Кин пыриськоз «Огъя Россия» партилэсь Кун Думае быръёнъёсы?

Удмурт Дунне
By Удмурт Дунне 23 мая, 2016 10:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
2016_05_22 Невоструев на праймериз

Праймеризэ пыриськиз Кун Кенешлэн тӧроез В. Невоструев

Мон верай малпанме!

    Толон, 22-тӥ мае, быдэс Россиын сямен ик, Удмуртиын ортчиз Кун Думае быръёнъёсы «Огъя Россия» партилэсь кандидатъёссэ быръён (праймериз).

Мынам участоке интыяськемын Ижысь 69 номеро школаын. Школа котырын вазь ӵукнаысен спортъя кыӵе ке ӵошатсконъёс ортчо, нылпиос бызьыло, тэтчало. Праймериз сярысь ялонъёс котырын, быръёнъя участок азьын нокин ӧвӧл, лэся. Уг ваты: ас поннам малпай, лыктоз меда калык? Но быръёнъя участоке пырыса, малпанэ воштӥськиз: татын кӧня ке адями бюллетень возьмаса сылэ ни вал. Одӥгез юромо бакчае мынон азям, пе, пыри, мукетыз туннэ ужан смена азям, пе, кожи… Бюллетень сётъясьёслэн мылкыдзы капчи…

Ӝыт тямыс часын участок ворсаське. Кыӵе мар ини ужъёссы? Витьтэк тямысэ нош ик пырисько участоке. Паймоно кадь, татын быдэс черод сылэ на, ог дас адями. Бюллетень сётъясьёслэн тусъёссы жум ни. Участоклэн тӧроез Светлана Архипова уг ваты: жадизы. Быдэс нунал, пе, калык лыктӥз, тужгес но 9 часысен кутскыса 11-озь, собере ӝытпал. Нуназе бере 2-3 часын гинэ шыпыт вал, адямиос шутэтскизы, нуназеязы, лэся.

— Кыӵе арлыдоосгес куаразэс сётӥзы?

— Котькыӵеез вал, но, паймоно кадь, тросгес шоро-куспо арлыдоос. Ӧм но малпалэ калык сыӵе мыло-кыдо пыриськоз шуыса…

Светлана Анатольевнаен вераськыса ӧм вуттэ, ог 40 аресъем воргорон пыриз но комиссиын пукисьёс, черодын сылӥсьёс шоры урдскылыны ӧдъяз:

— Мар кариськоды татын, ваньмыз кемалась тодмо ни! Кытын ваньмызлы пумит графады, али ик возьматэ! Возьматэ! Кытын?! — Тазьы кесяськыса, воргорон ваньзэ видео снимать каре, ассэ зэмос героен шӧдэ, лэся. Потыны куронъёсты пель сьӧртӥз лэзе: тон, сисьмем адями, мар татын кариськод? — камеразэ мертаз со лап-лап мугоро воргорон шоры.

— Мон кураме сётыны, малпанме вераны лыктӥ! Нош тон мар шуыса монэ снимать кариськод?!

Со вискын Светлана Архипова полицие жингыртыны ӧдъяз.

Сопала-тапала тэтчась воргорон берлань-берлань кыре потӥз. Бӧрсяз ӧсъёсты тач-тач ворсазы. Всё, 20.00 час, участок ворсаське. Зэм, ӧсэ эшшо йыгаськисьёс вал на: шоро-куспо арлыдо кузпалъёс беромиллям, лэзе на, пе, милемыз. Но Светлана Анатольевна чурыт кылзэ вераз: быръён йылпумъяськиз! Собере ачиз ик пуксиз куара лыдъяны. Оглом 822, пе. Та лыдпусэз соку ик «Огъя Россия» партилэн оргкомитетаз ивортӥзы. Табере, пе, кылем бюллетеньёсты лыдъялом, нош собере урнаез усьтом.

20 час 30 минутэ «Огъя Россия» партилэн Удмуртиысь оргкомитетэзлэн тӧроез Владимир Невоструев праймеризлы нырысетӥ йылпумъянъёс лэсьтӥз ини. Журналистъёслы со вераз: Удмуртиын куара сётыны ветлӥз 100 сюрс пала адями.      Та выллем куара сётон Россиын нырысьсэ радъяськиз. Таӵе амалэн «Огъя Россия» партия аслаз кандидатъёсыз пӧлысь тужгес устооссэ бырйыны малпаз. Бӧрысь соос пыриськозы ни Кун Думае быръёнъёсы. Зэмос быръёнъёсын ӵошатыса, таяз участокъёс трослы ӧжытгес вал. Владимир Невоструев верамъя, кӧня ке участокъёс огазеямын вал, соин ик оглом учкыса, городын 15 процентэз гинэ участокъёс ужазы, гуртын — 25 процентэз. Но котькуд мылкыд карись куаразэ сётыны быгатэ вал, зэм, со понна куд-огезлы кыдёкегес ик мыноно луиз.

— Мукет улосъёсын ӵошатыса, асьмелэн быръёнъёсмы огсыр но рос-прос ортчизы, — пусйиз Владимир Петрович.

Зэм, вань куд-ог пичи ӝожтӥськонъёс. Соос комиссилэн нимысьтыз кенешаз эскериськозы. Нош кин кӧня куара люказ — тодмо луоз 25-тӥ мае. Соку праймеризлы рос-прос йылпумъян лэсьтыны чакламын.

Елена Миннигараева

Удмурт Дунне
By Удмурт Дунне 23 мая, 2016 10:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<