Элькунысьтымы 694 коркан улыны уг яра!

Удмурт Дунне
By Удмурт Дунне Апрель 11, 2016 13:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кун программаез куашкато интыосысь кивалтӥсьёс

Россиысь Лэсьтӥськонъя министерство азе ужпум пуктэмын: куашкан калэ вуэм юртъёсысь 777 сюрс семьяос 2017-тӥ арозь корка пырон лэсьтыны кулэ. Кызьы та программа быдэсъяське Удмуртиын?

Оскон кузьмась программа

Куашкан калэ вуэм юртъёсын векасьёслы улон инты висъянъя кун программа юнматэмын 2013-тӥ-2017-тӥ аръёслы. Отчы элькунысьтымы 694 корка сюремын — сомындаез улыны ярантэмен лыдъямын 2012-тӥ арын 1-тӥ январьлы.

Малы корка пырон уг шумпотты?

Пичи Пурга ёросысь Кечолысь улыны ярантэм выль корка.

Энергетикая, ЖКХ-я но тарифъёсты кун ласянь радъянъя министерство ивортэмъя, туннэ нуналлы ог 350 корка пуктэмын ни — данаказ корка пыронъёс но шудэмын. Матысь 2 арлы кылемын на 340-лэсь ятыр юрт пуктыны. Талы пичиен коньдон шеде, кылсярысь, элькун бюджетысь туэлы 775 миллион манет учкемын. Кемалась ӧвӧл Россиысь ЖКХ-я фонд ог 500 миллион манет висъямез сярысь ивортћз.

Шедьыны кулэ та программая коркаос љутыны мылкыд карись огазеяськонъёс но. Та сярысь мылкыдзэ вераз Правительстволэн Тӧроез Виктор Савельев:

— Лэсьтӥськон удыс секыт югдуре шедемын, шуиськом. Но, малпасько, али ӵапак сыӵе вакыт, куке юрт ӝутонэн вырись огазеяськонъёс пыриськыны быгатозы коркаосты тыро-пыдо тупатъянъя но куашкан калэ вуэм сэрегъёсысь улӥсьёсты выль интыосы выжтонъя программаосы.

Ӝегасьёслы — санкциос?

Но ваньмыз вӧй вылтӥ кадь гинэ луысал ке! Нырысь ик, керӟегъяськонъёс потыны кутскизы, куд-ог лэсьтӥськисьёс юртъёсты чаклам планъя пуктыны уг вуо шуыса. Кылсярысь, Эгралан но Глазовын таӵе коркаос кылем арын октябрь толэзе ик дась луыны кулэ ни вал. Нош лэсьтӥськон ӧз йылпумъяськы ар пумын но, туннэ но…

Удмуртилэн Тӧроез Александр Соловьев кылдэм югдур пумысен мылкыдзэ чурыт вераз ни:

— Малпасько, отчы лыктӥзы ужзэс тыро-пыдо быдэсъяны быгатӥсьтэм лэсьтӥськисьёс. Ортчытэмын аукцион, торгъёс, шуэмын: котькуд квадрат метр 28 сюрс манетлэсь дуно усьыны кулэ ӧвӧл. Глазовысь лэсьтӥськисьёс вераны кутскизы: сомында гинэ коньдон туж ӧжыт, юртлэсь дунзэ выльысь лыдъяно. Куронъёсмес тодо вал, соку малы басьтӥськизы?

Ужзэс тыро-пыдо быдэсъясьтэмъёс пӧлысь куд-огзэ Удмуртилэн Тӧроез мозмытыны дэмлаз. Ватсаз на: лэсьтӥськон ужъёс ӝегало шуыса, нырысь ик янгыш муниципал кылдытэтъёслэн йыръёссы — соос заказчик луо.

Нош мартлэн кутсконаз Россиысь Правительстволэн Тӧроезлэн воштӥсез Дмитрий Козак кышкатъяз ни: куашкан калэ вуэм коркаосын улӥсьёсты выль интые выжтонэн герӟаськем программаез дыраз ӧз быдэстэ ке, улосъёслы тупатэмын луозы тыриськонъёс. Туэ 1-тӥ апрельлы, пе, ӝеганъёс луыны кулэ ӧвӧл.

1-тӥ апрель ортчиз — куд-ог коркаос вуттымтэ. Ярано, Удмуртилэн Тӧроез Александр Соловьев нош ик огкыл шедьтыны быгатӥз Россиысь Правительствоен. Кызьы ивортӥз Тӧролэн пресс-службаез, элькунмылы санкциос туннэ нуналлы ялэмын ӧвӧл. Москва соглаш кариськиз: Эгралась коркаез апрель пумозь вуттоно, Глазовысьсэ — гужемозь.

Интыяз сылӥсь воз

Мукетыз ужпум — пуктэм коркаос куронъёслы уг тупало. 2014-тӥ арын ни ӵаш поттон кылдӥз Ижысь Дружба ураме пуктэм юртъёс пумысен. Лэсьтӥськонъя «Мастер» компания трос квартираем туж чебересь коркаосты чуренак ӝутӥз. Но ар но ӧз ортчы, отчы улыны выжемъёслэн шумпотонзы берытскиз ӝожомонэн. Квартираосазы мускыт улэмен, обойёссы усьылыны ӧдъязы, шоканы секыт — вентиляция уг ужа вылэм, нырысетӥ этажъёсын улӥсьёс ӝожтӥськыны кутскизы, выжъёссы туж кезьытэсь шуыса. Уйин кышкатскыса сайкало, поездъёс дымбыр-йыг ветлыны, куаразэс сётыны кутско ке. Угось чугун сюрес рельсаос дорозь 26 метр сяна ӧвӧл. Ӧжытсэ 100 метр луыны кулэ.

