 15-лэсь трос луыны кулэ ӧвӧл...

…Тани усьтӥське экран, адӟиське, кызьы Алнаш ёросысь выпускникъёс пыро Алнаш школаысь классэ, пуксьыло интыосазы, эскеро документъёссэс… Тани соослы люкыло бадӟым конвертъёс — отын КИМ-ёс. Пиналъёс усьто…

— Ой, мон ик сюлмаськисько! — мылкыдзэ уг ваты министр. — Та минут соослэн улоназы бадӟым инты басьтоз…

Видеосвязь уз кысылы, экзаменъёс йылпумъяськытозь. Отчы, Рособрнадзорысь специалистъёс сяна, пырыны быгато соос, кин вазен ик талы куриськон гожтӥз. Таӵеос пӧлын вань общественной огазеяськонъёсысь адямиос но, кылсярысь, Россиысь егитъёслэн огазеяськонзылэн ёзчиосыз.

— Туж умой, ЕГЭ сётон вакыт гожтӥськыса кыле шуыса, — пусъе министр. — Угось луыны быгато валантэм учыръёс. Юан кылдэ ке, архивез усьтыны но солы валэктон шедьтыны луэ.

Специалистъёс верамъя, туэ ЕГЭ чылкак висъяське ни, шуом, 2014-тӥ арын ортчем экзаменъёслэсь. Табере КИМ-ёс Интернетэ уг сюро, часовой поясъёсын герӟаськем валамтэос уг кылдо, экзамен сётон пунктъёсы телефонэн пырыны уг луы… Ваньмыз лэсьтӥське, экзаменъёс зэмлыко мед ортчозы шуыса.

— Малпасько, матысь кык-куинь ар куспын ЕГЭ ортчытон радлыкын воштӥськонъёс уз луэ ни, — шуиз А. Мирошниченко. — Угось али туж трос лэсьтэмын ни, экзаменъёс зэмлыко мед луозы шуыса.

Зэм, сое радъянын капчиятонъёс луозы ик, вылды. Туэ, кылсярысь, Юкаменск, Яр но Камбарка ёросъёсын КИМ-ёсты печатьысь потто экзамен сётон пунктъёсысен ик. Соос дуре Иже ветлоно ӧвӧл. Матысь аръёсы та амал кутӥськыны кутскоз экзамен сётонъя вань пунктъёсын. Ижысь 56 номеро гимназиын туэысен кутӥське сканер — выпускникъёслэсь ужъёссэс эскерисьёс доры со пыр гинэ келяло.

Кинлы мар

Лариса Пластинина верамъя, туэ дышетсконзэ 6 сюрс 341 ныл но пи йылпумъя. ЕГЭ гожтэ 6 сюрс 487 мурт — таос пӧлы пыремын школаез азьло аръёсы быдтэмъёс но.

Котьку сямен ик одно сётоно кык экзамен — ӟуч кылъя но математикая. Таяз арня вискын соос ортчизы. Озьыен, выпускникъёс пӧлысь 8 процентэз понна каникулъёс вуизы ни. Ӵапак тамындаез ватсаса экзаменъёс сётыны мылкыд ӧз каре. Соос дышетсконзэс вузъёсын азинтыны уг малпало. Нош шор ёзо тодон-валан басьтэм сярысь аттестат басьтон понна ӟуч кылын 27 балл люкаса, математикаен «3» басьтыса (таяз баллъёсъя уг дунъяло) тырмыт.

Но 92 процентэз выпускникъёс дышетсконзэс университетъёсын-академиосын азинтыны чаклало! Таосызлэн экзаменъёссы луозы на. Кылсярысь, 6-тӥ июньлы тупатэмын математикалэн профиль люкетэз, чакламын со та предметэз вузын дышетыны чакласьёслы. Выпускникъёс пӧлысь 4 сюрс 900-эз сое бырйизы.

Котьку сямен ик, тужгес тросэз нылъёс-пиос бырйизы обществознаниез — 3 сюрс 568 мурт. 2-тӥ интыын — физика, 2 сюрс 250 мурт соя ЕГЭ гожтоз, 3-тӥын — биология, та предметъя 1 сюрс 560 выпускник йырвизьзэ сыналоз. Отӥяз мыно история, химия, литература но мукет предметъёс.

— Жаляса верано, географиез 298 выпускник гинэ бырйиз, — пусйиз министр. — Малы озьы луэ — малпаськоно. Вазен литератураез бырйисьёс но туж ӧжыт луо вал, но берло кык арзэ, сочинение гожъяны кутскем бере, та предметлэсь кышкасьёс кулэсмизы — туэ сое 761 мурт бырйиз.

Жаль ке но…

Элькунамы ЕГЭ пыӵаны кутскиз 2002-тӥ арысен. Та дыр куспын нылпиос но, анай-атайёс но пумен дышо ини солы.

— Дышиськом! — шуэ дышетонъя но наукая министр. — Нылпиос ӧжытгес куалекто ни. Анай-атайёс уг буйгало на.

Зэмзэ но, туэ ачим экзаменъёс пыр потӥсько кадь. Нылы 11-тӥ классэз йылпумъя. Ӟуч кылъя но математикая сяна, ас мылкыдызъя эшшо 3 предметэз бырйиз. Сюлмаськисько: ассэ чик уг жаля. Шораз лушкемен учкылӥсько: туж-а меда та куалектэмын? Уйин часозь-кыкозь пукемзэ адӟыса, буйгатыны вырисько: астэ ӧжыт коть жаля. Пумитам лекъяське: озьы вераськыны уг яра, анай, тыршыны кулэ!

Психологъёслэсь анай-атайёслы ӵектонзэс лыдӟи. Зэмзэ но, пиналлы озьы вераны уг яра вылэм — юскиськыны, ганяк кариськыны быгатоз.

Элина Кумачёва

Удмурт Дунне
By Удмурт Дунне Июнь 7, 2016 09:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<