Удмурт кылъя дышетӥсьёс тырмозы 10 арлы

Удмурт Дунне
By Удмурт Дунне Июнь 10, 2016 12:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
учителя

Туннэ дышетӥсьёслы ёрмон ӧвӧл ке но, берло дыре анай кылъёсты азинтонлы дышетонъя но наукая министерство бадӟым саклык висъя.

Дышетонъя но наукая министерство ивортэмъя, шаерысьтымы школаосын анай кылъя 357 дышетӥсь ужа. Таослэн шоро-куспо арлыдзы ог 48 арес.

 

Туала вакытэ арлы быдэ уногес но уногес луо удмурт кылэз дышетӥсь школаос. Берло 3 ар ӵоже та лыдпус 15 процентлы йылӥз. Но со дыре ик вузэз йылпумъяса гуртэ дышетыны мынӥсьёс воксё чиньыен лыдъямон. Туэ но Удмурт кун университетлэсь дипломзэ басьтэмъёс пӧлын удмурт кыллы дышетыны мыныны малпасьёс ӧвӧлгес. Дасо ар ортчыса, воксё но дышетӥсьёстэк кыльыны быгатом.

— Туала студентъёс котыр ласянь аспӧртэмлыкоесь, ваньзы сямен творчествоен выро, — шуэ УдГУ-ысь Удмурт филологияя, финно-угроведениея но журналистикая институтэн кивалтӥсь Наталья Кондратьева. — Кылсярысь, Алина Антонова но Олеся Полатова кырӟало, сцена вылысь уг кошкыло, олокыӵе но ужрадъёсы пырисько. Куд-огез Казаньысь я Москваысь вузъёсын тодон-валан басьтонзэс азинтозы. Тросэз дасясько нылпи садын ужаны. Воспитатель луыны мед быгатозы шуыса, нимысьтыз дышетон но радъямы.

Туннэ удмурт кылъя дышетӥсьлы ёрмо Сьӧлта ёросысь Югдон но Дэбес ёросысь Сюрногурт школаосын. Но татчы асьсэ палась потэм нылъёс-пиос берытскыны уг медо. Кылсярысь, али бакалавриатэз йылпумъясь Ирина Перевозчикова Дэбес ёросысь Уйвай гуртысь потэмын. Но уже интыяськыны малпа Ижысь нылпи садэ.

— Магистратураын тодон-валанме азьланьтыны медӥсько бере, Иже кыльытэк уг луы, — вера Ирина Перевозчикова. — Городын луонлыкъёс бадӟымесьгес. Собере, мон туж яратӥсько пичиосты, соосын ужаны каньыл. Соин но, школае сярысь, садэ сюлэм золгес кыстӥське. Группаысьтымы мукет нылъёс но садэ куриськыны чаклало, одӥг-огез ужа ни. Тросэз уго, семья кылдытыса, нылпи вайыса вуттӥзы. Пиналзэс интыян вылысь ик воспитателе курисько. Но дыр вуиз ке, школае но мынӥсез сюроз ай. Школа буш уз кыльы.

Туннэ удмурт кылъя дышетӥсьлы ёрмо Сьӧлта ёросысь Югдон но Дэбес ёросысь Сюрногурт школаосын.

Туннэ удмурт кылъя дышетӥсьлы ёрмо Сьӧлта ёросысь Югдон но Дэбес ёросысь Сюрногурт школаосын.

Мылкыд карисьёс ӧвӧл шуыса, Глазовысь пединститут ас вакытаз нимысьтыз удмурт группа ӧз бичалля. Берло 7 арзэ татысь пото удмурт но англи кылъёсъя дышетӥсьёс. Но конкурс бадӟым ӧвӧл — 1 интые 2 мурт куриське. Али группаын 12 мурт дышетске. Котьма ке но дышетонъя но наукая министрлэн воштӥсез Виктор Чучков верамъя, техникумъёсын но колледжъёсын косэмын начальной классъёслы дышетӥсьёсты дасяны. Туннэ покчи классъёслы дышетӥсьёсты но нылпи садъёслы воспитательёсты дася Можга педколледж гинэ. Зэм, мукет училищеосын но группа усьтон понна отчы лыктӥсь кулэ, нош сыӵеос ӧвӧл. Я ӧтисез ӧвӧл. Нимысьтыз учебникъёс но воксё ӧвӧл, тужгес но удмурт кылэз дышетонъя методикая. Уже кутоно луэ шор ёзо школаослы я вузъёслы дасям учебникъёсты, соосты тупатоно, аслыд разработкаос дасяно. Можга педколледжысь удмурт кылъя дышетӥсез, покчи классъёслы удмурт кылъя учебникъёслэсь авторзэс Татьяна Ивановаез ассэ учебник я пособие дасяны косӥзы. Соин но училищеосын таӵе секыт уж борды кутскисез уг сюры, дышетӥсьёс но уг тырмо. Соин но вуоно дышетӥсьёсты дасясь ӧвӧл. Кылсярысь, Дэбесысь политехникумын ог 3 арзэ ни удмурт кылэз уг дышето.

— Матысь дыре огез дышетӥсьмы декрет отпускысь потыны кулэ. Соку выльысь удмурт кылэз пиналъёслы дышетыны кутскомы. Со сяна, покчи классъёс понна дышетӥсьёсты дасяны малпаськомы. Сӥзьыл Можга педколледже дышетскыны ветломы. Ёросамы удмуртъёс трос уло. Школаосысь дышетӥсьёс пенсие потон арлыдазы вуо, соосты воштӥсьёс кулэ, — вера Дэбес политехникумлэн кивалтӥсез Алексей Щепин.

Туннэ дышетӥсьёслы ёрмон ӧвӧл ке но, берло дыре анай кылъёсты азинтонлы дышетонъя но наукая министерство бадӟым саклык висъя.

— Министр Алексей Мирошниченко валаса учке анай кылэз дышетон шоры. Соин ик матысь дыре усьтыны чакламын Глазовын но Можгалан удмурт школаос, — шуиз Виктор Чучков.

Удмурт школаос усьтӥськизы ке, соку, оло, егитъёс но ёрос центре, гуртэ бертозы.

Елена Сараматова

Удмурт Дунне
By Удмурт Дунне Июнь 10, 2016 12:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<