6 нунал интые — 24 час. Кыӵе дыр куспын адями эмъюрттэт басьтыны кулэ

Удмурт Дунне
By Удмурт Дунне 28 июня, 2016 16:11

Эмъянлэн ӟечлыкез арысь аре йылэ — та понна элькунамы ӧжыт уг лэсьтӥськы, шуиз тазалыкез утёнъя министр Алексей Чуршин.

Ижысь медакадемиез йылпумъяса, Н. Михайлова ужа Пичи Пурга черкогуртын пинь йќнатћсь луыса. «Гуртысь эмчи» программая 2012-тӥ арын миллион басьтӥз.

Ижысь медакадемиез йылпумъяса, Н. Михайлова ужа Пичи Пурга черкогуртын пинь йќнатћсь луыса. «Гуртысь эмчи» программая 2012-тӥ арын миллион басьтӥз.

 «Гуртысь фельдшер»

Эмъян удысын тырмымтэос сярысь вераськонъёс туннэ ӧжыт ӧвӧл. Но министр пресс-конференцилэн нырысетӥ минутысеныз ик оскытыны кутскиз: со юнме вераськонъёс, калыкез йӧнатон понна трос лэсьтӥське! Вераз куд-ог лыдпусъёсты:

— 2016-тӥ арын шаерысьтымы та удыслы пӧртэм бюджетъёсысь 21,9 миллиард манет чакламын, кылем арынэн ӵошатыса, со 1 но ӝыны миллиард манетлы ятыргес. Котькуд адямиез йӧнатонлы шорлыдын араз 14 сюрс 470 манет учкемын, таиз, кылем арен ӵошатыса, 7,2 процентлы тросгес.

Ар пумозь гуртъёсын 25 фельдшер-акушер пунктъёс усьтыны чакламын. Кытысь отчы специалистъёс шедьтоно? Оскон вань «Гуртысь эмчи» программалы, солы луыса 393 врач гуртэ ужаны кошкиз ни. Нош 2017-тӥ арысен улонэ пыӵаны кутскоз эшшо мукетыз программа — «Гуртысь фельдшер»: табере быдэн 500 сюрс манетэн висъяськоз на  гуртын ужаны дась луись фельдшеръёслы, эмъясь сузэръёслы.

— Нялтас вераса, эмъясьёслэн лыдзыя асьме элькун ушъяськыны быгатэ, — пусйиз Алексей Чуршин. — Котькуд 10 сюрс муртлы 43,3 эмъясь усе. Россиын та лыдпус 41 котыр. Бен, ёрмиськом на терапевтъёслы, педиатръёслы, сюбег специалистъёс пӧлысь уг тырмо анестезиологъёс, хирургъёс но мукетъёсыз.

Югдурез тупатон вылысь Ижысь медициная кун академиын но, элькунысьтымы медициная колледжъёсын туэ уката йылэтэмын луозы целевой наборъёс. Озьы направлениея дышетскем егитъёс кӧня ке арзэ одно ужано луозы эмъян удысын. Та сяна, Ижысь медициная кун академиысь 60 процентэз выпускникъёс лыкто элькунысьтымы эмъян удысэ. Кылемъёсыз пӧлысь но данакез быръё эмъян удысэз ик, но соос кошко мукет улосъёсы — доразы.

 Черодъёсын нюръяськон

Министр верамъя, эмъясьёслэн кабинетъёссы азьын черодъёс вакчиесьгес кыльыны кулэ. Уката но — пӧртэм эскеронъёс ортчытоно ке. Талы кулэ луись тӥрлык басьтонлы нимысьтыз саклык висъяське. Туэ гинэ 94 пумо оборудование вуттэмын ни, соос пӧлын вань дуноосыз но, кылсярысь, Можгалась выль усьтӥськем Сюлэм но сэр висёнъёсъя центре 36 миллион манетэн МРТ пуктэмын.

