Дэбес ёросысь котёгуртъёс школа 10 арлэсь кема витё ни

Удмурт Дунне
By Удмурт Дунне Июнь 14, 2016 12:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Мед сылысал бадӟым юрт…

Дэбес ёросысь Котёгурт муниципал кылдытэтэн кивалтӥсьлэн Пётр Максимовлэн вань льӧль малпанэз: гуртазы одӥг бадӟым юрт мед пуктозы вылэм. Отчы клубез, библиотекаез, фельдшер-акушер пунктэз, почтаез но мукетсэ мед интыясалзы. Сюресъёсты волятысалзы ке — эшшо умойгес луысал.

котёгурт 1

 Специалистъёстэк кылён

Огвакытэ тросаз гуртъёсын, оптимизация ортчытыса, социальной юртъёсты одӥг липет улэ карылӥзы. Котёгуртозь со малы ке вуымтэ. Элькунысьтымы вылӥ кивалтӥсьёс, 2004-тӥ арысен кутскыса, отчы кӧня ке пол кожылӥллям ке но. Школазы пу юртын интыяськемын — сое выльдон сярысь вераськонъёс мынӥзы.

— Но милям, школамы сяна, библиотекамы но, клубмы но, почтамы но, гурт администрацимы но пу юртын интыяськемын, — вера Пётр Максимов. — Нылпи садмы но фельдшер пунктмы гинэ кирпичлэсь — таосты ас вакытаз ӝутӥз ай колхоз. Зэм, соос но табере туала куронъёслы уг тупало ни.

Но та юртъёссэс куке-соку выльдозы шуыса, котёос уйвӧтазы но адӟыны уг дӥсьто. Школа гинэ но дасо арлэсь кема витё ни бере.

Бен оптимизация ассэ возьматъям ик та гуртын но. Соин сэрен, кылсярысь, егитъёс ӝытъёсы кытчы мыныны уг тодо: клуб уг ужа.

— Азьло клубын 3 мурт ужаз: заведующий сяна, вал на худрук но утялтӥськись,  — югдурез валэктэ гурт администрацилэн кивалтӥсез. — Но художественной руководительлэсь ставказэ быдтӥзы. Кивалтӥсьлы, валамон, огназ секыт луиз. Документъёсын вырон сяна, ужрадъёс но ортчытъяно на. Нош туала вакытэ калыкен ужаны уката секыт. Соин ик али отын  специалист ӧвӧл.

Ӧвӧл гуртын почтальон но. Угось почтаын но 1 ставка гинэ кельтэмын. Нош уждунэз пичи. Эшшо ке толалтэ почталэсь юртсэ пуэн эстоно луэ. Егит нылаш та уже кутскылэм ик вылэм, моӵез тырмымтэ.

Ярано, удалтӥз, пе, фельдшерен. Артэ Сюрногуртысь егит специалист доразы лыктыны соглаш кариськиз. ФАП-е ик улыны но интыяськиз — таяз чагыр эстӥськон пыртэмын. Котёгуртъёс шуо: мед гинэ, пе, та фельдшер гуртазы выжыяськоз вал. Таин ӵош валало: ужез туж секыт.

— Азьло ФАП-ын но 2 специалист ужаз, кельтӥзы 1-зэ, — азинтэ веранзэ Пётр Вильевич. — Табере фельдшермы висисьёс доры кошке ке, интыяз кылись ӧвӧл ни. Соин куддыр валаны но уг луы, ФАП-ын эмъясь вань-а, ӧвӧл-а. Нош котёоосты сяна, фельдшермы учке на косолюкъёсты но — отчыозь ог 3 иськем луэ.

котёгурт

Мылкыд тупа ке, уж пӧзе

Котёгуртын 100 пала корка, 330 пала адямилэн пропискаез. Но  егитъёс пӧлысь данакез татын уло шуыса лыдъяське гинэ — Ижысь, Глазовысь шутэтскон нуналъёслы вуыло.

— Егитъёс ведь туалаесь ни, — азинтэ веранзэ гурт администрацилэн йырыз. — Соослэн одӥг-ог кафеын но пукемзы, асфальт сюрес вылтӥ ветлэмзы потэ.  Нош милям сюресмы векчи излэсь гинэ кисьтэмын. Соин ик егитъёс город шоры учкыло, гурт кыле  специалистъёстэк.

Но Пётр Максимов оске: школа, сюрес луысал, клуб ужасал ке, Котёгуртын югдур тупатскысал. Угось вань соослэн маин ушъяськыны. Кылсярысь, гуртэ чагыр эстӥськон пыртэмын — «Труженик» колхоз ас вакытаз бадӟым уж лэсьтӥз. Али но со гуртоослы бадӟым оскон пыӵатэ, ужан интыос ӵектэ. Алигес 200 йырлы ферма пуктӥз — талы но, пе, туж шумпотоно ни. Табере тросэзлэн ӟезьы азяз машина сылэ. Соин ик  Дэбесэ я эшшо кытчы ке мыноно ке, гуртоос асьсэ машинаенгес пото. Рейсовой автобус гуртэ уг ветлы. Ог кык-куинь ар талэсь азьло ёрос центрысь сое лэзьяны кутскылӥзы ик вал. Но мынӥсь-ветлӥсез ӧвӧлысь дугдӥзы.

Гуртын Интернет вань — ог  30 корка сое пыртӥзы ни. Телефон интыен-интыен уг куты ке но, ӧвӧл шуыны уг яра. Калыклы ӟеч карон вылысь ик гурт администрациын куд-ог нотариальной услугаосты но сётыны кутскиллям. Кылсярысь, куд-ог пенсионеръёс пенсизэс басьтыны оско ӵыжы-выжыоссылы. Та понна гожтоно луэ доверенность, сое юнматоно нотариус дорын. Табере Котёгуртысь песянай-песятайёс со понна юромо Дэбесэ ветлоно уг луо ни: гурт  администрациын гинэ сыӵе документ лэсьтыны быгато.

— Зэм, госпошлинаез тырон понна Дэбесэ потоно луэ,  — пусъе Пётр Максимов. — Та умойтэм. Огвакытэ вераськонъёс вал, госпошлинаез почта пыр но тырыны мед луоз шуыса. Нош ик та ужпум чалмиз: озьы ук пӧрмы-а, мар-а.

Эшшо Котёгурт администрация азе юнматэмын нимысьтыз ящик. Отчы котькуд адями ас мылкыдзэ-ӵектонзэ гожтыса кельтыны быгатэ. Нимтулзэ шараямез уг поты ке — уг куро. Озьы гурт администрация калыкен огмылкыдысь, солэсь куронъёссэ лыдэ басьтыса, улыны тырше. Нош та нуналъёсы дэмен пусъёзы гуртсы кылдэм дырысен 200 ар тырмонэз. Куноос ӧтемын ни. Дасяськон мынэ. Таӵе ужрадъёсты гурт администрация ас вылаз гинэ уг басьты, умой юрттӥське «Труженик» хозяйство но.

Элина Кумачёва

Удмурт Дунне
By Удмурт Дунне Июнь 14, 2016 12:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<