Жаляса верано, воз туннэ но интыысьтыз ӧз вырӟы. Шоркарысь кивалтӥсьёс шуо: Дружба урамысь коркаослэсь ӟечлыксэс выльысь эскероно. Собере гинэ вераны луоз: улыны ярамонэсь-а соос, выжтозы-а отын улӥсьёсты выль интые.

Ижын кылдэм югдуръя валаны кулэ ни вал кадь, тазьы ужаны уг яра шуыса. Но одӥг мажес вылэ кык пол но, куинь пол но лёгиськыны луэ вылэм. Кылсярысь, Якшур-Бӧдья ёросысь Тылоын юртлэн ӟечлыкезъя али юанъёс кылдэмын. Паймытэ Пичи Пурга черкогуртысь югдур но. Кылем арын отын артысь артэ кӧня ке квартираен 4 корка пуктэмын. Отын улӥсьёс туннэ ӝожтӥсько ни: улон сэрегъёссылэн борддоръёссы пурысьтало, штукатуркаез пырдыса усьылэ.

— Уката паймытэ: малы одӥгъёсаз квартираосын сьӧросэз вань, мукетъёсаз ӧвӧл, — ӝожтӥське татчы улыны выжем Елена Савинова. — Мынам кык пиналы — туалетмы ӧвӧл, бускель нылкышнолэн вань…

Вужез но вылез

Паймемлэсь но паймытэ Пичи Пурга ёросысь Кечолысь югдур. Гужем вылтӥ «Постольский» огазеяськон отчы 7 квартираем корка ӝутӥз.

— Май толэзе бакчаосамы кизим-мерттӥським ни вал, — верало кечолъёс, — олокытысь-мар лэсьтӥськисьёс вуизы, бакчамес лёгазы, гудӥськыны, фундамент кисьтыны кутскизы. Проектсэс, возьматыны курыса но, ӧз адӟытэ…

Ярам бон, мед лэсьтозы ни, вуж коркан улэмлэсь выляз, котьма ке но, умойгес луоз, малпазы соос.

— Али улон интыосмы 100 арлэсь кема чидамын, — шуиз корка пырон лэсьтыны дасяськисьёс пӧлысь одӥгез Светлана Якимова. — Отын вуэз ӧвӧл, липетэз вияны кутскемын ни.

Выль ар азьын кечолъёслы выль улон интыоссылэсь усьтонъёссэс люкылӥзы. Но туннэ нуналозь отчы кыкез гинэ семья выжиз. Мукетъёсыз ӟудэмын…

Светлана Якимовалэн квартираез — нырысетӥ этажын. Укно улаз ик — пулэсь кокам сьӧрос, чакламын со та коркан вань улӥсьёслы. Шуэ: косяк азям учкыса гинэ коть пук, кин кӧня пол отчы потаз. Зэм, лымы шунаны кутскемен валче сьӧросэ пырыны дӥсьтӥсьёс шедёзы меда — со тырмемын. Нош отысь уртчыса потӥсь кырсь вуэз тани-тани колодчаозь вуоз — гуртоос отчы ву дуре ветло.

Выль коркан пӧсь ву ӧвӧл, кезьытэз шыр быж кадь гинэ бызе. Татын ӧвӧл газ, нош тылэз дырын-дырын кысыло…

— Улыны ӧм выже на, нош тыл понна тыронэн расчётка вайизы ни, — шуэ мукетыз корка пырыны дасяськись Валентина Юргова. — Толэзьлы быдэ 2 сюрс 700 манет пала. Нош плитка вылын сиён пӧзьтыны кутским, телевизор, холодильник лэзим ке, кӧня меда тыроно луом?

Эшшо та коркан борддоръёс тӧл шулано кадесь, косяк янакъёс умой-умой пуктылымтэ, липетысь ву вия ни. Огкылын вераса, лякылэм суй-пыдъёс шат сое лэсьтӥллям?

Кызьы таӵе интыын улод — кечолъёс ӧз валалэ. Соин ик пӧртэм интыосы гожтэтъёс ысъяны ӧдъязы. Правооссэс утён понна пӧсяно луиз. Озьы югдурзы сярысь кылӥзы ик кадь Госжилинспекция но, Прокуратура но…

Куашкан калэ вуэм юртъёсын улӥсьёсты выль интые поттон программа туж кулэ! Со чакламын адямиослэсь улон-вылонзэс ӟечгес карон вылысь. Но малы меда котьку озьы уг пӧрмы? Куд-ог дыръя нырысетӥ интые пото кӧс лыдпусъёсын отчётъёс. Тӥни соку адямиос корка пыронзылы но шумпотыны уг быгато…

Элина Кумачёва

Удмурт Дунне
By Удмурт Дунне Апрель 11, 2016 13:52 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<