В. Путин меӵак эфирын юанъёслы валэктонъёс сётъяз

Удмурт Дунне
By Удмурт Дунне 27 апреля, 2016 11:57
Кун Кенешысь депутат  В. Бузилов.

Кун Кенешысь депутат В. Бузилов.

14-тӥ апреле В. Путин меӵак эфирын валэктонъёс сётъяз Россиын улӥсьёслэн юанъёссылы. Та шара вераськонлэн йылпумъянъёсыз сярысь малпанъёссэ вера Кун Кенешысь ялан ужась комиссиен кивалтӥсь Валерий Бузилов.

— Россилэн Президентэз меӵак эфирын Россилэн лэчыт ужпумъёсыз сярысь вераз. Со вала: калыкез, Удмуртиын улӥсьёсты но, нырысь ик сюлмаськыто экономикаен, социальной удысэн герӟаськем юанъёс.

Нырысь ик сётэмын вал сюресъёс сярысь юан. Тулыслы быдэ та ужпум туж сюлмаськытэ троссэ улосъёсты. Россиын 1-тӥ апрельысен бензинлы акцизъёс 2 манетлы будэтэмын.  В. Путин оскытӥз, та чотын люкаськись ӝыныез коньдон улосъёсысь Сюрес фондъёсы келямын луоз шуыса. Иське, туэ сюрес лэсьтыны но тупатъяны ватсаса 40 миллиард манет вуоз. Умоен лыдъясько В. Путинлэсь сюрес лэсьтӥсьёс пумысен кичӧлтонзэ. Со ӵектэ сюрес лэсьтӥсь предприятиослы оскыны сюрес возёнэз но, тупатъянэз но, соку урод асфальт вӧлдэмысь, супыр-сапыр ужамысь дугдысалзы. Малпасько, сюрес лэсьтӥсьёслэсь кылзэс эшшо но золгес юано, сюресъёсты дыраз мед тупатъялозы шуыса. Берло аръёсы Удмуртиын калык пыриськыны кутскиз сюресъёслэсь ӟечлыксэс чакланэ. Та кужымез но лыдэ басьтоно. Федерал центр, калык юрттӥськизы ке, элькун кивалтэт тендеръёсты ортчытэмез, сюрес лэсьтонэз но тупатъянэз сакгес чаклаз ке, югдурез тупатыны луоз.

Меӵак эфирын В. Путин вераськиз промышленностьлэн куд-ог удысъёсызлы юрттон сярысь. Со удысъёс Удмуртилэн улоназ валтӥсь инты басьто. Кылсярысь, Президент пусйиз: автомобиль поттӥсь предприятиослы юрттон кризислы пумит планлэн оглюкетэз луиз. Автопромлы возиськыны бюджетысь 40 миллиард манет висъямын. Декабре Федерал Собранилы вазиськоназ сямен ик,   В. Путин нимысьтыз саклык висъяз ож тӥрлык поттонлы. Владимир Владимирович шуиз: Сириын террористъёсты быдтонэ пыриськон асьме специалистъёслы луонлык сётӥз техникаез умоятыны. Мон ачим ужай ож тӥрлык поттӥсь предприятиын — Ижысь механикая заводын, Афган ож дыръя кивалтӥ заводысь анализ лэсьтонъя группаен. Соин умой тодӥсько: техникаез ож бусыын эскерон азьлане кузь вамыш лэсьтыны юрттэ. Президент верамъя, Сириын асьме армия адӟем карымон вал бере, дуннеын тросгес тунсыкъяськыны кутскизы Россиын поттэм ож тӥрлыкен, огъя рынокын асьме тӥрлык пумен бадӟымгес но бадӟымгес инты басьтэ. Мукет кунъёсысь 50 миллиард манет тыр заказъёс вуэмын. Соин валче В. Путин шуиз: обороналы ужась предприятиослы заказъёс 2-3 ар ӵоже кулэстэмын уз луэ.

Элькунмы понна со умой ивор, угось ож тӥрлык поттӥсь предприятиосамы дасо сюрсъёсын конструкторъёс, инженеръёс, рабочийёс ужало. Соос туала ожмаськон техника, пыӵалъёс, винтовкаос, адямитэк лобась системаос лэсьто. Тодады вае ай, Удмурт Республикалэн 2015-тӥ ар понна Кун премиез сётэмын военной техникаез выльдэмзы понна Ижысь «Купол», «Аксион» предприятиослы, «Калашников» концернлы. Шумпотоно, туннэ ВПК-ысь предприятиослэн заказъёссы бадӟымесь.

В. Путинэн вераськонын ӝутэмын эшшо одӥг лэчыт ужпум — кун ичигес пыриськыны кулэ пичи но шоро-куспо ужбергатӥсьёслэн, фермеръёслэн ужазы. Мон ӵем вуылӥсько ёрос центръёсы, гуртъёсы, пумиськылӥсько отысь калыкен. Тодӥсько, та юан троссэ сюлмаськытэ. В. Путин оскытӥз, Россиын бизнеслы паськыт сюрес усьтэмын луоз, пичи но шоро-куспо ужбергатӥсьёсты, фермеръёсты эскеронъёсын уз ёртэ шуыса. Али Россиысь Правительство та пумысен законъёсы воштонъёс дася. Та пумысен федерал центр ма шуоз, озьы ик луоз, угось ужбергатӥсьёсты, фермеръёсты чакласа возё Россилэн ёзъёсыз.

Сергей Захаров

Удмурт Дунне
By Удмурт Дунне 27 апреля, 2016 11:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<