Вера Пантелеева: Мон тодӥсько аслэсьтым интыме

Удмурт Дунне
By Удмурт Дунне 25 мая, 2016 14:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

 

пантелеева

Вера Григорьевна Пантелеева улонзэ сӥзиз литературоведенилы.

Вера Пантелеевалы — 50 арес

Вера Пантелеева — кылосбур наукаосъя кандидат, Дышетон удысысь йӧскалык ужпумъёсты тодон-эскеронъя институтлэн директорезлэн воштӥсез, Удмурт кун университетысь журналистикая кафедраысь доцент,  яркыт пиштэ наука, литература, дышетон удысъёсын. 14-тӥ куартолэзе Вера Григорьевна пусйиз котырес лыдпуссэ.

Литература котырын берганъёс

— Мон юбилей азьын аслым но эшъёсылы кузьым лэсьтыны малпай, — шуэ Вера Пантелеева. — Одӥг обложка улэ люкай улонысь учыръёсме, 20 аресысен кутскыса гожтэм кылбуръёсме, веросъёсме, пыртӥ Кузебай Герд сярысь кинофильмлы сценарийме но. Ӟуч но удмурт кылъёсын. Книгаме туж кема дасяй, мон понна со «Избранное» выллем, туж но туж «быръем» произведениосы. Со потӥз «Триптих» ним улын. Одӥг ласянь, та кылэз удмурт кылэ берыктыны уг луы, мукет ласянь, солэн пуштросэз удмуртлы но туж матын но валамон. 3 люкет — проза, поэзия, документальной ужъёс.

Литературной институтэз йылпумъяй бере, мон тодӥсько, кин со зэмос писатель. Мон кылбурчи но, веросчи но  ӧвӧл. Инмар со быдӟа талантсэ сётымтэ та удысын вылӥе ӝутскон понна — литературной произведение гожтыкум, мон уг вуиськы отчы, кытчы мынам вуэме потэ. Соин ик гожъямъёсы — со литература котырын берганъёс гинэ. Гожъяськон мон понна — со хобби, керттӥськон яке чильпаськон выллем. Гожъяськон — со луллэн поръямез, астэ валаны турттон.

Куд-ог веросъёсы «Кенеш» журналын кемаласьгес печатласькизы вал ни Вероника Дор псевдоним улсын. Вероника ним Вералы матын. Нош «дор» кыл туж вакчи но туж чебер, сюлэмме шунтӥсь. Ф. Васильевлэсь лириказэ эскерисько бере, солэн валтӥсь темаосыз пӧлын но одӥгез луэ дор тема. Малы мыным кушем ним? Антон Чехов шуиз: «Своё имя я отдал своей профессии, медицине, литература для меня всего лишь игра». Чеховлэн ог 40-50 кушем нимъёсыз вылӥллям. Мон Вера Пантелеева шуыса та вакытэ тодмо ни литературоведение удысын, школаын дышетскон книгаослэн авторзы луисько — та ӧръёсын мон умой уясько, тып-тып пыд йылам сылӥсько. Малпасько, мынам кылэз, кылбуретэз шӧдонэ вань. Мон тодӥсько аслэсьтым интыме. Литературоведение — со мынам сюресэ, ӵукнаысен ӝытозь гожъяськыса гинэ пукысал… Но улонын озьы уг луы,   уж дурын ӵемгес дышетонэн но методикаен герӟаськем ужпумъёсты сэрттоно-пертчоно луэ, дышетонэ кун стандартъёс пыӵамен, учебникъёслы куронъёс но ялан воштӥсько. Соин али потэм «Удмуртская поэзия и перевод: анализы, интерпретации, комментарии» монографиме но мон туж кема дасяй — со берло 10 ар  ӵоже эскеронъёсылэн емышсы луэ.

Дышетонэ вамыш

— Литературной институтэз йылпумъяме бере мыным дэмланы кутскизы аспирантурае кыльыны. 1991-тӥ ар, гудырикошкон. Консультацие мыныны кулэ. Метроысь потӥ но, Кремль пала танкъёс васько. Шӧдонэ мынам туж зол. Малпай, иське, аспирантурае али мыныны кулэ  ӧвӧл. Берен берытски, сумкаме бичай но гуртэ бертӥ. Ижын писательёс пӧлысь, Семён но Никвлад Самсоновъёсты сяна, нокинэ уг тодӥськы. «Инвожо» журналлэн редакцияз жингыртӥ. Редакторез Никвлад Самсонов шуэ: «Лыкты, лыкты, уже али ик кутом!» Лыктӥ. Редакция подвалын интыяськемын, кабинетъёсыз ӟоскытэсь. «Мон Москва бере та подвалын ужалом?» Ӧй мыны. Удмурт кун университетысь тодосчилы Александр Шкляевлы жингыртӥ, со дипломелы рецензия гожтӥз вал. «Лыкты университетэ ужаны», — шуэ. Нырысетӥ нуналъёсаз ик валай: ас ӧрам сюри. Та дырозь но мыным кельше студентъёсын ужаны, соос выль кужым сёто.

