Шаерамы ортче П. Чайковскийлы сӥзем фестиваль

Удмурт Дунне
By Удмурт Дунне 11 апреля, 2016 10:23
DSC_5411

П. Чайковскийлы сӥзем 59-тӥ фестивалез усьтӥзы Ю. Башметлэн «Солисты Москвы» камерной ансамблез но артист К. Хабенский.

Со котьку сямен ик  кизилиё луоз Удмуртиысь учкисьёс понна.

Кылсярысь, туннэ, 8-тӥ оштолэзе, Ижысь калык тодматскоз паймымон дуэтэн, Москваысь егит артистъёсын — Дмитрий Илларионовен (гитара) но Борис Андриановен (виолончель). Соос быдэстозы А. Пьяцоллалэсь, Н. Паганинилэсь, Д. Доулендлэсь произведениоссэс но ӟуч романсъёсты. Ӵуказе, 9-тӥ оштолэзе,   Удмурт филармониын Россиысь калык артистка, пианистка но концертмейстер Лариса Гергиева (тодмо дирижёрлэн Валерий Гергиевлэн апаез) Ижысь Операя но балетъя театрысь солистъёсын мастер-класс ортчытоз, собере аслаз дышетскисеныз, Мариинской театрысь солисткаен Мария Баянкинаен, пинал тенорен Тарас Присяжнюкен концерт сётоз. Со концертэ ик пыриськозы  асьме Операя но балетъя театрысь артистъёс Иван Слепухов но Алла Захарова. Арнянуналэ, 10-тӥ оштолэзе, Ижын шудозы егит скрипач Павел Милюков но Москваысь симфонической оркестр, дирижёрез  — быдэс дуннелы тодмо маэстро Юрий Симонов. Нош куартолэзе Удмуртие вуозы на Москваысь П. Чайковский нимо симфонической оркестр, дирижёрез Владимир Федосеев.  6-тӥ-7-тӥ мае 83 аресъем маэстро В. Федосеев, симфонической оркестр но 12 аресъем Варвара Кутузова (фортепиано) быдэстозы  В. Моцартлэсь но П. Чайковскийлэсь произведениоссэс. Пётр Ильичлэн вордӥськем нуналаз, 7-тӥ куартолэзе, Ижын концерт сётоз Мариинской театрысь симфонической оркестр, кивалтӥсез но дирижёрез Валерий Гергиев.

Та фестиваль чотын Удмуртие вуылӥзы ини Россиысь тодмо скрипач Карэн Шахгалдян но пианистка Екатерина Леденёва, Россиысь калык артист Константин Хабенский но «Солисты Москвы» камерной ансамбль, кивалтӥсез но дирижёрез —  Совето Союзысь калык артист Юрий Башмет.

П. Чайковскийлы сӥзем 59-тӥзэ крезьгуро фестивалез мытӥзы Юрий Башметлэн «Солисты Москвы» камерной ансамблез но артист Константин Хабенский.

DSC_5250

Та концертэ вань билетъёс вузамын вал, тужгес дуноосыз 6 сюрс манет сылӥзы ке но. Концерт кутскон азьын дано артистъёс журналистъёсын пумиськылӥзы.

Малы ке малпасько вал, К. Хабенский трос вераськись. Озьы вылымтэ. Артистлэн учкемез но малпанъёсыз туж визьмоесь. Чик ӧвӧл вылтӥяськонэз,  кинлы ке кельшыны выронэз, шӧдӥське лулкужымез. Нош  Ю. Башмет вакчи дыр куспын олома но вераса вуттӥз.

— Мыным кельше Костяен… Константинэн ужаны, со крезьгурез валась адями. Яра кылзыны, кызьы со лыдӟе А. Камюлэсь «Калигулазэ» Ф. Шубертлэн крезьгурез чузъяськем улсын. Ми  та проектын огкадь шӧдӥськом крезьгурез но прозаез. Вылаз ик, котькуд концерт (пуштросэз, гурез соос ик ке но) ог-огезлэсь висъяське, кылдо выль кылъёс, сцена вылын луэ импровизация. Но котькудаз ми шудӥськом пӧртэм сямен, Константин но лыдӟе выль сямен. Спектакльлэн сюрлыез вань, но крезьгурлэн но куаралэн чузъяськемзы али татын, учкисьёс азьын, кылдо, — шуиз Ю. Башмет.

1998-тӥ арын Санкт-Петербургын режиссёр Юрий Бутусов пуктӥз «Калигула» спектаклез, валтӥсь ролез отын  кема аръёс ӵоже шудӥз К. Хабенский. Табере артист камерной ансамбль шудэм улсын лыдӟе Калигулаез (Калигула — Римысь императорлэн Юлий Цезарьлэн кушем нимыз). Малы берытскиз Хабенский та роль борды?

DSC_5335

— Монэ али но малпаськытэ та герой, та пьеса, та тема. Кылъёсыз отын вошъясько, кызьы воштӥське асьмелэн улонмы, но пуштросэз туннэ но уг вужмы. Туж тросэз потэ залын пукисьёс бордысь, соин ик мыным тунсыко, кыӵе учкись Ижын, — шуиз К. Хабенский.

Вераны кулэ, К. Хабенскийлэн но Ю. Башметлэн вань на кыкетӥез бадӟым проектсы. Со А. Сент-Экзюперилэн «Маленький принц» повестезъя дасям спектакльзы.

— Та кык ужъёс пӧлысь кудӥз тӥледлы матынгес? — юазы К. Хабенскийлэсь.

Артист ӧз ыштӥськы:

— Нош тӥледлы мар матынгес: мунчо яке бассейн, сояз но таяз вуэз вань. Но соос воксё пӧртэм макеос, татын но озьы ик.

 

Галина Семёнова

Туспуктӥз Н. Сметанина

Удмурт Дунне
By Удмурт Дунне 11 апреля, 2016 10:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<