«Ингож» семинар: Гожъяськыны шуг!

Удмурт Дунне
By Удмурт Дунне Апрель 21, 2016 12:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
AJ0gYV7sMjk

Иж котырысь «Дзержинец» лагере люкаськизы 25 пала егит гожъяськисьёс.

«Удмурт дунне» газет Нациосын ужан политикая министерстволэн но  «Шунды» огазеяськонлэн юрттэменызы ортчытӥз литературая «Ингож» семинар.

Иж котырысь «Дзержинец» лагере люкаськизы 25 пала егит гожъяськисьёс. Кин ке веросъёс гожъя, мукетыз — кылбур, куинетӥез тунсыкъяське киносценарийёсын. Тодмо писательёс, литературоведъёс, критикъёс 2 нунал ӵоже эскеризы соослэсь ужъёссэс, сётъязы визь-кенеш.

Нырысетӥ нуналаз проза секцилэсь ужзэ валтӥз Удмуртиысь Писательёслэн огазеяськонзылэн ёзчиез, журналист Лия Малых. Лия Яковлевна  пиналъёсты выжыкыл гожтыны косӥз. Котькудӥзлэн пӧртэм пӧрмиз. Эгра ёросысь Александра Шкляева гожтӥз мадьяр но ӟуч кампет кагазъёс сярысь выжыкыл. Пичи  Пурга ёросысь  Наталья Кириллова мадёсаз космосэ лобаз. Татарстанысь Кукмор ёросысь Николай Михайлов воксё быдэс фантастика малпаз. Кыкетӥ нуналаз егитъёсын ужазы литературоведъёс  Вера Пантелеева но Александр Шкляев. Саклык висъяськиз берыктон ужлы но.

ингож1

Нырысетӥ нуналаз проза секцилэсь ужзэ валтӥз Удмуртиысь Писательёслэн огазеяськонзылэн ёзчиез, журналист Лия Малых.

— Мон 2 нунал куспын сомында ӧй жадьы, кызьы катьтэмми,  текстъёсты удмуртысь ӟуче, ӟуч кылысь удмуртэ берыктыса, — вераз Алексей Пикулев.

Киносценарий гожъясьёсты визьнодазы Свердловск улосвылысь драматург Валерий Шергин, «Удмуртия» ГТРК-ысь режиссёр Ольга Айрапетян. Сценарий шоры пиналъёс 3 паласен учкизы: актёр, режиссёр но сценарист сямен. Кино лэсьтон секыт уж вылэм! Огшоры литературной текст гожтэм бере сое  режиссёрской кароно, оператор понна кинолэсь вань суредъёссэ, детальёссэ пыр-поч гожъяно.

Кылбурет секциын, кылбуръёс сяна, кырӟанъёс но чузъяськизы. Уго егитъёс пӧлын вал кырӟан гожъясьёс но —  Пичи Пурга ёросысь Алексей Пикулев, Алнаш ёросысь Кирилл Кириллов. Кылбурчиослэсь ужъёссэс сэрттӥзы-пертчизы  кылосбур наукаосъя кандидат, кылбурчи Виктор Шибанов, «Удмурт дунне» газетлэн редакторез, кылбурчи Зинаида Рябинина.

пантелеева

Кыкетӥ нуналаз туала удмурт литературалы сӥзем лекция лыдӟизы Вера Пантелеева но Виктор Шибанов.

— Кылбур гожъяны быгатон инмысь уг усьы вылэм, — вера Кирилл Кириллов. —  Та семинар дыръя мон валай: мынам творчествое — со шузияськон гинэ ай. Гожтэм чуръёстэ йыр пыртӥд поттоно.

Кыкетӥ нуналаз туала удмурт литературалы сӥзем лекция лыдӟизы Вера Пантелеева но Виктор Шибанов. Мытэм вераськон азьланьтӥськиз котырес ӝӧк дыръя. Ужпумъёсты эскерон борды итӥськизы кылосбур наукаосъя доктор Анна Измайлова-Зуева, Удмуртиысь Писательёслэн огазеяськонзылэн ёзчиосыз Елена Миннигараева, Лия Малых. Мылкыдъёссэс веразы егитъёс но.

— Удмурт кылын гожъяськыны мыным уг тырмо кылъёс, — вера Эгра ёросысь Евгения Корепанова. — Удмурт кылын ӧвӧл неологизмъёс.

— Трос лыдӟиськоно, кыллюкамын бугыръяськоно, гожъяськыку пӧртэм амалъёс утчано, детальёсты кутылоно, — чузъяськизы дэмланъёс.

Анна Зуева вераськон ӝутӥз критика пумысен: А. Ермолаев, Ф. Ермаков, З. Богомолова бере удмурт литератураын адскымон критикъёс ӧз кылдэ ни. Литература узыр луиз ке, луоз критика но, шуиз со. Но егитъёс тодо, соослэн «критикъёссы» — лыдӟисъёссы —  уло Интернетын. Кылдэ удмурт «сетевой литература». Кылбурчиос пӧлысь тросэз печатласько «ВКонтактеысь» «Удмурт кылбурчи» огинын, проза амалэн гожъяськисьёс нуо асьсэ блогъёссэс.

ингож3

Литературовед Вера Пантелеева: Нокин уг тоды, ку та семинарлэн емышъёсыз адӟиськозы.

— Интернетын егитъёс уг быгато асьсэ творчествозы шоры палэнысен учкыны, — вера литературовед  Виктор Шибанов. — Соин ик таӵе семинаръёс ортчытъяны кулэ. Ми но, литературоведъёс, татысь адӟыны быгатӥськом егит литератураез кылдытӥсьёсты, тодматскиськом соослэн творчествоосынызы.

— Нокин уг тоды, ку та семинарлэн емышъёсыз  адӟиськозы, — вазиськиз дышетскисьёслы литературовед Вера Пантелеева. — Татын тӥ ог-огеныды тодматскиськоды, куспады вераськиськоды. Оло арня, оло 15 ар ортчыса, тӥ валалоды та семинарлэсь пайдазэ. Но литература удысын котькӧня тодон-валан мед басьтоды, гожъяськисьлэн пушказ одно ик луыны кулэ аслаз сюжетэз, узыр пуш дуннеез.

— Гожъяськыны туж шуг, — азьланьтӥз литературовед Александр Шкляев. — Но со кулэ уж. Тӥ али ӧд ке гожъяське, азьланяз уз луы лыдӟись но, уз луы удмурт кыл но, удмурт элькун но. «Ингож» семинар борды ӝабырскыны кулэ!

— Гожъяськон — со уж, соин со луыны кулэ чебер но рос-прос. Пиналъёслы юрттоно валаны, кызьы лэсьтӥське литература. Туж тросэз яркыт писательёс потӥзы газетысь, соин ми выльысь улӟытӥм литературая студилэсь ужзэ, таӵе семинаръёс но арлы быдэ ортчытъяны тыршом, — шуиз «Удмурт дунне» газетлэн валтӥсь редакторез Зинаида Рябинина.

Мария Векшина

Туспуктэмъёсыз Мария Векшиналэн но Александр Горбуновлэн

Удмурт Дунне
By Удмурт Дунне Апрель 21, 2016 12:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<