Коскатӥсь Визьмо Нюръяськон

Удмурт Дунне
By Удмурт Дунне Апрель 11, 2016 15:58
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Удмурт кун филармониысь «Шулдыр ӝыт» ансамбль ньылетӥ арзэ радъяз маскарчилы Анатолий Ушаковлы сӥзем «Маскара» фестиваль.

КВН шудонэ пыриськемъёс.

КВН шудонэ пыриськемъёс.

Кылем арын но туэ фестиваль КВН амалэн ортчиз. Туж жалясько, нырысетӥзэ адӟыны ӧй быгаты шуыса. Верамъёссыя туж тунсыко вал, пе, калык но зал тыр ик люкаськем. Серекъяны но серекъятыны быгатӥсьёс таяз учыре но сюлмысь нюръяськизы, горыса кытӥ-отӥ кӧт ик вӧсь луылӥз.

Туэ вожвылъяськиз 3 команда: Алнаш черкогуртысь «КыстыBOY», Шаркан ёросысь Быгы гуртысь «БыгАрда» но Пичи Пурга ёросысь Эдэйгуртысь «Тыпыр-тапыр». Пургаос но алнашъёс кыкетӥзэ пумиськизы ке, шарканъёс воштӥзы якшур-бӧдьяосты. Дышем сямъя командаос асэнызы тодматӥзы, юан-веранъёсъя визьсынан пыр потӥзы, эстрадая миниатюра но крезьгуро уж возьматӥзы.

DSC_4625

Пичи Пурга ёросысь «Тыпыр-тапыръёс», тужгес трос баллъёс люкаса, нош ик нырысетӥ луизы.

«Тыпыр-тапыръёс», тужгес трос баллъёс люкаса, нош ик нырысетӥ луизы. Та шулдыр но бадӟым команда сярысь 2015-тӥ арын газетмы гожъяз ни вал (19-тӥ июнь, «Тыпыр-тапыр ужало но тыпыр-тапыр серекто»). Эдэйгуртъёс таяз учыре асьсэды ӟечгес возьматӥзы эстрадая миниатюраын но крезьгуро сценкаын. Нырысетӥяз усьтыны кулэ вал «Удмуртия но кризис» ужпумез. «Тыпыр-тапыръёслэн» талы сӥзем миниатюразы ортчиз Эдэйгурт дугдылонниысь базарын. Гурт кышноослэсь кризис вакытэ йӧспӧръяськемзэс возьматӥзы нылкышно дӥсен пӧрмытскем пиос. Базар кышноос кылзэс но шерыны вутто, ог-огзылэсь нырулзэс но ӵушо,  полицейской ки улысь мозмытскон амал  но шедьто.

Нош крезьгуро ужлэн темаез вал «Егит удмурт кизилиос, яке Секыт-а кизили луыны». Эдэйгуртъёс кизилиятӥзы куинь Светӥосты, Наталья Пугачёваез, «Вить Сергейёсты» но мукетъёссэ. Пусйымон, пургаослэн «висисьёссы» но командазылы  зол кичабонъёсын вормон мылкыд пыӵатыны юрттӥзы.

Кыкетӥ луиз «БыгАрда» команда. Быгыос 3 кузя гинэ лыктӥллям: Ксения Кузьмина (Ксюша),  Гавриил Кузьмин (Барон Гавр) но Фёдор Байданов (Федор). Быдэс орда люканы дырмы, пе, ӧй вал. КВН-э ӧтён 2 арня талэсь азьло гинэ вуэм. Кыӵе сценкаосмы дась вал, соосты ик вайим, шуо. Таосыз визь сынанын усточи луэменызы висъяськизы, уката ик Федор кыллы кисыяз уг пыры. Вералэ ай, маин пӧртэм огреч но кактус? Федор малпамъя, кактус — со сыӵе ик огреч, но макмыраменыз мычиськемын ӧвӧл.

Нош кризис сярысь миниатюраын учкисьёс тросгес серекъязы асьсэды шудӥсьёсты (Гавр но Федор возьматӥзы куанерез но узырез): я Гаврлэн куашкась штани кисыысьтыз колбаса кӧня ке пол сцена вылэ усе, я Федорлэн зундэсэз залэтӥ  лоба.

Берло мадизы, асьмелы но, пе, туж яраз сцена вылын шудыны. Дорын, репетировать карыкумы, серем но уг пот ни вал огпӧртэм выреммылэсь. Киыз пӧсямен, Федорлэн чиньыяз бырттэм дуно зундэс вӧй вылтӥ сямен чальтчем но учкисьёс шоры лобем. Серекъяло, ярам, пе, бордаз 15 сюрс манет дуныз гожтымтэ вал, берен берытскиз. Нош Гавр сцена вылэ потон азяз гинэ тодматскем штаниеныз: мар шедем, сое ик сьӧраз кутэм. Калыкез коскатӥз на Федорлэн удмурт кизилиосты дасясь удмурт продюсер Федора Суровая кариськемез но.

DSC_4932

Алнаш черкогуртысь «КыстыBOY» команда.

«КыстыBOY» паймытӥз кризисэн герӟаськем лэчыт юмореныз,  политика ужпумъёсы нырзэс чуртнаны ӧз кепыралэ. Шудоназы пыртћзы котькуд нунал кылћськись «санкция», «импортозамещение», «милдронат» кылъёсты. Но удмурт кыл ӧжыт чузъяськемен, баллъёссы ӧжытгес луизы. Командамы таяз учыре секытэнгес люкаськиз, шуо алнашъёс. Пӧлысьтымы ог 80 процентэз удмурт кылын вераськыны шугъясько, пе. Азязы ужпум пуктӥзы: куспазы тросгес удмурт сямен вераськоно. Осконзы вань, КВН вуоно арын но соосты огазе люкалоз.

Быгыослэн но мылкыдзы ӝутскемын. Вуоно ӵошатсконэ быдэс ордаенымы (егитъёслэн «БыгАрда» огазеяськонэнызы), пе, лыктомы, оло, висисьёссы но соку залын тырмыт луозы. Сцена вылэ потон азямы малпамы, пе, вал, ми понна чабонъёс но уз луэ. Учкисьёс ваньмызлы чабизы, но дурбасьтӥсьёс, пургаослы сямен, котькуд командалы кулэ. Ӵошатскисьёс но 5-6 команда мед луысалзы, со понна тросгес егитъёсты кысконо та шудонэ. Удмурт юморез яратӥсьёсты КВН азьланяз но мед огазеялоз шуыса, ужрадэз дасян борды вазьгес басьтӥськоно.

«Шулдыр ӝытлэсь» та кутсконзэ Анатолий Ушаков одно ик дунъясал, дыр.

* * *

«Маскара» фестивальын котькуд аре пусйиськом «Шӧкычлэсь» юрттӥсьёссэ. Таяз учыре «Маскарчи» нимын дунъямын карикатурист Василий Пахомов. Калык азьын озьы ик пусъемын «Маскара» куара сётонын вормисьёс, Якшур-Бӧдья ёросысь  Татьяна Кайсина но Елена Тронина. «Ури-бери» дуэт нош ик калыкез погыртымон серекъятӥз.

Лия Малых

 

Удмурт Дунне
By Удмурт Дунне Апрель 11, 2016 15:58 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<