Владимир Путин: Шудо нуналъёс тросгес мед луозы

Удмурт Дунне
By Удмурт Дунне 21 апреля, 2016 17:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

14-тӥ апреле, ортчиз Владимир Путинэн меӵак эфир. Туэ со радъяськиз 14-тӥзэ, кыстӥськиз 3 но ӝыны часлэсь ятыр. Люкаськизы 3 миллионлэсь ятыр юанъёс. Нырысетӥ интые потӥзы социальной ужпумъёс.

Кылем арын шаплыгес вал ке нылкышноос, туэ тросгес вазиськизы воргоронъёс. Лачак юанъёссэс ыстӥллям нылпиос но. Президентлы юан келяны луиз видеороликен.

В. Путин: гурт удыс пыд йылаз султыны кутскиз ни.

В. Путин: гурт удыс пыд йылаз султыны кутскиз ни.

Ӵапак таӵе видео бордысен ик кутскиз В. Путинэн меӵак эфир. Омск городысь нылаш Президентлы возьматӥз нюко-гопо сюресъёсты. Та, пе, городмылэн шорыз.

— Таӵе югдур кылдэмын Россиысь ваньмаз сямен ик городъёсын, гуртъёсын, — видеороликез учкемез бере шуиз Владимир Путин. — Улосъёсын кылдытӥмы Сюресъёсъя фондъёсты. Жаляса верано, куд-ог улосъёслэн йыръёссы та фондэ келям уксёез кутӥзы мукет лэчыт ужпумъёслы. Угось законын та коньдонэз кутонъя чурыт куронъёс пуктэмын ӧвӧл. Мон малпамъя, улос фондъёсы келям уксёез кутыны лэзёно сюресъёсты выльдонлы-возёнлы гинэ. Матысь дыре, малпасько, тае кунамы пыӵатомы. Со сяна, мон кемалась верасько ни: выжоно контракт система вылэ. Мукет сямен вераса, сюресэз лэсьтэм огазеяськонъёс кыл кутыны кулэ солэн ӟечлыкез понна, ас вылазы басьтыны кулэ сое возёнэз, утялтонэз. Меӵак эфир йылпумъяськытозь, Омск улосысь кивалтӥсьёс Президентлы ивортыны дыртӥзы — туэ тупатъяны, пе, чакласькомы 21 сюресэз.

Кенешон выжиз кунмылэн экономикаез вылэ. Ортчем ар капчи ик ӧй вал. Усиз производство, кулэсмизы калыклэн доходъёсыз, со вие ик ӝутскизы сиён-юонлы, вузъёслы дунъёс.

— Зэм, дунъёс ӝутскизы, калыклэн кисыез начармиз, — шуиз В. Путин. — Капчи ӧвӧл, валасько. Кунгож сьӧрысь сиён-юонлы сюрес пытсаськиз, озьы паськытэсь луонлыкъёс усьтӥськизы асьме производительёслы. Валаськомы, соослы юрттытэк, кыдёке уд мыны. Соин ик кун ласянь арысь аре бадӟымгес юрттэт чакласькомы. Нырысь ик, гурт продукция поттӥсьёслы. АПК пичиен пыд вылаз султыны кутскиз ни — та удысын производство 3  процентлы йылэмын. Но кин шуиз, капчи улон шуак кутскоз шуыса?! Со понна трос лэсьтоно луоз на. Асьме дорын поттэм вузъёс макем тросгес луозы, сокем ӝоггес капчиялоз улонмы.

Уно вазиськонъёс вуэмын уждунэз ӝегатон пумысен. Та юанэн вазиськизы Москваын метро лэсьтӥсьёс но, Новосибирскысь нянь пыжисьёс но, Сахалинын чорыг поттӥсьёс но. Президент оскытӥз та югдурез син шораз возьыны. Ивортӥз: Правительство дасяз ни шуге-леке шедем предприятиослы юрттонъя программазэ.

Гурт удысэн герӟаськем сюлмаськонъёсынызы Президентлы вазиськизы Воронеж, Калуга улосъёсысь фермеръёс но, бадӟым хозяйствоослэн кивалтӥсьёссы но. Санкциослы пум понэмын луиз ке, кунгож сьӧрысь продукция, иське, выльысь асьме лавкаосы вуоз? Гуртоос нош ик шуге-леке вуозы? Президент буйгатӥз: АПК-лы тужгес но бадӟым саклык висъяны тыршиськомы. Зэм, дуннеын югдур туж ӝог воштӥське, санкциос ласянь но котьма луыны быгатоз. Но оске: гуртоослы юрттыны амалъёс лачак, соос дасямын-чакламын ни.

Мукетыз юан герӟась-кемын вал пальма вӧен. Воронеж улосысь фермер ӝожтӥськиз:  пӧсяса-тыршыса поттэм йӧллы, пе, туж секыт та вӧен вожвылъяськыны. Пальма вӧй дунтэмгес, солэсь лэсьтэм йќлэз басьтыса, калык уксёзэ шыръяны тырше. Оло, дыр вуиз та вӧйлы пумит ужрадъёс кутыны? Президент та малпанэн быдэсак соглаш кариськиз. Уноез производительёс пальма вӧез лушкем куто, сиёнлэн упаковкаез вылэ тае уг пусъё. Нырысетӥ кичӧлтонэ: кин тае пусъе, иське, сое мозмытоно пальма вӧйлы акциз тыронлэсь. Басьяськись тодыны кулэ, малэсь дасямын соиз я таиз сиён, шуиз В. Путин.

Калыкез сюлмаськытэ улосъёсын социальной учреждениосты — тужгес но эмъяськонниосты — пытсан. Калыклы пумит ӧвӧл-а та?                В. Путин шуиз:

— Улосъёсты та ужез быдэстыны косыкум, мон лыдэ басьтыны кури котькуд улослэсь аспӧртэмлыксэ: калыклэсь лыдзэ, эмъяськонниослэсь я школаослэсь макем матын я кыдёкын интыяськемзэс. Жаляса верано, куд-ог улосъёс та ужез быдэстӥзы, рос-прос малпаськытэк. Котькудӥзъя югдурез ачим сак чакласа возё.

Кылем арын ӵемгес чузъяськизы дуннеысь югдурен, кризисысь потонэн герӟаськем юанъёс — калык, зэмзэ но, шулӟектэмын вал, мар вите кунмес азьланяз? Туэ бадӟымгес саклык висъяськиз социальной удыслы. Валамон луиз: калык калленэн дыше ни выль югдурын улыны, кунмылы осконэз уг кысы — юнма гинэ. Кенешонэз йылпумъяса, Президент сӥзиз: шудо нуналъёс тросгес мед луозы!

Елена Никитина

 

Удмурт Дунне
By Удмурт Дунне 21 апреля, 2016 17:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<