Студентъёсын ужан опытэ ик мыным юрттэ школаысь дышетӥсьёслы методической пособиос но гожъяны. Куке 10 ар талэсь азьло Дышетон удысын йӧскалык ужпумъёсты тодон-эскеронъя институтлэн кивалтӥсез Н. Ураськина ӧтиз монэ доразы ужаны, мон кӧня ке толэзь ӵоже малпаськи. Кышканэ герӟаськемын вал, школаын ужан опытэ  ӧвӧл шуыса. Надежда Ивановна юрттэмен ик, собере каньылля пыри институтлэн ужан ӧраз, туннэ нуналозь методика ласянь тодон-валанме будэтӥсько: трос лыдӟиськисько, дышетӥсьёсын кенешисько. Али йылпумъяй 8-тӥ классын удмурт литература урокъёсты нуонъя дышетӥсьёслы юрттэт книга. Куд-ог учыръёсы нылылэн арлыдыз но юрттэ — со 8-тӥ классын дышетске. Табере кутско 9-тӥ класс понна методической пособие гожтон борды.

Университетэ ужаны пыреме бере аспирантураын дышетсконо вал. Валамон, Москваын. Флор Васильев сярысь 40 бамъем рефератме кутыса, мынӥ Россиысь Наукаосъя академилэн Дунне литератураосты эскеронъя институтаз, кылосбур наукаосъя доктор Казбек Султанов доры.

Флор Васильевлэн кылбуретэныз нырысьсэ тодматски 1978-тӥ арын, писательлэн кулон араз. Мон дышетскисько вал 5-тӥ классын, удмурт кылъя элькун олимпиадаын вормись луи но, мыным кузьмазы Ф. Васильевлэсь «Куар усён толэзе» кылбур бичетсэ. Кылбуръёссэ учки но номырзэ ӧй вала. Мыным, 12 аресъем нылашлы, валантэм вал удмурт толэзь нимъёс, куд-ог удмурт кылъёс. Мон будэмын город котырын, Дэри ёросысь Тяма (Старое Мартьяново) гуртын. Мар та, оломар та шуыса, книгаез ӝажы вылэ интыяй. Книга кема тэк кыллиз. Флор Васильевез ми соку школаын но ӧм дышетылэ. Но кыӵе солэн поэтической нимыз — Флор! Со ик йырам но кылиз. Сямы сыӵе: мон та писателез уг тодӥськы, иське, тодоно-валано! 1999-тӥ арын Флор Васильевлэн творчествоезъя Москваын диссертациме ути.

Кужмо выжы

— Мон туж удмурт адями, арлыд будэмъя эшшо но золгес сое валасько. Нош аслам одӥг удмурт дэреме но  ӧвӧл! Кызьы шуиз Николай Гоголь, «русскость — это не русский сарафан». Мынам удмуртлыке оскон кадь, со  — пушкам. Нылме нырысетӥ классэ сётыкум, дышетӥсезлы верай: кытысь ке но кылӥ ке нылме вотянка яке удмуртка шуыса мыскыллямзэс, быдэс школадэс йырин-чукин берыкто. Дорамы нылылэн эшъёсыз лыкто ке, одно ик тодматӥськом, ми удмуртъёс шуыса. Удмуртлыкез вӧлмытонын но юнматонын мынам юрттӥсьёсы луо студентъёс но дышетӥсьёс.  Жаляса верано, ӝытъёсы ортчылӥсь удмурт ужрадъёсы шер вуылӥсько — дыры уг тырмы!

Валтӥсь интыын — семьяе. Кузпалыным Александр Ильичен ми бер пумиськимы, но туж вакытаз. Ми соин пӧртэмесь, но со дыре ик валтӥсь арбериос шоры — уж, ӵыжы-выжыос, нылпиос, удмуртлык — одӥг кадь учкиськомы. Кусыпъёсмы гажан, ог-огмылы оскон вылэ пыкъясько. Ми кызь арлэсь ятыр ни ӵош, но одӥг пол сяна керетэммы  ӧвӧл — обой лякылыкумы. Ми яратӥськом бакчаын ӵош ужаны, губияны-узыяны, куасэн нискыланы, шулдыр нуналэ огшоры кыре, инкуазе машинаен поталляны. Кузпалы — чорыгась, кырӟась адями, нош мынам поннам но кырӟаны ноку мылкыды ӧй вал. Вераны возьыт, нылылы но одӥг нуны гур но ӧй кырӟа, кузпалы кырӟаса пукиз. Али яратӥсько кылзӥськыны картэлэсь апайёсыныз ӵош кырӟамзэс, шумпотӥсько, мон талантливой кылзӥсь шуыса.

Сюлмы бӧрдэ, мамаен тятя улонысь кошкемын ни шуыса. Куке но книга гожтӥ на ке, со ӵыжы-выжыосылы сӥземын луоз — Степанов но Пантелеев выжыослы. Туж юнэсь, адӟем карымонэсь, ужасесь, йӧноесь вылӥллям мынам пересь анайёсы но атайёсы.

Мон али та ӵыжы-выжыосы сярысь пӧртэм ивор люкасько, архивъёсын бугыръяськисько, угось лулыным-сюлмыным шӧдӥсько соослы матын луэмме.

Вордӥськем нуналме котьку карисько вал матысь эшъёсыным гинэ. 50 арескам кисьмай, лэся. Кыӵе ке праздник лэсьтэме потӥз. 16-тӥ куартолэзе Удмурт кун университетлэн библиотекаяз ортчиз «Триптих» книгаеным но «Удмуртская поэзия и перевод: анализы, интерпретации, комментарии» монографиеным тодматскон.  Вордӥськем нуналме нырысь пусйи Ижын, собере Можга ёросысь Карашуре, кузпалылэн дораз, мыном, отын Лебедев но Марков ӵыжы-выжыосынымы табань пыжом. Нылмы шуэ: «Карашур табаньлэсь номыр ческытэз  ӧвӧл».

Мария Векшина

Удмурт Дунне
By Удмурт Дунне 25 мая, 2016 14:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<