— МРТ кабинет озьы ик ужаны кутскиз Ижысь 6 номеро город больницаын, — пусйиз А. Чуршин. — Матысь дыре соосты усьтыны чакламын Ижысь  2, 7, 9 номеро больницаосы. Озьыен, та исследованиез ортчытонлы черодъёс сылмыны кулэ.

Ваньмаз сямен эмъян учреждениосын ӝог юрттэт сётонъя кабинетъёс вань — отысь специалистъёс адямиез соку ик учкыны кулэ. Нош вань на учыръёс, куке врач висисез учкыны кулэ быгатэмезъя (планъя). Талы кылем арын 6 нунал сётӥське вал, туэысен 24 час кельтэмын.

— Чаклам дыре юрттэт уг сётӥськы ке, вазиськелэ эмъян организацилэн администрацияз, — валэктӥз Алексей Дмитриевич. — Со сяна, чагиськыны луоз министерствое, Росздравнадзоре…

Министр соглаш кариське, эмъян удысын тырмымтэос ӵем пумиськыло шуыса. Но данакез соос нырысь ик герӟаськемын эмъян организациослэн ужзэс радъяны валамтэенызы, эмъясьёслэн куронъёсты быдэсъямтэенызы. Соин ик котькуд учыръя эскеронъёс ортчытоно. Министр ачиз соосты сэрттон-пертчон борды басьтӥськоз, пе. Кылсярысь, ӝожтӥськон вуиз, Шаркан ёрос больницаын УЗИ кабинетэ номерокъёс уг тырмо шуыса. Нош дунын ке — соку ик учкозы. А. Чуршин та нуналъёсы отчы потыны дасяське ни.

 Оптимизация азинтӥськоз

— Оптимизация азинтэмын луоз,  — меӵак вераз министр. — Бен, солы пумитъяськисьёс трос. Но вань та ужрадъёс нырысь ик кутӥсько эмъян удыслэсь ӟечлыксэ будэтон вылысь. Бен, ёросъёсысь 12 нылпи ваён юртъёсты пытсамы. Но усьтӥмы районъёс куспын ужась центръёс — таосаз эмъян тӥрлык но трослы йӧнгес, специалистъёс но кужмоесьгес. Мар со сётӥз — вераны луэ али ик: вордскись нуныос пӧлын кулон учыръёс соку ик синӥзы.

Та нуналъёсы гинэ огазеямын Глазов городысь но Глазов ёросысь больницаос. Министр оске: та вамышлэн но пайдаез одно шӧдӥськоз. Угось со больницаос озьы ик ужалозы, но кивалтӥсез одӥг луоз.

Оптимизация возьма на Ижысь куд-ог больницаосты.

Но больницаослэсь лыдзэс кулэстэм сяна, пуктӥсько выльёсыз но. Кылсярысь, оскон вань, 2019-тӥ ар пумозь йылаз-пумаз вуттэмын луоз Туберкулёзэз эмъянъя элькун больница. Та сярысь вераськон мынӥз Удмуртилэн Тӧроезлэн А. Соловьевлэн Россиысь тазалыкез утёнъя министрен О. Голодецен алигес ортчем пумиськоназ. Москва юрттыны дась луэмзэ вераз: кулэ луись 1 миллиард 100 миллион манет пӧлысь 80 процентсэ висъяны дась.

Йылаз-пумаз вуттыны кулэ Син висёнъёсъя элькун больницалэсь 4 этажъем итэтсэ но. Ужпум вазенгес ик пуктэмын  ни вал. Но элькун больницалэн азьвыл кивалтӥсез та уж борды йӧнала ӧз басьтӥськы. Соин ик та нуналъёсы со ужысьтыз мозмытэмын. Солэн интыяз пуксиз тазалыкез утёнъя азьвыл министр Владимир Музлов. Таиз азе нырысетӥ нуналысеныз ик курон пуктэмын: пристроез ӝутоно!

Элина Кумачёва

 

Удмурт Дунне
By Удмурт Дунне 28 июня, 2016 16:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<